ᐊᐅᓚᑦᓯᓂᓕᕆᓂᕐᒥᒃ ᐱᓪᓗᑯᒋᐊᓕᓕᕆᔨ - KRG

ᐱᓇᓱᒐᑦᓴᖅ ᐊᑐᐃᓐᓇᐅᓕᕐᒥᔪᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ (ᑫᐋᔩ), ᐊᒥᓱᐃᓂᒃ ᑭᒡᒐᑐᕈᑎᖃᕐᓱᓂ ᑎᒥᐅᕗᖅ ᐊᐅᓚᑦᓯᕕᖃᕐᓱᓂᓗ ᑯᐯᑉ ᓄᓇᖓᓂ ᑕᕐᕋᒦᑦᑐᒥ 55 ᓇᑉᐸᖓᑕ ᖁᓛᓂ. ᓄᓇᕕᒻᒥ ᐳᓖᓰᑦ ᐱᒍᑦᔨᔨᖏᑦ (NPS) ᓄᓇᓕᓕᒫᓂ ᐳᓖᓯᖃᕐᑎᓯᔪᖅ ᓄᓇᕕᒻᒥ. NPS-ᑯᑦ ᕿᓂᕐᑐᑦ:

ᐊᐅᓚᑦᓯᓂᓕᕆᓂᕐᒥᒃ ᐱᓪᓗᑯᒋᐊᓕᓕᕆᔨ

(ᐊᑕᓚᐅᕐᑐᑐᖅ, ᐅᓪᓗᑕᒫᕐᓯᐅᑎ)

ᑲᒪᔨᖃᕐᓗᓂ ᓄᓇᕕᒻᒥ ᐳᓖᓯᒃᑯᑦ ᐱᒍᑦᔨᔨᖓᑕ (NPS) ᓯᕗᓕᕐᑎᖓᓂᒃ, ᐊᐅᓚᑦᓯᓂᓕᕆᓂᕐᒥᒃ ᐱᓪᓗᑯᒋᐊᓕᓕᕆᔨ ᑲᒪᒋᔭᖃᕆᐊᓕᒃ ᒪᑯᓂᖓ:

• ᐱᓇᓱᐊᖃᑦᑕᓗᓂ ᓇᐅᓕᒫᓂᒃ ᐊᓪᓚᕕᒻᒥ ᐱᔭᑦᓴᒥᓂᑦ ᐆᑦᑑᑎᒋᑦᓱᒍ ᐊᑐᐃᓐᓇᕈᕐᑎᕆᓂᖅ ᐊᓪᓚᖁᑎᓂᑦ, ᐊᓪᓚᖃᐅᑎᒨᔦᓂᖅ, ᖃᕆᑕᐅᔭᒨᔦᓂᖅ, ᐊᑦᔨᓕᐅᕆᓂᖅ, ᐊᒻᒪᓗ ᑎᑭᓭᓂᖅ ᐱᓇᓲᑎᓂᑦ.

• ᑲᒪᒋᓗᒋᑦ ᐁᑦᑐᑑᑎᒋᓗᒋᓗ ᑎᑭᑦᑐᕕᓃᑦ ᐊᐅᓪᓚᑎᒋᐊᓖᓪᓗ ᐊᓪᓓᑦ, ᑐᕌᕈᑎᕕᓃᑦ, ᐊᒻᒪᓗ ᐱᓇᓱᕝᕕᐅᑉ ᐃᓗᐊᓂ ᑐᓴᐅᒪᖃᑎᒌᓐᓃᑦ.

• ᖃᐅᔨᑎᑦᓯᒍᑎᓂᑦ ᐃᓕᐅᕐᙯᓗᓂ ᓄᑕᐅᓯᓕᕐᑎᕆᓗᓂᓗ ᐳᓖᓯᒃᑯᑦ ᐊᓪᓚᓯᒪᔪᒃᑯᕕᖏᓐᓄᑦ, ᓱᓕᑦᓯᐊᑑᑎᓪᓗᒋᑦ ᐊᒻᒪᓗ ᖃᐅᔨᒪᔭᐅᑎᑦᓯᒍᓐᓀᓗᓂ.

• ᐃᓂᓪᓚᖓᑎᖃᑦᑕᓗᒋᑦ ᓄᑕᐅᓯᓕᕐᑐᖃᑦᑕᓗᒋᓪᓗ ᖃᕆᑕᐅᔭᑎᒍᑦ ᐊᒻᒪᓗ ᐱᓇᓱᕝᕕᒥ ᐊᓪᓚᖃᐅᑏᑦ ᐋᕐᕿᓯᒪᐅᓯᖏᑦ.

• ᑭᐅᖃᑦᑕᓗᓂ ᐅᖄᓚᐅᑎᒥᒃ, ᐅᖄᓚᐅᓯᐅᔪᓂᑦ ᓄᐊᑦᓯᖃᑦᑕᓗᓂ, ᐊᒻᒪᓗ ᐅᖄᓚᕕᐅᔪᒥᒃ ᑐᕌᕐᑎᓯᖃᑦᑕᓗᓂ.

• ᐳᓛᕆᐊᕐᑐᓂᒃ ᑐᖕᖓᓱᑦᑎᓯᓗᓂ ᐃᑲᔪᕐᓗᒋᓪᓗ ᐅᐸᑦᑕᖏᓐᓄᑦ ᑐᕌᕐᑎᓯᓗᓂ ᐱᓇᓱᕝᕕᐅᔪᒧᓪᓘᓃᑦ.

• ᓄᐊᓪᓗᒋᑦ ᖃᐅᔨᓴᕐᓗᒋᓪᓗ ᑕᑕᕐᓴᒉᑦ ᐆᑦᑑᑎᒋᑦᓱᒍ ᑫᕙᓪᓚᒍᓯᓕᐊᕕᓃᑦ, ᓂᐅᕕᕈᑎᕕᓃᑦ ᐊᓪᓚᓯᒪᔪᖏᑦ, ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑏᑦ, ᐊᑦᑕᑐᒉᑦ, ᑐᑦᓯᕋᐅᑎᕕᓃᑦ, ᐊᒻᒪᓗ ᑮᓇᐅᔦᑦ ᓱᖏᕐᑑᑏᑦ ᑐᑦᓯᕋᐅᑎᐅᔪᑦ, ᐊᒻᒪᓗ ᑲᒪᒋᖃᑦᑕᓗᒋᑦ ᑐᓂᕐᕈᑎᐅᑦᓯᐊᓂᖏᑦ ᑲᒪᒋᔭᐅᑦᓯᐊᓂᖏᓪᓗ ᓈᒻᒪᓈᑦᓯᐊᑐᒥᒃ.

• ᐊᐅᓚᑦᓯᓂᓕᕆᐅᓰᑦ ᐊᐅᓚᑕᐅᒍᓯᖏᑦ ᐊᓪᓚᕕᒻᒥ ᑲᒪᒋᓗᒋᑦ ᐅᓪᓗᑕᒫᕐᓯᐅᑏᑦ.

• ᐱᓇᓱᐊᖃᑦᑕᒥᓗᓂ ᐊᓯᖏᓐᓂᑦ ᐱᔭᑦᓴᓂᑦ ᑎᓕᔭᐅᒍᑎᒥᓂᒃ.

ᐱᓯᒪᒋᐊᓕᖏᑦ:

• ᐳᕐᑐᓂᕐᓴᒥ ᐃᓕᓐᓂᐊᕕᒻᒥ ᐱᔭᕇᕐᓯᒪᓗᓂ ᐅᕝᕙᓘᓐᓃᑦ ᐊᑦᔨᐸᓱᖓᓂᑦ ᐱᓇᓱᐊᕐᓯᒪᔫᓗᓂ;

• ᐊᓪᓚᕈᓐᓇᕆᐊᓕᒃ ᐅᖄᕈᓐᓇᓗᓂᓗ ᒪᕐᕉᓂᒃ (2) ᐅᖃᐅᓯᓂᑦ ᒪᑯᓂᖓ: ᐃᓄᑦᑎᑐᑦ, ᖃᓪᓗᓈᑎᑐᑦ ᐊᒻᒪᓗ ᒍᐃᒍᐃᑎᑐᑦ;

• ᐱᓇᓱᐊᕈᓐᓇᕆᐊᓕᒃ ᖃᕆᑕᐅᔭᓂᑦ;

• ᐱᓇᓱᐊᕈᓐᓇᕆᐊᓕᒃ ᐃᒻᒥᓂᕿᕈᓐᓇᓗᓂ, ᐃᓂᓪᓚᑎᕆᓯᒪᑦᓯᐊᕈᓐᓇᓗᓂ.

ᓇᓃᓐᓂᖓ: ᓴᓪᓗᐃᑦ, ᑯᐯᒃ

ᑮᓇᐅᑦᔭᓵᖏᑦ: ᐳᒃᑭᓂᕐᐹᖅ: $39,811 ᐊᕐᕌᒍᑕᒫᑦ – ᐳᕐᑐᓂᕐᐹᖅ: $64,517 ᐊᕐᕌᒍᑕᒫᑦ (ᐳᕐᑐᓂᖓ 5)

ᑫᕙᓪᓚᒍᓯᖏᑦ: ᐊᓪᓕᑐᖃᕇᒥ ᑕᓪᓕᒪᖓᓐᓂᒧᑦ, 9-ᖑᒥ ᐅᓪᓛᑯᑦ 5-ᖕᖑᒧᑦ ᕿᑎᕋᓕᕇᒃᑯᑦ

ᐊᓯᖏᑦ ᐱᕙᓪᓕᕈᑏᑦ: ᐃᓅᒐᓱᐊᕐᓂᐅᑉ ᐊᑭᖓ: ᐳᒃᑭᓂᕐᐹᖓ $11 834 ᐊᕐᕌᒍᑕᒫᑦ

ᓂᕿᓯᒍᑏᑦ: ᐳᒃᑭᓂᕐᐹᖓ $7858

ᐊᕐᕌᒍᑕᒫᑦ ᖃᖓᑦᑕᐅᑏᑦ: ᐃᑭᓐᓂᐹᑦ 3

ᐃᓄᒻᒪᕆᐅᓕᕈᓂᓗ ᕿᑲᕈᑎᑦᓴᓂᒃ ᓄᐊᑦᓯᓗᓂ: 6,25% ᐱᓇᓱᕝᕕᖓ, 4% ᐱᓇᓱᑦᑎ;

ᐱᓇᓱᑦᑏᑦ ᐃᒻᒪᖃᐅᑎᖓ;

ᕿᑲᕐᓀᑦ: 20 ᐅᓪᓗᐃᑦ ᐊᕐᕌᒍᑕᒫᑦ;

ᐱᓇᓱᕝᕕᐅᑉ ᕿᑲᕐᓇᖏᑦ: 20 ᐅᓪᓗᐃᑦ, ᐃᓚᐅᑎᓪᓗᒋᑦ 10 ᕿᑎᖕᖑᒥ.

ᐃᓕᒐᓱᐊᕈᒪᐅᑏᑦ ᑐᓂᓗᒍ ᐅᕗᖓ: HR@nunavikpolice.ca

ᑫᐋᔩᒃᑯᑦ NPS-ᑯᓗ ᐊᑦᔨᒌᑦᓯᐊᑐᒥᒃ ᐃᓘᓐᓀᓄᑦ ᐱᓇᓱᑦᑎᓯᔩᒃ. ᑖᓐᓇ ᓯᕗᓂᓕᐊᖑᒪᔪᖅ ᒪᓕᑦᓱᒍ ᐊᒻᒪᓗ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᒃ ᖃᓄᐃᓕᖓᐅᑏᑦ ᐊᑦᔨᒌᖕᖏᑐᑐᐃᓐᓇᐅᕆᐊᓖᑦ ᑫᓪᓗᑐᐃᓂᒃᑯᑦ ᐃᓄᓐᓂᒃ ᐱᓇᓱᑦᑎᓯᓂᕐᒥᒃ.

ᐅᓂᖔᕆᔭᐅᔪᐃᑦ ᑭᓯᐊᓂ ᐊᐱᕐᓱᑕᐅᓚᖓᒍᑎᒃ ᖃᐅᔨᑎᑕᐅᖃᑦᑕᓚᖓᔪᑦ.