ᐊᐅᓚᑦᓯᓂᓕᕆᓂᕐᒥᒃ ᑐᑭᒧᐊᑦᑎᓯᔨ - KEAC

ᐱᓇᓱᒐᖅ ᐊᑐᐃᓐᓇᕈᕐᑐᖅ

ᑲᑎᕕᒃ ᐊᕙᑎᓕᕆᓂᕐᒧᑦ ᐊᔪᖀᒋᐊᕐᑏᑦ ᑲᑎᒪᔩᑦ (KEAC), ᖃᐅᔨᒋᐊᕐᕕᐅᓱᓂ ᑎᒥᖁᑎᒃ ᑲᕙᒪᓄᑦ ᑲᒪᒋᔭᖃᓲᖑᑦᓱᑎᑦ ᐊᕙᑎᓕᕆᓂᕐᒨᓕᖓᔪᓂᒃ ᐃᓅᖃᑎᒌᓂᓪᓗ ᓴᐳᑦᔨᓂᕐᒥᒃ ᓄᓇᕕᒻᒥ, ᒫᓐᓇ ᕿᓂᓕᕐᒥᔪᑦ ᓇᒻᒥᓂᖅ-ᑲᑦᓱᙰᑦᑐᓯᐊᒥᒃ ᐊᒻᒪᓗ ᐃᓂᓪᓚᑎᕐᓯᒪᑦᓯᐊᑐᒥᒃ ᐃᓚᐅᒍᒪᒐᔭᕐᑐᒥᒃ KEAC-ᑯᓂᒃ ᐱᓇᓱᐊᕋᔭᕐᓗᓂ ᐃᒣᓘᕐᑎᐅᓂᕐᒥᒃ:

ᐊᐅᓚᑦᓯᓂᓕᕆᓂᕐᒥᒃ ᑐᑭᒧᐊᑦᑎᓯᔨ

(ᐊᑌᓐᓇᑐᖅ, ᐅᓪᓗᓕᒫᕐᓯᐅᑎᒃ ᐱᓇᓱᒐᖅ)

ᑐᓴᕐᑎᓯᖃᑦᑕᓗᓂ KEAC-ᑯᑦ ᐃᑦᓯᕙᐅᑕᖓᓂᒃ ᑲᑎᒪᔨᖏᓐᓂᓗ, ᐊᒻᒪᓗ ᐱᓇᓱᖃᑎᙯᓐᓇᖃᑦᑕᓗᓂ ᐊᓯᖏᓐᓂᒃ ᐱᓇᓱᑦᑎᓂᒃ, ᐊᐅᓚᑦᓯᓂᓕᕆᓂᕐᒥᒃ ᑐᑭᒧᐊᑦᑎᓯᔨ ᐅᑯᓂᖓ ᑲᒪᒋᔭᑦᓴᖃᖃᑦᑕᓚᖓᔪᖅ ᐃᓕᖓᔪᓂᒃ ᐊᐅᓚᒍᑎᖏᑦᑕ KEAC-ᑯᑦ ᐊᓪᓚᑎᒻᒪᕆᖓᓂᒃ:

• ᐃᓂᓪᓚᑎᕆᖃᑦᑕᓗᓂ ᑐᑭᒧᐊᑦᑎᓯᓗᓂᓗ KEAC-ᑯᑦ ᑲᑎᒪᓂᑦᓴᖏᓐᓂᒃ ᐱᓇᓱᐊᒐᑦᓴᖏᓐᓂᓗ.

• ᐱᕕᑦᓴᖃᕐᑎᓯᐊᕐᓗᒋᑦ ᑐᓴᐅᒪᖃᑎᒌᓐᓂᖏᑦ ᓄᓇᓖᑦ ᑲᕙᒪᐃᓪᓗ ᖃᐅᔨᒋᐊᕐᕕᖏᑦ.

• ᐱᕕᑦᓴᖃᕐᑎᓯᐊᕐᓗᒋᑦ ᐊᐅᓚᑦᓯᓂᖏᑦ ᐅᑎᕆᐊᕐᕕᖃᖃᑦᑕᓂᒃᑯᑦ KEAC-ᑯᑦ ᐊᐅᓚᑦᓯᓂᕐᒧᑦ ᑐᕌᒐᕆᔭᖏᓐᓂᒃ ᐊᒻᒪᓗ ᐊᑐᐃᓐᓇᕈᕐᑎᖃᑦᑕᓗᒋᑦ ᓴᕐᕿᑎᖃᑦᑕᓗᒋᓗ ᑕᕐᕿᑕᒫᑦ ᑮᓇᐅᔭᕐᑐᓂᕐᒧᑦ ᑐᓴᕐᑎᓯᐅᑎᖏᑦ ᐊᐅᓚᑦᓯᓂᓕᕆᓂᐅᑉ ᑲᑎᒪᔨᒋᐊᓪᓚᖁᑎᖏᓐᓄᑦ.

• ᐊᑐᓕᕐᑎᑕᐅᑎᑦᓯᐊᖃᑦᑕᓗᒋᑦ KEAC-ᑯᑦ ᐱᓇᓱᑦᑎᓕᕆᓂᐅᑉ ᒪᓕᒐᖏᑦ.

• ᐃᓚᐅᖃᑦᑕᓗᓂ ᐱᒋᐊᖕᖓᕈᑎᓕᐅᕐᓂᒥᒃ, ᐅᖃᐅᓯᐅᑉ ᐁᑉᐸᖓᓅᔭᕐᑕᐅᓂᖏᓐᓂᒃ, ᑕᒻᒪᓯᒪᔪᕐᓂᐊᓂᕐᒥᒃ ᐊᒻᒪᓗ ᐁᑦᑐᑐᐃᖃᑦᑕᓗᓂ ᐊᑦᔨᒌᖕᖏᑐᓂᒃ ᐊᓪᓚᓯᒪᔪᓂᑦ ᐆᑦᑑᑎᒋᓗᒋᑦ KEAC-ᑯᑦ ᐊᕐᕌᒍᑕᒫᑦ ᑐᓴᕐᑎᓯᒍᑎᖏᓐᓂᒃ, ᐊᓪᓚᓯᒪᔪᖏᓐᓂᒃ, ᓀᓈᕐᑐᓂᒃ ᐅᖃᐅᓯᑦᑕᓂᒃ, ᑲᑎᒪᐅᑎᕕᓂᕐᓂᒃ ᐊᒻᒪᓗ ᐊᓯᖏᓐᓂᒃ ᐱᓪᓗᑯᑦᑐᓕᕆᓂᕐᒨᓕᖓᔪᓂᒃ ᐊᓪᓚᓯᒪᔪᓂᒃ.

• ᓈᒻᒪᓈᕐᑐᑯᑦ ᐊᐅᓚᑦᓯᓂᓕᕆᔭᐅᑎᑦᓯᓯᐊᖃᑦᑕᓗᓂ ᑐᓴᕐᑎᓯᐅᑎᑦᓴᓂᒃ ᓴᓇᔭᐅᔪᕕᓂᕐᓂᒃ, ᓄᐊᑕᕕᓂᕐᓂᒃ, ᐅᕝᕙᓘᓐᓃᑦ ᐊᑐᕐᑕᐅᔪᕕᓂᕐᓂᒃ KEAC-ᑯᑦ ᐊᓪᓚᑎᒻᒪᕆᖓᑕᓗ, ᐃᓚᒋᔭᐅᑎᓪᓗᒋᑦ ᐱᕕᑦᓴᖃᕐᑎᓯᓃᑦ, ᓄᑕᐅᓯᓕᕐᑎᕆᓃᑦ, ᑲᒪᒋᔭᖃᐃᓐᓇᓃᑦ, ᐊᓪᓚᓯᒪᔪᖃᐅᑎᒨᔦᓃᑦ, ᐃᒋᑦᓯᓃᑦ ᓴᐳᑦᔨᓃᓪᓗ ᑐᓴᕐᑎᓯᐅᑎᑦᓴᓂᒃ ᒪᓕᓪᓗᒋᑦ ᖃᓄᐃᑦᑐᔭᐅᓂᖏᑦ ᐃᑉᐱᒋᑦᓯᐊᕆᐊᖃᕐᓂᖏᓪᓗ.

• ᓄᑕᐅᓯᓕᖃᑦᑕᓗᒋᑦ ᑲᒪᒋᖃᑦᑕᓗᒋᓗ ᐃᓗᓕᖏᑦ KEAC-ᑯᑦ ᖃᕆᑕᐅᔭᒃᑯᑦ ᐅᐸᑦᑕᐅᑲᑦᑕᕕᖓ, ᐃᓚᒋᔭᐅᑎᓪᓗᒋᑦ ᐊᑦᑕᓀᓪᓕᑎᖃᑦᑕᓗᒋᑦ ᐱᓇᓱᑦᑏᑦ ᖃᕆᑕᐅᔭᒃᑯᑦ ᐊᑐᓲᕆᔭᖏᑦ ᐊᒻᒪᓗ ᑐᓴᐅᒪᖃᑎᒌᓐᓂᒥᒃ ᖃᓄᕐᑑᕆᓂᖅ.

• ᑰᑦᔪᐊᒦᑦᑐᖅ ᐊᓪᓚᕕᒃ ᐱᓇᓱᒍᑎᖏᑦ ᐱᑕᖃᕆᐊᖃᕐᓂᖏᑦ ᐱᑕᖃᕐᑏᓇᖃᑦᑕᓗᒋᑦ ᐊᒻᒪᓗ ᐱᖁᑎᖏᑦ ᐊᑐᑦᓯᐊᕈᓐᓇᑑᑎᖃᑦᑕᓗᒋᑦ.

• ᐱᓇᓱᐊᖃᑦᑕᓗᒋᑦ ᐊᓯᖏᑦ ᐱᔭᑦᓴᐅᑎᑕᐅᔪᑦ ᑎᓕᔨᒍᑕᐅᓯᒪᓂᖏᑦ ᑲᑎᒪᔨᖏᓐᓄᑦ KEAC-ᑯᑦ.

ᐱᒍᓐᓇᐅᑎᒋᒋᐊᓕᖏᑦ

• ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕇᕐᓯᒪᓗᓂ ᐅᕝᕙᓗᓘᓐᓃᑦ ᓇᓪᓕᖁᐊᖓᓂᒃ ᐅᕝᕙᓘᓐᓃᑦ ᐊᑦᔨᐸᓱᖓᓂᒃ ᐱᓇᓱᒐᖃᕐᓯᒪᓗᓂ.

• ᐃᑭᓐᓂᐸᐅᑎᓪᓗᒋᑦ ᒪᕐᕉᒃ (2) ᐊᕐᕌᒎᒃ ᐱᓇᓱᑦᓯᒪᓂᖏᑦ ᐊᐅᓚᑦᓯᓂᓕᕆᓂᕐᒥᒃ.

• ᐊᓪᓚᓯᒪᔪᒃᑯᑦ ᐅᖃᓕᒪᒍᓐᓇᓂᒃᑯᓗ ᐱᓇᓱᒍᓐᓇᓗᓂ ᒪᕐᕉᓴᓚᐅᕐᐸᓃᒃ (2) ᐅᑯᐊ ᐅᖃᐅᓰᑦ ᐅᖃᕈᓐᓇᑕᖏᑦ: ᐃᓄᒃᑎᑐᑦ, ᖃᓪᓗᓈᑎᑐᑦ ᐅᐃᒍᐃᑎᑐᓪᓘᓃᑦ.

• ᖃᐅᔨᒪᓂᖃᑦᓯᐊᓗᓂ ᐱᓇᓱᒍᑎᓂᒃ ᖃᕆᑕᐅᔭᓕᕆᐅᑏᑦ ᓴᓇᕐᕈᑎᖏᓐᓂᒃ ᐆᑦᑑᑎᒋᓗᒋᑦ Microsoft, Adobe ᐊᒻᒪᓗ ᖃᕆᑕᐅᔭᒃᑯᑦ ᑲᑎᒪᓃᑦ ᐅᓪᓗᓕᐅᕈᑎᖏᑦᑕ ᓴᓇᕐᕈᑎᖏᑦ.ᐆ

• ᐃᒻᒥᓂᕐᓱᕈᓐᓇᓯᐊᕐᓗᓂ ᐱᓇᓱᒐᕐᒥᓂᒃ, ᐃᓂᓪᓚᑎᕆᒍᓐᓇᓂᖓ ᐱᒍᓐᓇᓂᖃᑦᓯᐊᓗᓂ.ᐆ

ᓇᓃᓐᓂᖓ ᐱᓇᓱᒐᐅᑉ : ᑰᑦᔪᐊᖅ(ᐊᓯᐊᓃᓪᓗᓂ ᐅᖓᓯᒃᑐᒥ ᐱᓇᓱᒍᓐᓇᕕᓕᒃ ᑯᑦᔪᐊᒨᖃᑦᑕᓗᓂ)

ᑮᓇᐅᑦᔭᓵᖏᑦ

ᖃᓄᐃᓕᖓᐅᓯᖏᓪᓗ: ᐃᑭᓐᓂᐸᐅᑎᓪᓗᒋᑦ: $56,000 ᐊᕐᕌᒍᑕᒫᑦ; ᐊᒥᓲᓂᕐᓴᐅᑎᓪᓗᒋᑦ $78,400 ᐊᕐᕌᒍᑕᒫᑦ/ 35 ᑫᕙᓪᓚᒍᓰᑦ ᐱᓇᓱᐊᕈᓯᑕᒫᑦ ᓄᓇᕕᒻᒦᓚᖓᒍᓂ,

ᐊᓯᖏᑦ ᐱᕚᓪᓕᖁᑎᑦᓴᐃᑦ: ᓄᓇᕕᒻᒦᓚᖓᒍᓂ, ᐊᑭᑐᓂᕐᓴᒥᐅᖑᒍᑏᑦ ᑐᖕᖓᕕᒋᓗᒋᑦ KEAC-ᐱᓇᓱᑦᑎᓕᕆᓂᐅᑉ

ᒪᓕᒐᖏ

ᐃᑦᑑᒍᑎᑖᕐᑕᕈᑏᑦ: 6% ᐱᓇᓱᑦᑎᓯᔨ, 4% ᐱᓇᓱᑦᑎ

ᕿᑲᑫᓐᓇᓃᑦ: 20 ᐅᓪᓗᐃᑦ ᐊᕐᕌᒍᑕᒫᑦ

ᕿᑲᕐᓇᐃᑦ: 20 ᐅᓪᓗᐃᑦ ᐊᕐᕌᒍᑕᒫᑦ, ᐃᓚᐅᑎᓪᓗᒋᑦ 10 ᕿᑎᖕᖒᓂᖓᓂᒃ

ᑐᓂᓗᒋᑦ ᐱᓇᓱᒐᕐᑖᒐᓱᐊᕈᑎᑎᑦ ᖃᕆᑕᐅᔭᒃᑯᑦ ᑎᑭᓚᐅᕐᑎᓇᒍᑦ ᓅᕕᒻᐱᕆ 30, 2026 ᐅᕗᖓ: keac-ccek@gmail.com

KEAC-ᑯᑦ ᓇᓪᓕᖁᐊᒌᑦᑐᒥᒃ ᐱᕕᑦᓴᖃᕐᑎᓯᔨᐅᕗᑦ ᐱᓇᓱᑦᑎᓯᔨᐅᓂᒃᑯᑦ. ᒪᓕᑦᓱᒋᑦ ᑖᒃᑯᐊ ᐊᒻᒪᓗ ᐊᖏᖃᑎᒌᒍᑎᒃ, ᖃᓄᐃᓕᖓᐅᓯᖏᑦ ᐊᑦᔨᐅᖏᑦᑑᑐᐃᓐᓇᕆᐊᓖᑦ ᖁᕝᕙᒋᐊᕆᒐᓱᐊᕐᓂᒧᑦ ᐱᓇᓱᑦᑎᑖᒐᓱᐊᕐᓂᒥᒃ ᐃᓄᑐᐃᓐᓇᓂᒃ.

ᑌᒃᑯᐊ ᑭᓯᐊᓂ ᑎᒃᑯᐊᑕᐅᓯᒪᔪᑦ ᐊᐱᕆᐅᔭᕐᑕᐅᓂᕐᒧᑦ ᖃᐅᔨᒋᐊᕐᕕᐅᒐᔭᕐᑐᑦ.