ᐳᓖᓰᑦ ᐊᖓᔪᕐᖃᖓᑕ ᑐᖓᓕᐊᓄᑦ ᑐᑭᒧᐊᑦᑎᓯᔨ ᐊᐅᓚᑦᓯᓂᓕᕆᓂᕐᒥᒃ - NPS - KRG

ᐱᓇᓱᒐᖅ ᐊᑐᐃᓐᓇᐅᓕᕐᒥᔪᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG) ᓄᓇᓕᓕᕆᕕᒻᒪᕆᐅᑦᓱᓂ ᑎᒥᐅᔪᖅ ᑲᒪᒋᔭᖃᕐᓱᓂ ᓄᓇᒥᒃ ᑯᐯᒻᒥ ᓄᓇᖕᖑᐊᒥ 55 ᐃᑳᖓᔪᑉ ᖁᓛᓕᒫᖓᓃᑦᑐᒥᒃ.  KRG ᒪᓐᓇᐅᑎᓪᓗᒍ ᐱᓇᓱᑦᑎᓴᕐᓯᐅᓕᕆᕗᖅ ᐱᓇᓱᑦᑎᒪᕆᒻᒥᒃ ᑲᑦᓱᙰᑦᑐᓯᐊᒥᒃ ᐆᒥᖓ ᐱᓇᓱᒐᖃᕐᓗᓂ:

ᐳᓖᓰᑦ ᐊᖓᔪᕐᖃᖓᑕ ᑐᖓᓕᐊᓄᑦ ᑐᑭᒧᐊᑦᑎᓯᔨ ᐊᐅᓚᑦᓯᓂᓕᕆᓂᕐᒥᒃ

(ᐱᓇᓱᒐᖅ ᐊᑌᓐᓇᑐᖅ)

ᐊᖓᔪᖄᖃᕐᓗᓂ ᐳᕐᑐᓂᕐᓴᒥᒃ ᐊᐅᓚᑦᓯᓂᓕᕆᓂᕐᒥ ᑐᑭᒧᐊᑦᑎᓯᔨᒥᒃ, ᑖᓐᓇ ᑐᑭᒧᐊᑦᑎᓯᔨ ᐊᐅᓚᑦᓯᓂᓕᕆᓂᕐᒥᒃ ᐃᑲᔪᕐᑎᐅᓚᖓᔪᖅ ᐳᓖᓰᑦ ᐊᖓᔪᕐᖄᖓᑕ ᑐᖓᓕᐊᓂᒃ ᐊᐅᓚᑦᓯᓯᐊᕐᓗᓂ ᐱᓇᓱᐊᕐᓃᑦ ᐅᓪᓗᖁᑎᖏᓐᓂᒃ, ᑐᓴᐅᒪᑎᑦᓯᒍᑎᓂᒃ ᐊᓪᓚᓯᒪᔪᐃᓪᓗ ᓄᐃᑎᕐᑕᐅᓂᖓᓂᒃ.  ᑖᓐᓇ ᐱᓇᓱᒐᖅ ᐃᓚᖃᕐᒥᔪᖅ ᑐᑭᒧᐊᑦᑎᓯᒋᐊᖃᕐᓂᒥᒃ ᐸᕐᓇᕈᑕᐅᔪᓂᒃ ᑲᑎᒪᓂᕐᓅᓕᖓᑦᓱᑎᒃ ᐊᐅᓪᓚᑲᑦᑕᕆᐊᖃᕐᓂᒧᓪᓗ, ᐱᑐᑦᓯᒪᑎᑦᓯᔨᐅᓗᓂ ᐊᒥᓱᐃᓂᒃ ᐱᓇᓱᐊᕐᕕᐅᑉ ᐃᓗᐊᓂ ᓯᓚᑖᓂᓗ ᐱᓇᓱᐊᖃᑕᐅᔪᑦᓴᔭᓂᒃ, ᐃᑉᐱᒋᔭᖃᑦᓯᐊᖃᑕᐅᓗᓂ ᐃᕐᐸᑎᒐᑦᓴᔭᐅᖕᖏᑐᓂᒃ ᖃᐅᔨᒪᐅᒋᐊᖃᖕᖏᑐᑦᓴᔭᓂᓪᓗ ᓇᐅᓕᒫᑦ ᐊᑦᑕᓇᕐᑐᒦᑦᑌᓕᒋᐊᖃᕐᓂᖏᓐᓅᓕᖓᔪᓂᒃ, ᐃᑉᐱᒍᓱᑦᓯᐊᕆᐊᖃᕐᓇᑐᔪᓂᒃ ᑲᒪᒋᔭᖃᑦᓯᐊᕆᐊᖃᕐᑐᓂᓪᓗ.  ᐱᓇᓱᑦᑎᑖᖑᔪᖅ ᒪᓕᑦᑕᐅᑫᑦᓯᐊᕆᐊᓕᒃ ᒪᓕᒐᕐᓂᒃ ᐱᓇᓱᐊᕈᑎᑦᓴᐅᒋᐊᓕᓐᓂᓗ; ᐊᕐᕕᑕᕈᓐᓇᓗᓂᓗ ᐃᓚᖃᕐᓗᓂ ᐳᓖᓰᑦ ᐊᖓᔪᕐᖄᖓᑕ ᑐᖓᓕᐊᓂᒃ ᐃᓚᐅᕕᖃᕐᓗᓂᓗ ᑲᔪᓯᔪᒃᑯᑦ ᐱᐅᓯᓕᑎᕐᑕᐅᒐᓱᐊᕐᓂᖏᓐᓄᑦ ᐊᐅᓚᑦᓯᓂᓕᕆᓂᕐᒨᓕᖓᔪᐃᑦ.

ᐱᓇᓱᐊᓪᓚᕆᓚᖓᔭᖏᑦ

·       ᑲᒪᒋᔭᖃᕐᓗᓂ ᐳᓖᓰᑦ ᐊᖓᔪᖃᖓᓄᑦ ᑐᖓᓕᐅᑉ ᐅᓪᓗᖁᑎᒋᒋᐊᓕᖏᓐᓂᒃ, ᖃᕆᑕᐅᔭᒃᑯᑦ ᐊᓪᓚᑖᖏᓐᓂᒃ, ᐅᐸᐅᑎᖃᑦᑕᕆᐊᓕᖏᓐᓂᒃ, ᐱᓇᓱᐊᕐᕕᐅᓗ ᐃᓗᐊᓂ ᓯᓚᑖᓂᓗ ᑐᓴᐅᒪᖃᑎᖃᕆᐊᖃᕐᓂᒥᒃ

·       ᐊᑐᐃᓐᓇᕈᕐᑎᕆᓗᓂ, ᕿᒥᕐᕈᓗᓂ ᑲᒪᒋᔭᖃᕐᓗᓂ ᐊᓪᓚᓯᒪᔪᓂᒃ, ᑐᑭᓯᒪᑎᓯᒍᑎᑦᓴᔭᓂᒃ, ᑐᑭᒧᐊᒍᑎᓂᒃ, ᑲᑎᒪᐅᑎᕕᓂᕐᓂᒃ, ᑐᓴᕐᑎᓯᐅᑎᓕᐊᓂᓪᓗ

·       ᑐᑭᒧᐊᑦᑎᓯᓗᓂ ᐸᕐᓇᑕᐅᒍᑎᖏᓐᓂᒃ ᑲᑎᒪᓃᑦ, ᑲᑎᑦᑕᑎᐊᐲᑦ, ᐊᐅᓚᓂᐅᒋᐊᓖᑦ, ᐅᐸᐅᑎᔭᐅᓪᓚᕆᒋᐊᓖᓪᓗ, ᖃᖓᑦᑕᐅᑏᑦ ᓯᓂᑦᑕᐅᑏᓪᓗ ᐊᕐᕿᓱᖃᑦᑕᒥᓗᒋᑦ

·       ᐃᑲᔪᕐᓗᓂ ᐳᓖᓰᑦ ᐊᖓᔪᖃᖓᑕ ᑐᖓᓕᖓᓂᒃ ᑲᒪᒋᐊᖃᓕᕐᐸᑦ ᐅᐃᒪᓇᕐᑐᓂᒃ ᐃᑉᐱᒋᓪᓗᑯᒋᐊᓕᓐᓂᓗ, ᐃᓚᒋᔭᐅᑎᓪᓗᒍ ᑐᓴᐅᒪᔭᐅᒋᐊᓕᓐᓂᒃ ᓄᐃᑎᕆᑦᓯᐊᕆᐊᖃᕐᓂᖅ .

·       ᑲᒪᖃᑦᑕᓗᓂ ᐃᓂᓪᓚᑎᕆᖃᑦᑕᓗᓂᓗ ᓇᐅᓕᒫᓄᑦ ᖃᐅᔨᒪᔭᐅᒋᐊᖃᖕᖏᑐᑦᓴᔭᓂᒃ ᐊᐅᓚᑦᓯᓂᓕᕆᓂᕐᒨᓕᖓᔪᓂᒃ ᐳᓖᓰᑦ ᐊᖓᔪᕐᖃᖓᓄᑦ ᑐᖓᓕᐅᑉ ᐊᓪᓚᕕᖓᓂ

·       ᐱᑐᑦᓯᒪᑎᑦᓯᔨᐅᓗᓂ ᐳᓖᓰᑦ ᐊᖓᔪᕐᖃᖓᓄᑦ ᑐᖓᓕᐅᑉ ᐊᓪᓚᕕᖓᓂᒃ ᐊᓯᖏᓐᓄᑦ ᐱᓇᓱᐊᕐᕕᐅᑉ ᐃᓗᐊᓂ ᐱᓇᓱᐊᖃᑎᑦᓴᔭᐅᔪᓄᓪᓗ, ᑎᓕᔭᐅᒍᑎᒥᒍᑦ

·       ᐊᐅᓪᓚᑲᑦᑕᖃᑦᑕᓗᓂ, ᖁᔭᐅᓕᕈᓂ, ᐃᓚᒋᓗᒍ ᐳᓖᓰᑦ ᐊᖓᔪᕐᖃᖓᑕ ᑐᖓᓕᖓ ᑲᑎᒪᒋᐊᓕᕐᐸᑦ, ᓱᓇᓱᐊᕐᑐᓕᐊᓕᕐᐸᑦ, ᑲᑎᒪᓂᒻᒪᕆᓐᓃᒋᐊᖃᓕᕐᐸᑦ ᐊᓯᖏᓐᓂᓗ ᓱᓇᓱᐊᕐᓂᐅᔪᓂ

·       ᐊᑐᕐᑕᐅᑎᑦᓯᓯᐊᕐᓗᓂ ᐱᖁᔭᕐᓂᒃ, ᑐᑭᒧᐊᑦᑎᓯᒍᑎᓂᒃ, ᒪᓕᒐᕐᓂᒃ, ᐱᓇᓱᐊᕈᑎᓂᒃ ᐊᐅᓚᑦᓯᓂᓕᕆᓂᕐᒨᓕᖓᔪᓂᓪᓗ ᐳᓖᓯᓕᕆᓂᕐᒥ

·       ᓄᐊᑦᓯᖃᑦᑕᓗᓂ ᑭᓯᑦᓯᒍᑎᓕᕆᐅᑎᓂᒃ, ᓄᐃᑎᕆᓗᓂ ᑐᑭᓯᓇᕐᑎᓯᒍᑎᓂᒃ ᑐᓴᕐᑎᓯᐅᑎᓂᓪᓗ

·       ᐃᑲᔪᕐᓯᒪᓗᓂ ᑲᔪᓯᔪᒥᒃ ᐱᐅᓯᓕᑎᕐᑕᐅᒐᓱᐊᕐᑎᓗᒋᑦ ᐊᐅᓚᑦᓯᓂᓕᕆᓂᕐᒨᓕᖓᔪᑦ ᑲᒪᒋᔭᖃᕆᐊᕐᓂᒨᓕᖓᔪᐃᓪᓗ

·       ᑲᒪᒋᔭᖃᕐᓗᓂ ᐊᓪᓚᕕᒻᒥ ᐱᓇᓱᒍᑎᑦᓴᔭᓂᒃ ᐱᐅᒃᑯᑎᓂᒃ

·       ᐊᓯᖏᓐᓂᓗ ᐱᓇᓱᐊᕈᓐᓇᓗᓂ ᖁᔭᐅᓕᑐᐊᕈᓂ ᑭᖕᖑᒪᒋᔭᖏᑎᒍᑦ ᐳᓖᓰᑦ ᐱᒍᑦᔨᕕᖓᑕ

ᐱᔪᓐᓇᓂᕆᒋᐊᓕᖏᑦ:

·       ᐱᓇᓱᑦᑎᒪᕆᐅᓂᕐᒧᑦ, ᐃᓕᓐᓂᐊᕕᒻᒥ ᐳᕐᑐᓂᕐᓴᒋᐊᓪᓚᒥ ᐃᓕᓐᓂᐊᕕᕐᔪᐊᒥᓗᓐᓃᑦ ᐱᔭᕆᕐᓯᒪᐅᑎᖃᕐᓗᓂ ᑕᑦᓱᒧᖓ ᐱᓇᓱᒐᕐᒨᓕᖓᔪᒥᒃ; ᐊᓯᒋᐊᓪᓚᖏᑦ ᐱᔪᓐᓇᓂᕆᒋᐊᓕᖏᑦ ᐱᓇᓱᐊᓕᓂᐅᒍᑎᖏᓪᓘᓃᑦ ᐊᓪᓚᕕᒻᒥ ᐊᐅᓚᑦᓯᓂᓕᕆᓂᕐᒥ ᐃᓱᒪᒋᔭᐅᑦᓯᐊᓚᖓᔪᑦ ᐊᑑᑎᖃᕐᓂᖏᑦ

·       ᐃᓕᓐᐊᓯᒪᑎᒋᓂᖓ, ᐱᒋᐅᕐᓴᓯᒪᓂᖓ ᐱᓇᓱᐊᓕᓂᐅᓂᖓᓗ ᐃᓱᒪᒋᔭᐅᑦᓯᐊᓚᖓᔪᖅ

·       ᓯᑕᒪᓂᒃ (4) ᐊᕐᕋᒍᓂᒃ ᑌᒣᑦᑐᒥ ᐱᓇᓱᐊᓕᓂᐅᒋᐊᓕᒃ

·       ᐸᕐᓇᕈᓐᓇᓯᐊᕐᓗᓂ ᐃᓂᓪᓚᑎᕆᒍᓐᓇᓯᐊᕐᓗᓂᓗ, ᑐᑭᓯᓇᑦᓯᐊᕈᑎᓂᒃ ᐃᑉᐱᒋᔭᖃᕐᓗᓂ, ᐱᓇᓱᐊᕈᓐᓇᓯᐊᕐᓗᓂ ᐅᐃᒪᓇᕐᑐᒥ, ᓯᕗᓪᓕᐸᐅᑦᔭᐅᔪᑦᓴᓂᒃ ᓄᐃᑎᕆᒍᓐᓇᓗᓂ ᐱᔭᕆᕐᓯᒪᒋᐊᓕᓐᓂᓗ ᐱᔭᕆᑦᓯᐊᕈᓐᓇᓗᓂ

·       ᐊᓪᓚᒍᓐᓇᓯᐊᕐᓗᓂ ᐅᖃᕈᓐᓇᓯᐊᕐᓗᓂᓗ ᖃᓪᓗᓈᑎᑐᑦ ᒍᐃᒍᐃᑎᑐᓪᓗ; ᐃᓄᑦᑎᑑᕈᓐᓇᓂᖓ ᐱᐅᔫᒐᔭᕐᒥᔪᖅ

·       ᖃᐅᔨᒪᔭᖃᑦᓯᐊᕆᐊᓕᒃ ᖃᕆᑕᐅᔭᒃᑯᑦ ᐱᓇᓱᒍᑕᐅᓲᒥᒃ Microsoft Office Suite

·       ᐊᑐᐃᓐᓇᒋᐊᓕᒃ ᐊᐅᓪᓚᑲᑦᑕᖁᔭᐅᓕᕈᓂ

·       ᐱᓇᓱᐊᓕᓂᐅᒋᐊᓕᒃ ᑲᒪᒋᔭᖃᕐᓂᒥᒃ ᓇᐅᓕᒫᓄᑦ ᐃᕐᐸᑎᒐᑦᓴᔭᐅᖕᖏᑐᓂᒃ

·       ᐱᓇᓱᐊᓕᓂᐅᒋᐊᓕᒃ ᓇᐅᓕᒫᑦ ᐊᑦᑕᓇᕐᑐᒥᑦᑎᑕᐅᑦᑌᓕᓂᖓᓂ, ᑲᕙᒪᒥ ᐳᓖᓯᓕᕆᓂᕐᒥᓗᓐᓃᑦ (ᐱᒻᒪᕆᐅᓂᕐᐹᖅ)

ᐱᓇᓱᐊᕐᕕᖓ: ᐊᓪᓚᕕᒻᒦᖃᑦᑕᓗᓂ ᐅᖓᓯᑦᑐᒦᓪᓗᓂᓗᓐᓃᖅ

ᑮᓇᐅᔭᓵᖏᑦ ᐱᕙᓪᓕᖁᑏᓪᓗ

·       ᐅᓄᕐᓂᐹᖓ ᐊᕐᕋᒍᓕᒫᒥ: $107,846

·       RRSP ᐅᑭᐅᖏᑦ ᓈᒻᒪᓯᑉᐸᑕ ᐱᓇᓱᒍᓐᓀᕋᔭᕐᓂᒥᓅᓕᖓᔪᓂᒃ: 7% ᐱᓇᓱᕝᕕᐅᑉ ᐃᓚᒋᐊᕈᑎᖏᑦ

·       ᐊᒥᓱᐃᑦ ᐃᒻᒪᖃᐅᑎᖃᕈᑎᖏᑦ (ᑭᒍᑎᓕᕆᔭᐅᒍᑏᑦ, ᐃᔭᐅᑎᑖᕈᑏᑦ, ᐋᓐᓂᐊᓯᐅᕐᑕᐅᒍᑎᓅᓕᖓᔪᑦ)

·       ᓂᕆᒍᑏᑦ ᑮᓇᐅᔭᕐᑐᕈᑏᓪᓗ ᐊᑭᓕᕐᑕᐅᔪᑦ ᓄᓇᕕᒻᒥ ᐊᕐᕕᑕᓕᕐᐸᑦ (ᖃᐅᑕᒪᕐᓯᐅᑏᑦ)

·       ᕿᑲᕈᓐᓇᑐᖅ: 30-ᓂᒃ ᐅᓪᓗᓂᒃ ᐊᕐᕋᒍᑕᒫᑦ

·       ᐊᕐᕌᒎᑉ ᐃᓗᐊᓂ ᓇᓪᓕᐅᓂᕐᓯᐅᓀᑦ:  20 ᐅᓪᓗᐃᑦ ᐃᓚᖃᕐᓗᑎᒃ 10-ᓂᒃ ᖁᕕᐊᓱᕝᕕᓯᐅᕐᓇᐅᓕᕐᐹᑦ.

ᑭᓇᐅᓂᕐᓂᒃ ᐱᓇᓱᐊᕐᓯᒪᔭᑎᓐᓂᓗ ᓄᐃᑕᑎᑦᓯᒍᑎᒃ ᑐᓂᓗᒍ ᐅᕗᖓ HR@nunavikpolice.ca ᐊᐅᒡᒎᓯ 30, 2026-ᖑᓚᐅᕐᑎᓇᒍ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG) ᐊᑦᔨᒋᑦᑎᓯᓂᕐᒥᒃ ᐱᓇᓱᒐᕐᑎᒍᑦ ᑐᖕᖓᕕᖃᕐᑐᖅ.   ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᒍᑎᖓᒍ,  ᐱᓇᓱᒐᕐᒥ ᐱᕙᓪᓕᖁᑎᑖᖑᔪᑦ ᐋᕐᕿᒋᐊᕐᑕᐅᒪᒍᓯᖃᕈᓐᓇᑐᑦ ᐃᓄᑐᐃᓐᓀᑦ ᐱᓇᓱᑦᑎᑖᖑᑦᓯᐊᓕᐅᒥᖁᓪᓗᒋᑦ.

ᐱᓇᓱᒐᕐᑖᕋᓱᐊᕐᑐᑦ ᖃᐅᔨᑎᑕᐅᒐᔭᕐᑐᑦ ᐊᐱᕐᓲᔭᕐᑕᐅᒋᐊᖃᕈᑎᑭᓯᐊᓂ.