ᒥᕝᕕᒥᒃ ᐊᐅᓚᑦᓯᔨ, ᐳᕕᕐᓂᑐᖅ ᒥᕝᕕᖓᓂ - KRG

ᐱᓇᓱᒐᑦᓴᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ(ᑫᐋᔩ), ᖁᑦᓯᓂᕐᐹᖅ ᓄᓇᓕᓐᓂ ᑎᒥᐅᔫᑦᓱᓂ ᐊᐅᓚᑦᓯᔪᖅ ᓄᓇᒥᒃ 55 ᖁᓛᓂ ᑕᕐᕋᒥ, ᕿᓂᕐᖁᖅ ᑲᑦᓱᖓᐃᑦᑐᒥᒃ ᕿᑦᑕᐃᖓᑦᓯᐊᑐᒥᒃ ᐃᓄᒻᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᐱᓇᓱᑦᑎᖏᓐᓄᑦ ᐃᓚᐅᒍᒪᔪᒧᑦ ᐆᒥᖓ ᐱᓇᓱᑦᑎᐅᓗᓂ:

ᒥᕝᕕᒥᒃ ᐊᐅᓚᑦᓯᔨ, ᐳᕕᕐᓂᑐᖅ ᒥᕝᕕᖓᓂ

(ᖃᐅᑕᒫᕐᓯᐅᑎ ᐊᑕᐃᓐᓇᑐᖅ)

ᑐᓴᕐᑎᓯᖃᑦᑕᓗᓂ ᑐᑭᒧᐊᑦᑎᓯᔨᖓᓂᒃ ᐃᖏᕐᕋᐅᑎᓕᕆᕕᐅᑉ ᐱᓇᓱᕝᕕᖓᑕ, ᒥᕝᕕᒥᒃ ᐊᐅᓚᑦᓯᔨ, ᑰᑦᔪᐊᑉ ᒥᕝᕕᖓᓂ, ᐃᑉᐱᒍᓱᓲᖑᕗᖅ ᐊᑦᑕᓇᖕᖕᖏᑑᓂᖓᓂᒃ, ᐃᖏᕐᕋᓯᐊᕐᓂᖓᓂᒃ ᐊᒻᒪᓗ ᐊᐅᓚᑕᐅᑦᓯᐊᓂᖓᓂᒃ ᑰᑦᔪᐊᑉ ᒥᕝᕕᖓᑕ ᐊᐅᓚᓂᖏᓐᓂᒃ, ᐱᓗᐊᕐᑐᒥᒃ, ᐱᔭᑦᓴᖏᑦ ᐊᒻᒪᓗ ᑲᒪᒋᒋᐊᓕᖏᑦ ᒥᕝᕕᒥ ᐊᐅᓚᑦᓯᔨᐅᑉ ᐃᓚᓖᑦᐅ ᐅᑯᓂᖓ:

• ᐊᐅᓚᑦᓯᓲᖅ ᐊᑐᕋᑦᓴᓂᒃ ᖃᐅᑕᒫᕐᓯᐅᑏᑦ ᐊᐅᓚᒍᑎᖏᓐᓂᒃ, ᐊᑦᑕᓇᕐᑐᒦᑦᑕᐃᓕᒪᓂᖅ ᐊᒻᒪᓗ ᐱᒍᑦᔨᒍᓐᓇᓂᖅ ᒥᕝᕕᐅᑉ ᐱᓇᓲᑎᓕᒫᖏᓐᓂᒃ ᖃᖓᑦᑕᔫᓄᑦ ᐅᓯᒍᑎᓄᑦ, ᖃᖓᑦᑕᔫᑐᐃᓐᓇᓄᑦ, ᐊᓯᖏᓐᓄᑦ ᐊᑐᕐᑐᓄᑦ ᐊᒻᒪᓗ ᑭᓇᒃᑯᑐᐃᓐᓇᓄᑦ;

• ᐊᐅᓚᑦᓯᓲᖅ ᐊᑐᓕᕐᑎᓯᓂᕐᒥᒃ ᐊᒻᒪᓗ ᐊᐅᓚᑦᓯᓂᕐᒥᒃ ᒥᕝᕖᑦ ᐋᕐᕿᓱᕐᓯᒪᓂᖏᓐᓂᒃ ᐊᐅᓚᑦᓯᓗᓂ ᐊᑦᑕᓇᖕᖏᑐᒥᒃ ᐊᒻᒪᓗ ᐊᑦᑕᓇᐃᓕᑎᕐᓯᒪᔪᒥᒃ ᐱᐅᓯᕐᒥᒃ, ᐊᒻᒪᓗ ᐊᑐᐃᓐᓇᐅᖏᓐᓇᓕᒫᕐᓗᓂ ᐱᒍᑦᔨᓂᐊᕐᓗᓂ ᑲᓱᒍᑎᓪᓚᕆᐅᓗᓂ ᐊᑦᔨᒌᖕᖏᑐᓄᑦ ᖃᓂᖕᖏᑐᓄᑦ ᒥᕝᕕᓄᑦ ᓄᓇᕕᒻᒥ ᐊᐅᓚᔪᓄᑦ ᐃᖏᕐᕋᐅᑎᓕᕆᕕᐅᑉ ᐱᓇᓱᕝᕕᖓᓄᑦ;

• ᐊᐅᓚᑦᓯᓲᖅ ᑲᔪᓯᔪᓂᒃ ᑐᓴᐅᒪᖃᑎᒌᓐᓂᓂᒃ, ᖃᐅᔨᒋᐊᕐᓂᓂᒃ ᐊᒻᒪᓗ ᖃᐅᔨᔭᐅᑎᑦᓯᒐᓱᐊᕐᓂᓂᒃ ᓱᖃᑦᓯᓂᕐᓂᒃ ᒥᕝᕕᒥᒃ ᐃᓚᐅᑎᓪᓗᒋᑦ ᑐᖕᖓᕕᖃᖃᑏᑦ ᐃᓚᐅᓂᖏᑦ;

• ᓯᕗᓕᕐᑎᐅᓗᓂ, ᐃᖏᕐᕋᓯᐊᕐᑐᒥᒃ ᑐᑭᒧᐊᑦᑎᓯᓗᓂ ᐊᒻᒪᓗ ᐃᑲᔪᕐᑐᐃᓗᓂ ᐱᒐᑦᓴᓕᐅᕐᑕᐅᒪᔪᓂᒃ ᐱᓇᓱᑦᑎᓂᒃ ᐆᑦᑑᑎᒋᓗᒋᑦ ᒥᕝᕕᒥ ᐋᕐᕿᒋᐊᓪᓛᕆᔩᑦ, ᐃᑯᒪᓕᕆᔩᑦ, ᓄᓇᒃᑰᔫᓕᐅᕐᑏᑦ ᐱᓇᓱᓐᓂᖏᓐᓂ ᐱᔭᑦᓴᒥᓂᒃ ᐊᒻᒪᓗ ᐃᑉᐱᒋᓗᒋᑦ ᑐᑭᓯᐊᑦᓯᐊᒪᖔᑕ ᑲᒪᒋᒋᐊᓕᒻᒥᓂᒃ ᐊᐅᓚᑦᓯᓂᕐᒥ ᐊᒻᒪᓗ ᐊᐅᓚᑦᓯᕕᒻᒨᓕᖓᔪᑦ ᑭᖕᖒᒪᒋᔭᖏᑦ ᑲᔪᓯᖁᓗᒋᑦ ᑫᐋᔩ ᐃᖏᕐᕋᐅᑎᓕᕆᕕᐅᑉ ᐱᓇᓱᕝᕕᖓᑕ;

• ᐃᑉᐱᒍᓱᓲᖅ ᒪᓕᒋᐊᓖᑦ, ᒪᓕᒐᐃᑦ ᐊᒻᒪᓗ ᖃᓄᐃᓘᕈᓰᑦ ᐊᑐᕈᓐᓇᑐᑦ ᒥᕝᕕᐅᑉ ᐊᐅᓚᓂᖏᓐᓄᑦ ᒪᓕᑦᑕᐅᓯᐊᕐᒪᖔᑕ ᒪᓕᑦᑕᐅᓯᐊᖏᓐᓇᖁᓗᒋᑦ;

• ᐊᐅᓚᑦᓯᓗᓂ ᒥᕝᕕᒥ ᐅᐃᒪᓇᕐᑐᖃᓕᕐᐸᑦ ᑭᐅᒍᑎᖓᑕ ᐸᕐᓇᓯᒪᐅᑎᖓᓂᒃ, ᑐᓴᐅᒪᖃᑎᖃᕐᓗᓂ ᑭᐅᔨᓂᒃ ᐊᒻᒪᓗ ᐊᑐᕐᑐᓂᒃ;

• ᐱᓇᓱᖃᑎᖃᕐᓗᓂ ᐊᑕᐅᑦᓯᑰᕐᑎᓯᔨᖓᓂᒃ ᐊᑑᑎᖁᔨᒍᑎᓂᒃ ᐱᕙᓪᓕᐊᑎᑦᓯᔨᒥᒃ ᑲᔪᓯᑎᑦᓯᓯᐊᕐᓗᓂ ᐊᑦᑕᓇᕐᑐᒦᑎᑦᓯᑕᐃᓕᓂᕐᒧᑦ ᐊᐅᓚᑦᓯᒍᑎᒥᒃ, ᐋᕐᕿᓱᐃᓗᓂ ᑐᕌᕋᑦᓴᓂᒃ ᐊᒻᒪᓗ ᑐᕌᕋᓱᐊᕋᑦᓴᓂᒃ, ᖃᐅᔨᓴᕐᓗᓂ ᓱᓂᕕᓃᑦ ᑐᓴᕐᑎᓯᐅᑎᖏᓐᓂᒃ, ᐱᔭᕇᕐᓗᓂ ᐋᕐᖀᒋᐊᕈᑏᑦ ᐸᕐᓇᓯᒪᐅᑎᖏᓐᓂᒃ ᐊᒻᒪᓗ ᐊᑐᐃᓐᓇᐅᑎᑦᓯᓗᓂ ᖃᐅᔨᒋᐊᕆᐊᓪᓚᕈᑎᕕᓃᑦ ᖃᓄᐃᓕᖓᓕᕐᓂᖏᑦᑕ ᑐᓴᕐᑎᓯᐅᑎᖏᓐᓂᒃ ᐃᓘᓐᓇᖏᑦᑕ ᖃᓄᐃᓕᒋᐊᕈᑎᕕᓃᑦ;

• ᒥᕝᕕᓂᒃ ᖃᐅᔨᓴᖏᓐᓇᖃᑦᑕᓗᓂ ᒪᓕᓪᓗᒋᑦ ᐊᑐᕐᑐᑦ ᒪᓕᒐᐃᑦ, ᐱᐅᓰᑦ, ᒪᓕᒐᐃᑦ ᐊᒻᒪᓗ ᑐᑭᒧᐊᒋᐊᕈᑏᑦ;

• ᕿᒥᕐᕈᒋᐊᓪᓛᓗᓂ ᐊᑭᓕᕋᑦᓴᓂᒃ, ᐅᓐᓂᑑᑦᔨᓗᓂ ᐊᑭᓖᒍᑏᑦ ᐊᖏᕐᑕᐅᓂᖏᓐᓂᒃ ᐊᒻᒪᓗ/ᐅᕝᕙᓘᓐᓃᑦ ᖃᐅᔨᓴᕆᐊᓪᓛᓗᓂ ᐱᑖᕐᑎᓯᔨᓂᒃ ᕆᐊᖃᑐᐊᕈᓂ;

• ᐱᓇᓱᓪᓗᓂ ᓂᐅᕕᕈᒪᐅᑎᐅᑉ ᐋᕐᕿᓱᕐᓯᒪᔫᑉ ᐃᓗᐊᓂ ᐱᔭᕇᕐᓗᓂ ᓂᐅᕕᕈᒪᐅᑎᒥᒃ ᐊᒻᒪᓗ ᐊᑐᐃᓐᓇᐅᑎᑦᓯᓗᓂ ᖃᐅᔨᓴᕆᐊᓪᓛᓂᕐᒥᒃ ᕆᐊᖃᕐᓂᖓ ᒪᓕᓪᓗᒍ;

• ᐱᓇᓱᖃᑎᖃᕐᓗᓂ ᐃᓕᓐᓂᐊᑎᑦᓯᓂᕐᒥᒃ ᐊᑕᐅᑦᓯᑰᕐᑎᓯᔨᒥᒃ, ᓇᓗᓇᐃᕐᓗᒋᑦ ᐃᓕᓐᓂᐊᕆᐊᓖᑦ, ᐃᑲᔪᕐᓗᓂ ᐱᕙᓪᓕᐊᑕᐅᓂᖏᓐᓂᒃ ᐃᓕᓐᓂᐊᕈᑏᑦ ᐸᕐᓇᑕᐅᒪᐅᑎᖏᓐᓂᒃ ᐊᒻᒪᓗ ᐱᐅᒃᑯᑎᖏᓐᓂᒃ;

• ᐱᓇᓱᓪᓗᓂ ᐊᕐᕕᑕᕐᓂᓂᒃ ᐊᐅᓚᑦᓯᒍᑎᐅᑉ ᐃᓗᐊᓂ ᐊᕐᕕᑕᕐᓂᓕᒫᓄᑦ ᐱᒋᐊᓕᓐᓄᑦ ᑎᓕᔭᐅᒪᔪᓄᑦ ᐱᓇᓱᑦᑎᓄᑦ;

• ᕿᒥᕐᕈᒋᐊᓪᓛᓗᓂ ᐱᓇᓱᓐᓃᑦ ᑲᐃᕙᓪᓚᒍᓯᖏᓐᓂᒃ ᓱᓕᒋᐊᖏᑦ ᓇᓗᓇᐃᕐᓯᓗᓂ ᑐᓴᕐᑕᐅᒋᐊᓕᓐᓂᒃ ᐊᒻᒪᓗ ᓈᒻᒪᓈᕐᓯᒪᑦᓯᐊᓂᖏᓐᓂᒃ ᐊᐅᓪᓚᑎᑦᓯᓚᐅᕋᓂ ᐊᑭᓕᕐᑐᐃᕕᒻᒧᑦ;

• ᐊᑐᐃᓐᓇᐅᑎᑦᓯᓗᓂ ᐃᑲᔪᕐᑐᐃᓂᕐᒥᒃ ᐊᑕᐅᑦᓯᑰᕐᑎᓯᔨᓄᑦ ᐊᐅᓚᑦᓯᓂᐅᑉ ᐊᒻᒪᓗ ᐊᐅᓚᑦᓯᕕᖓᓄᑦ ᐃᖏᕐᕋᐅᑎᓕᕆᕕᐅᑉ ᐱᓇᓱᕝᕕᖓᓄᑦ;

• ᐱᓇᓱᓪᓗᓂ ᐊᓯᖏᓐᓂᒃ ᐱᓇᓱᒐᑦᓴᓂᒃ ᑐᑭᒧᐊᑦᑎᓯᔨᐅᑉ ᑐᕌᕐᓂᓕᐊᕕᓂᖏᓐᓂᒃ ᕆᐊᖃᕐᓂᖓ ᒪᓕᓪᓗᒍ.

ᐱᒍᓐᓇᕆᐊᓕᖏᑦ

• ᐃᓕᓐᓂᐊᕕᕐᔪᒥ ᐱᔭᕇᕈᑎᖃᕆᐊᓕᒃ ᐅᕝᕙᓘᓐᓃᑦ ᐳᕐᑐᓂᕐᓴᐅᑉ ᐊᐃᑉᐹᓂ ᐱᔭᕇᕈᑎᒥᒃ ᑖᑦᓱᒧᖕᖓᓕᖓᔪᒥ ᐱᓇᓱᒐᕐᒥ. ᐊᑦᔨᐸᓱᖓᓂᒃ ᐱᓇᓱᓕᓂᐅᓂᖓ ᐃᓱᒪᒋᔭᐅᕋᔭᕐᑐᖅ;

• ᐃᑭᓐᓂᐹᓂᒃ ᑕᒻᓕᒪᓂᒃ (5) ᐅᑭᐅᓂᒃ ᑖᑦᓱᒧᖕᖓᓕᖓᔪᓂᒃ ᐱᓇᓱᓕᓂᐅᓗᓂ ᒥᕝᕕᓕᕆᓂᕐᓅᓕᖓᔪᒥᒃ;

• ᐃᑭᓐᓂᐹᓂᒃ ᒪᕐᕉᓂᒃ (2) ᐅᑭᐅᓐᓂᒃ ᐱᓇᓱᑎᑦᓂᒃ ᑲᒪᔨᐅᓯᒪᓂᖓ ᐃᓱᒪᒋᔭᐅᓛᕐᖁᖅ ᐅᓇᒻᒥᓇᐅᑎᐅᒋᐊᖓ;

• ᐱᓇᓱᒐᑦᓴᓂᒃ ᐊᐅᓚᑦᓯᔨᐅᓯᒪᓂᖓ ᐊᒻᒪᓗ ᑐᓴᕐᑎᓯᐅᑎᓂᒃ ᐊᑐᐃᓐᓇᕈᕐᑎᖃᑦᑕᓯᒪᓂᖓ, ᐃᖏᕐᕋᔪᓕᕆᓂᕐᒥ ᐱᐅᒋᔭᐅᓂᕐᓴᐅᕋᔭᕐᑐᖅ ᐅᓇᒻᒥᓇᐅᑎᐅᑦᓱᓂᓗ;

• ᐃᓕᓯᒪᓂᖓ ᒥᕝᕕᓂ ᐊᑦᑕᓇᕐᑎᓯᑦᑕᐃᓕᒪᓂᕐᒥᒃ ᐊᐅᓚᑦᓯᓂᕐᒥᒃ ᐋᕐᕿᓯᒪᔪᒥᒃ;

• ᓱᕐᖁᐃᑕᐅᒪᔪᒥᒃ ᐱᒍᓐᓇᓂᖃᕐᓗᓂ ᐸᕐᓇᓂᕐᒥᒃ, ᐊᑐᐃᓐᓇᕈᕐᑎᕆᓂᕐᒥ ᐊᒻᒪᓗ ᐱᓇᐃᓗᑕᓂᒃ ᐋᕐᕿᓱᐃᓂᕐᒥᒃ ᐊᒻᒪᓗ ᑐᑭᑖᕈᓐᓇᓯᐊᕐᓂᒥᒃ;

• ᐅᖄᒍᓐᓇᓯᐊᕐᓗᓂ ᐊᒻᒪᓗ ᐊᓪᓚᒍᓐᓇᓯᐊᕐᓗᓂ ᒪᕐᕈᔪᐊᓐᓂᒃ (2) ᐅᑯᓈᓂ ᐅᖃᐅᓯᕐᓂ: ᐃᓄᒃᑎᑐᑦ, ᖃᓪᓗᓈᑎᑐᑦ ᐅᕝᕙᓘᓐᓃᑦ ᐅᐃᒍᐃᑎᑐᑦ;

• ᖃᐅᔨᒪᑦᓯᐊᓗᓂ Microsoft Office-ᒥᒃ ᖃᕆᑕᐅᔭᕈᑎᒥᒃ;

• ᐃᓄᑑᓗᓂ ᐱᓇᓱᒍᓐᓇᓗᓂ;

• ᐱᓇᓱᓕᓂᐅᓗᓂ ᐃᓕᕐᕈᓯᖃᑎᒌᖕᖏᑐᓂ ᐱᓇᓱᕝᕕᒥ, ᐱᐅᓗᐊᕐᑐᒥᒃ ᓄᓇᖃᕐᖄᓯᒪᔪᑦ ᓄᓇᓕᖏᓐᓂ, ᐃᓱᒪᒋᔭᐅᕗᖅ ᐱᒍᒪᓇᕆᐊᖓ;

ᐱᓇᓱᒐᐅᑉ ᓇᓃᓐᓂᖓ:  ᐳᕕᕐᓂᑐᖅ

ᑮᓇᐅᑦᔭᓵᖏᑦ: ᐃᑭᓐᓂᐹᖓ $92 718 ᐊᕐᕌᒍᑕᒫᑦ - ᐅᓄᕐᓂᐹᖅ $127 481 ᐋᕐᕌᒍᑕᒫᑦ

ᐊᓯᖏᑦ ᐱᕙᓪᓕᒋᐊᕈᑏᑦ: ᐃᓅᓂᐅᑉ ᐊᑭᖓᑕ ᓈᒻᒪᓯᒋᐊᕈᑎᖓ: ᐃᑭᓐᓂᐹᖅ $10 033/ᐅᑭᐅᖅ;

ᓂᕿᑖᕈᑏᑦ: ᐃᑭᓐᓂᐹᑦ $6 266/ᐅᑭᐅᖅ;

ᐊᕐᕌᒍᑕᒫᑦ ᐊᐅᓪᓚᕈᑏᑦ: ᐊᒥᓲᓂᕐᐹᑦ 3 ᐃᓄᒃ ᐊᑐᓂ, ᐊᕐᕌᒍᑕᒫᑦ;

ᐃᓄᑐᖃᐅᒍᑎᑖᕐᑕᕈᑏᑦ: 6% ᐱᓇᓱᕝᕕᐅᑉ ᐃᑲᔪᕐᓯᒍᑎᖏᑦ

ᐃᒻᒥᒍᕐᑎᑐᑦ ᐃᒻᒪᖃᐅᑏᑦ

ᐃᓕᑕᕆᔭᐅᑦᓱᑎᒃ ᕿᑲᕐᓇᐃᑦ: 20 ᐅᓪᓗᐃᑦ ᐃᓚᐅᑎᓪᓗᒋᑦ 10 ᐅᓪᓗᐃᑦ ᕿᑎᖕᖒᑉ ᐅᓪᓗᖏᓐᓂ

ᕿᑲᑲᐃᓐᓇᕈᑏᑦ: 30 ᐅᓪᓗᐃᑦ/ᐅᑭᐅᖅ

ᐱᓇᓱᐊᕈᒪᐅᑎᑎᑦ ᑐᔫᑎᒋᓗᒋᑦ 5:00-ᖕᖑᓚᕐᑎᓇᒍ ᐅᓐᓄᓴᒃᑯᑦ, ᓯᑉᑎᒻᐱᕆ 2, 2025-ᒥ ᐅᕗᖓ:

ᐱᓇᓱᑦᑎᓕᕆᕕᐅᑉ ᐱᓇᓱᕝᕕᖓ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐊᓪᓚᑖᕐᕕᒥ ᐃᑦᓯᕕᖓ 9

ᑰᑦᔪᐊᖅ ᑯᐸᐃᒃ J0M 1C0

ᐊᓪᓚᕕᑦᓴᒥᒃ ᐊᐅᓪᓚᑎᑦᓯᒍᑎ (819) 964-2975

ᖃᕆᑕᐅᔭᒃᑯᑦ ᐊᓪᓚᑖᕐᕕᖓ: humanresources@krg.ca

ᑫᐋᔩ ᐊᑦᔨᒌᒥᒃ ᐱᕕᖃᕐᑎᓯᑦᓱᓂ ᐱᓇᓱᕝᕕᐅᕗᖅ. ᐊᖏᕈᑎᖓ ᑖᑦᓱᒪ ᒪᓕᑦᓱᒍ ᐊᒻᒪᓗ ᔭᐃᒥᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᑕ ᐊᖏᖃᑎᒌᓐᓂᖓ, ᖃᓄᐃᓕᖓᓂᖓ ᐊᑦᔨᒋᖕᖏᑐᐃᓐᓇᕆᐊᓕᖓ ᖁᕝᕙᕆᐊᕆᑦᓱᓂ ᐱᓇᓱᑦᑎᓯᓂᕐᒥᒃ ᐃᓄᓐᓂᒃ ᐃᓕᒐᓱᑦᑐᓂᒃ.

ᐱᓇᓱᒐᕐᑖᕋᓱᑦᑐᑦ ᐊᐱᕐᓱᑕᐅᓂᕐᒧᑦ ᓂᕈᐊᕐᑕᐃᑦ ᑭᓯᐊᓂ ᖃᐅᔨᑎᑕᐅᓛᕐᖁᑦ.