ᐊᓪᓚᕕᓕᕆᐅᑎᓂᒃ ᐱᓇᓱᑦᑎ ‒ MPW-ᓂᒃ ᐱᓇᓱᕝᕕᒥ - KRG

ᐱᓇᓱᒐᖅ ᐱᔭᑦᓴᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG), ᑲᕙᒫᐱᓐᓄᑦ ᖁᓪᓕᐸᐅᑦᓱᓂ ᑎᒥᐅᔪᖅ ᐊᐅᓚᑦᓯᕕᓕᒃ ᓄᓇᒥ 55° ᓴᓂᒧᑦ ᑕᕐᕋᖓᓂ, ᐅᓪᓗᒥ ᕿᓂᕐᑐᖅ ᐃᒻᒥᓂᒃ-ᑲᑦᓱᙰᑦᑐᒥᒃ ᐊᒻᒪᓗ ᕿᑦᑌᖓᑦᓯᐊᑐᒥᒃ ᐃᓄᒻᒥᒃ ᐃᓚᒋᓕᐅᑎᒍᒪᔪᒥᒃ KRG-ᑯᓄᑦ ᒪᑐᒥᖓ ᐱᓇᓱᒐᖃᕐᓗᓂ:

ᐊᓪᓚᕕᓕᕆᐅᑎᓂᒃ ᐱᓇᓱᑦᑎ ‒ MPW-ᓂᒃ ᐱᓇᓱᕝᕕᒥ

(ᐊᑌᓐᓇᑐᖅ, ᐃᓗᐃᑦᑐᖅ)

KRG-ᑯᑦ ᑲᕙᒫᐱᓐᓂ ᐃᓄᓕᒫᓂᒃ ᐱᒍᑦᔨᐅᑎᓂᒃ ᐱᓇᓱᕝᕕᖓ ᑲᒪᔨᐅᕗᖅ ᓇᑉᐸᑎᕐᓯᒪᔪᓂᒃ ᐱᓇᓱᐊᕐᓃᑦ ᐊᐅᓚᑕᐅᓂᖓᓂᒃ (ᐃᒥᕐᑕᐅᔪᑦᓴᒥᒃ ᐃᒥᕐᑕᕕᓐᓂᒃ ᐱᓇᓱᐊᕈᑏᑦ, ᐊᕐᖁᑏᑦ ᓇᑉᐸᑎᕐᓯᒪᓂᖏᑦ, ᑲᕙᒫᐲᑦ ᐃᓪᓗᔪᐊᖏᑦ, ᓴᓂᕐᓂᒃ ᓴᐅᔨᕖᑦ, ᐊᓯᖏᓪᓗ) ᑕᕐᕋᒥ ᓄᓇᓕᓐᓂᒃ ᑭᒡᒐᑑᑎᒋᑦᓱᒋᑦ, ᐊᒻᒪᓗ ᓱᒃᑯᓂᐊᖕᖏᒪᑕ ᐊᒻᒪᓗ ᐋᕐᕿᒋᐊᑦᓯᐊᓗᒋᑦ ᓴᓇᒪᑦᓯᓂᕐᒥᒃ 200 ᐅᖓᑖᓃᑦᑐᓂᒃ KRG-ᑯᑦ ᐃᓄᓐᓄᑦ ᐃᓪᓗᖏᓐᓂᒃ ᐊᒻᒪᓗ ᑮᓇᐅᔭᓕᐅᕐᓂᒧᑦ ᐃᓪᓗᔪᐊᖏᓐᓂᒃ ᓄᓇᖁᑎᖓᑕ ᐃᓗᓕᒫᖓᓂ (ᐱᓇᓱᑦᑏᑦ ᐃᓪᓗᖏᑦ, ᐊᓪᓚᕖᑦ, ᒥᕝᕖᑦ ᐃᓪᓗᔪᐊᖏᑦ, ᐊᒻᒪᓗ ᐳᓖᓯᒃᑯᑦ ᐸᕐᓇᓀᕐᓯᕕᖏᑦ). ᐱᓪᓗᑯᒋᐊᓕᑎᒍᑦ ᐃᑲᔪᕐᓯᒪᓂᕐᒥᒃ ᓄᐃᑕᑦᓯᔨᐅᒻᒥᔪᖅ ᑕᕐᕋᒥ ᓄᓇᓕᓐᓄᑦ ᐃᓕᖓᑎᓪᓗᒍ ᓴᓇᒪᑦᓯᓂᕐᒧᑦ ᑲᕙᒫᐱᓐᓂ ᓇᑉᐸᑕᐅᒪᔪᑦ ᐃᓚᖏᓐᓂᒃ (ᐃᒥᕐᑕᐅᔪᑦᓴᒥᒃ ᐃᒥᕐᑕᕖᑦ, ᓄᓇᓕᓐᓂ ᐱᖕᖑᐊᕖᑦ, ᓯᐊᕐᕆᔭᕐᕖᑦ, ᐳᐃᑦᔪᕋᕐᕖᑦ, ᐊᓯᖏᓪᓗ).

ᒥᓇᕋᕐᑎᐅᓗᓂ ᐱᓇᓱᕝᕕᐅᑉ ᑐᑭᒧᐊᑦᑎᓯᔨᖓᑕ ᐃᑲᔪᕐᑎᖓᓄᑦ, ᐊᓪᓚᕕᓕᕆᐅᑎᓂᒃ ᐱᓇᓱᑦᑎ ᐱᓇᓱᐊᑦᓴᖃᓚᖓᔪᖅ ᒪᑯᓂᖓᓗᐊᖕᖑᐊᖅ:

• ᑎᒍᓯᓂᖅ ᐊᒻᒪᓗ ᑲᒪᖃᑦᑕᓂᖅ ᑭᒡᒐᑐᕐᑕᐅᔪᑦ ᐊᒻᒪᓗ ᐃᓪᓗᒥᒃ ᐊᑐᕐᑐᑦ ᑐᑦᓯᕋᐅᑎᖏᓐᓂᒃ, ᐊᒻᒪᓗ ᖃᐅᔨᒪᔭᑦᓴᓂᒃ ᐅᖃᖃᑦᑕᓂᖅ ᐱᓇᓱᕝᕕᐅᑉ ᐱᓇᓱᑦᑎᖏᓐᓄᑦ;

• ᐱᓇᓱᖃᑦᑕᓂᖅ ᖁᒥᐅᓂᕐᒥᒃ ᐃᓂᑦᓴᓂᒃ ᖃᖓᑦᑕᔫᓂ, ᓄᓇᒃᑰᔫᓂᒃ ᐊᒻᒪᓗ ᓯᓂᑦᑕᕕᑦᓴᓂᒃ ᐱᓇᓱᕝᕕᐅᑉ ᐱᓇᓱᑦᑎᖏᓐᓄᑦ;

• ᑎᒍᓯᓂᖅ, ᑲᑎᕐᓱᐃᓂᖅ ᐊᒻᒪᓗ ᐃᕐᐸᑎᕆᓂᖅ ᐃᓄᓕᒫᑎᒍᑦ ᐊᑦᑐᐊᖃᑕᐅᔪᓄᑦ ᐱᓇᓱᐊᕈᓯᑕᒫᑦ ᐃᒥᕐᑕᐅᔪᒥᒃ ᐃᒪᕐᒥᒃ ᖃᐅᔨᓴᐅᑏᑦ ᓄᐃᑕᕕᓂᖏᓐᓂᒃ ᐊᓪᓚᑕᐅᓲᓂᒃ ᑲᕙᒫᐱᓐᓂ ᐃᒥᕐᑕᕕᓐᓂᒃ ᐱᓇᓱᑦᑎᓄᑦ;

• ᓴᖑᐊᑦᓯᓂᖅ ᐊᒻᒪᓗ ᑲᔪᓯᑎᑦᓯᓂᖅ ᐊᐅᓪᓚᑎᑦᓯᒍᑎᓂᒃ ᐃᒥᕐᑕᐅᔪᒥᒃ ᐃᒪᕐᒥᒃ ᖃᐅᔨᓴᕈᑎᑦᓴᓕᐊᓂᒃ ᑲᕙᒫᐱᓐᓂ ᐃᒥᕐᑕᕕᓐᓂᒃ ᐱᓇᓱᑦᑎᓄᑦ;

• ᑲᒪᒋᐊᓪᓚᖃᑦᑕᓂᖅ ᑕᕐᕋᒥ ᓄᓇᓕᓐᓂᒃ ᐊᑦᑐᐊᑎᓪᓗᒍ ᑐᑭᑖᕈᑏᑦ ᐊᑐᓕᕐᑎᑕᐅᓂᖓᓄᑦ, ᐊᖏᖃᑎᒌᒍᑏᑦ ᐱᓇᓱᒍᑏᓪᓗ ᐊᑎᓕᐅᕐᕕᐅᓂᖓᓄᑦ, ᑭᖑᕃᑦᑌᓕᓂᕐᒧᑦ ᐱᒻᒪᕆᓐᓂᒃ ᐱᕕᑦᓴᖃᕐᓂᐅᑉ ᐃᓱᓕᕕᖏᓐᓂᒃ, ᐊᓯᖏᓐᓄᓗ;

• ᐁᓯᒪᓂᖅ ᐊᒻᒪᓗ ᐊᓪᓚᓂᖅ ᑲᑎᒪᔪᓂ ᐅᖄᔭᐅᔪᓂᒃ ᐊᑦᔨᒌᖕᖏᑐᓂ ᑲᑎᒪᓂᕐᓂ;

• ᒪᑭᑕᑦᓯᓂᖅ ᓯᑯᑦᓴᔭᓂᒃ ᐊᒻᒪᓗ ᖃᕆᑕᐅᔭᒥ ᐊᓪᓚᖁᑎᓂᒃ ᓴᓂᕐᕚᑎᕆᕕᓐᓂᒃ, ᐃᓚᐅᑎᓪᓗᒍ ᐱᓇᓱᕝᕕᐅᑉ ᒪᑉᐱᒐᖃᐅᑎᖓ;

• ᓱᕐᖁᐃᓂᖅ ᐱᓇᓱᑦᑐᖃᕐᓂᖓᓂᒃ ᐊᓪᓚᓯᒪᔪᐃᑦ ᐊᑐᕆᐊᓖᑦ ᐃᓚᖏᓐᓂᒃ (ᐱᓇᓱᑦᑎᓯᒍᑏᑦ, ᑐᑭᑖᕈᑏᑦ, ᐱᓇᓱᐊᑦᓴᓂᒃ ᑎᓕᔨᒍᑏᑦ, ᑫᕙᓪᓚᒍᓯᕐᓂᒃ ᐊᓪᓚᕕᑦᓭᑦ, ᑮᓇᐅᔭᕐᑑᑏᑦ ᐊᓪᓛᐱᖏᑦ, ᐊᓯᖏᓪᓗ);

• ᐱᓇᓱᖃᑦᑕᓂᖅ ᓇᐅᑐᐃᓇᓂᒃ ᐊᓯᖏᓐᓂᒃ ᐊᑦᑐᐊᒥᔪᓂᒃ ᐱᔭᑦᓴᓂᒃ ᑎᓕᔭᐅᒍᓂ ᐊᖓᔪᕐᖄᒥᓄᑦ.

ᐱᓇᓱᒍᒪᔪᖅ ᓂᕈᐊᕐᑕᐅᔪᖅ ᐃᒣᒋᐊᓕᒃ:

• ᐱᑕᖃᕆᐊᓕᒃ ᐱᓇᓱᒐᕐᒥᒃ ᐃᓕᑦᓯᒪᐅᑎᒥᒃ ᐊᓪᓚᑎᐅᓂᕐᒥᒃ ᐃᓕᓐᓂᐊᓯᒪᓗᓂ ᐅᕝᕙᓘᓐᓃᑦ ᒥᑦᓯᓕᒻᒥᒃ ᐃᓕᓐᓂᐊᓯᒪᓗᓂ ᐅᕝᕙᓗᓘᓐᓪᓃᑦ ᐱᓇᓱᓕᓂᐅᓗᓂ;

• ᐃᑭᓐᓂᐹᖓᓄᑦ ᐊᕐᕌᒎᓐᓂᒃ ᒪᕐᕉᓂᒃ ᒥᑦᓯᓕᒻᒥᒃ ᐱᓇᓱᓚᐅᕐᓯᒪᒋᐊᓕᒃ;

• ᐊᑐᕈᓐᓇᓯᐊᕐᓗᒋᑦ ᖃᐅᔨᒪᒋᐊᓕᒃ Microsoft Office ᖃᕆᑕᐅᔭᕈᑎᖓᓂᒃ

• ᐱᑕᖃᕆᐊᓕᒃ ᓂᑲᓇᕋᓂ ᖃᕆᑕᐅᔭᕈᓐᓇᓂᕐᒥᒃ;

• ᐅᖃᖃᑎᖃᕈᓐᓇᕆᐊᓕᒃ, ᐅᖄᓗᓂ ᐊᓪᓚᓯᒪᔪᑎᒍᓪᓗ, ᐃᑭᓐᓂᐹᖓᓄᑦ ᒪᕐᕈᐃᓄᑦ ᐅᑯᐊ ᐅᖃᐅᓰᑦ ᓇᓪᓕᖏᓐᓄᑦ: ᐃᓄᒃᑎᑐᑦ, ᖃᓪᓗᓈᑎᑐᑦ ᐅᕝᕙᓗᓘᓐᓃᑦ ᐅᐃᒍᐃᑎᑐᑦ;

• ᐱᑕᖃᕆᐊᓕᒃ ᐃᓂᓪᓚᖓᑎᑦᓯᓂᒃᑯᑦ ᐱᓯᑎᐅᓂᕐᒥᒃ ᐊᒻᒪᓗ ᑕᑎᑦᓴᓯᐊᖑᓗᓂ;

• ᐊᑐᐃᓐᓇᐅᒋᐊᓕᒃ ᐊᐅᓚᖃᑦᑕᓚᖓᓗᓂ ᓄᓇᕕᐅᑉ ᐃᓗᐊᓂ.

ᐱᓇᓱᕝᕕᐅᑉ ᓄᓇᖓ: ᑰᑦᔪᐊᖅ, ᑯᐯᒃ.

ᑮᓇᐅᑦᔭᓵᑦ: $40,906 (ᐃᑭᓐᓂᐹᖓᓄᑦ) ‒ $66,291 (ᐅᓄᕐᓂᐹᖓᓄᑦ) ᐊᕐᕌᒍᑕᒫᑦ (ᐳᕐᑐᓂᖅ 5).

ᐱᕙᓪᓕᖁᑏᑦ*: ᐃᓅᓯᐅᑉ ᐊᑭᑐᓂᖓᑕ ᑲᓱᖕᖏᓂᖓ: $8,500 ᐊᕐᕌᒍᑕᒫᑦ (ᐃᑭᓐᓂᐹᖓᓄᑦ);

ᓂᕿᓄᑦ ᐃᑲᔪᕐᓯᐅᑎ: $4,398 ᐊᕐᕌᒍᑕᒫᑦ (ᐃᑭᓐᓂᐹᖓᓄᑦ);

ᐊᕐᕌᒍᑕᒫᑦ ᕿᑲᓯᔪᑦ ᐊᐅᓪᓚᕈᑎᖏᑦ: ᐅᓄᕐᓂᐹᖓᓄᑦ 3 ᐊᑐᓂ ᐃᓄᒻᒧᑦ ᐊᕐᕌᒍᑕᒫᑦ;

ᐊᑕᖏᕐᑐᑦ ᐱᕙᓪᓕᑯᑎᖏᑦ ᐃᓚᓖᑦ ᐱᔭᕆᐊᑭᓪᓕᑎᕐᓯᒪᔪᒥᒃ ᐃᓄᒻᒪᕆᐅᓐᓂᐅᑎᑦᓴᓂᒃ ᐸᕐᓇᕈᑎᒥᒃ;

ᐃᓱᒣᓐᓇᕿᐅᑏᑦ: 20 ᐅᓪᓗᐃᑦ;

ᐱᖁᔭᑎᒍᑦ ᕿᑲᕐᓀᑦ: 20 ᐅᓪᓗᐃᑦ, ᐃᓚᓖᑦ 10-ᓂᒃ ᐅᓪᓗᓂᒃ ᕿᑎᖕᖑᒥ.

ᐱᓇᓱᒍᒪᐅᑎᑎᑦ ᑎᑭᑎᓪᓗᒋᑦ ᐅᕗᖓ:

Human Resources Section

Kativik Regional Government

P.O. Box 9, Kuujjuaq QC J0M 1C0

Fax: 819-964-2975

Email: humanresources@krg.ca

KRG ᐊᑦᔨᒌᒥᒃ ᐱᕕᖃᕐᑎᓯᑦᓱᓂ ᐱᓇᓱᑦᑎᓯᔨᐅᕗᖅ. ᑕᒪᓐᓇ ᒪᓕᑦᓱᒍ ᐊᒻᒪᓗ ᒪᓕᒻᒥᓱᓂ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥᒃ, ᐃᓂᓪᓚᕈᑏᑦ

ᐊᑦᔨᒌᖕᖏᑐᐃᓐᓇᕆᐊᓖᑦ ᑫᓪᓗᐊᕈᑕᐅᓗᑎᒃ ᐱᓇᓱᑦᑎᑖᕐᓂᒥᒃ ᐃᓄᓐᓂᒃ ᐱᓇᓱᒍᒪᔪᓂᒃ.

ᐱᓇᓱᒍᒪᔪᑦ ᓂᕈᐊᕐᑕᐅᔪᑦ ᐊᐱᕐᓱᒍᒪᑦᓱᒋᑦ ᖃᓄᐃᓕᔭᑑᓚᖓᔪᑦ.