ᓴᓇᒋᐊᓕᓐᓂᒃ-ᐃᒻᒪᖃᐅᑦᓵᑎ - KRG

ᐱᓇᓱᒐᖅ ᒪᓂᔭᐅᔪᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG), ᑲᕙᒫᐱᒻᒪᕆᐅᑦᓱᓂ ᑎᒥᐅᔪᖅ ᐊᐅᓚᑦᓯᕕᓕᒃ ᑯᐯᒻᒥ ᓄᓇᒥᒃ 55° ᑕᕐᕋᖓᓂ, ᐱᓪᓗᑯᒋᐊᓕᑎᒍᑦ ᐃᑲᔪᕐᓯᒪᓂᕐᒥᒃ ᓄᐃᑕᑦᓯᕗᖅ 14-ᓄᑦ ᑕᕐᕋᒥ ᓄᓇᓕᓐᓄᑦ ᓄᓇᕕᒻᒥ.

KRG-ᑯᑦ ᑲᕙᒫᐱᓐᓂ ᐃᓄᓕᒫᓂᒃ ᓴᓇᒍᑦᔨᒍᑎᓂᒃ ᐱᓇᓱᕝᕕᖓ ᑲᒪᔨᐅᕗᖅ ᒪᑭᑕᑦᓯᓂᕐᒥᒃ ᑎᒥᐅᑉ ᐃᓪᓗᔪᐊᖏᓐᓂᒃ (ᐊᓪᓚᕕᓐᓂᒃ, ᐳᓖᓯᒃᑯᑦ ᐸᕐᓇᓀᕐᓯᕕᖏᓐᓂᒃ, ᒥᕝᕕᓂᒃ, ᐱᓇᓱᑦᑏᑦ ᐃᓪᓗᖏᓐᓂᒃ, ᐊᓯᖏᓐᓂᓗ) ᐊᒻᒪᓗ ᓄᐃᑕᑦᓯᓂᕐᒥᒃ ᐱᓪᓗᑯᒋᐊᓕᑎᒍᑦ ᐃᑲᔪᕐᓂᒥᒃ 14-ᓄᑦ ᑕᕐᕋᒥ ᓄᓇᓕᓐᓄᑦ ᐃᓕᖓᑎᓪᓗᒍ ᐃᖏᕐᕋᑎᑦᓯᓂᕐᒧᑦ ᐊᒻᒪᓗ ᒪᑭᑕᑦᓯᓂᕐᒧᑦ ᓱᖃᑦᓯᕕᓐᓂᒃ ᐃᓪᓗᔪᐊᓂᒃ (ᓯᐊᕐᕆᔭᕐᕖᑦ, ᐳᐃᑦᔪᕖᑦ, ᐃᙯᓕᓴᕐᕖᑦ, ᐊᒻᒪᓗ ᓄᓇᓕᓐᓂ ᐱᖕᖑᐊᕖᑦ). ᑲᔪᓯᑎᑦᓯᓂᐊᕋᒥᒃ ᐱᔭᑦᓴᓂᒃ ᐊᑦᑐᐊᔪᓂᒃ ᖁᓛᓂ ᐅᖃᕐᑕᐅᔪᓄᑦ ᑲᒪᒋᒋᐊᓕᓐᓄᑦ, KRG-ᑯᑦ ᐅᓪᓗᒥ ᕿᓂᕐᑐᑦ ᐃᓄᒻᒥᒃ ᐃᓐᓄᐃᔪᑦᓴᒥᒃ ᐆᒥᖓ ᐱᓇᓱᒐᕐᒥᒃ:

ᓴᓇᒋᐊᓕᓐᓂᒃ-ᐃᒻᒪᖃᐅᑦᓵᑎ

(ᐃᓕᒣᓐᓇᓚᖓᔪᖅ)

ᓴᓇᔪᓂᒃ ᓴᖑᐊᑦᓯᔨᒥᒃ ᑐᓴᕐᑎᓯᖃᑦᑕᓗᓂ, ᓴᓇᒋᐊᓕᓐᓂᒃ ᐃᒻᒪᖃᐅᑦᓵᑎ ᑲᒪᔨᐅᕗᖅ ᐋᕐᕿᓱᐃᓂᕐᒥᒃ ᐊᑭᓂᒃ ᐃᒻᒪᖃᐅᑦᓵᕈᑎᓂᒃ, ᑐᕌᒐᑦᓴᓂᒃ ᐊᒻᒪᓗ ᐅᓪᓗᓯᐅᑎᓂᒃ ᓴᓇᓂᕐᒧᑦ ᐊᒻᒪᓗ ᓇᑉᐸᑎᕐᓯᒪᔪᓂᒃ ᐱᓇᓱᒍᑎᓄᑦ ᑲᔪᓯᑎᑕᐅᔪᓄᑦ 14-ᓂ ᓄᓇᕕᐅᑉ ᑕᕐᕋᒥ ᓄᓇᓕᖏᓐᓂ.

ᐱᓇᓱᐊᒐᖏᑦ:

• ᕿᒥᕐᕈᓂᖅ ᐃᓪᓗᓭᑦ ᓴᓇᒻᒪᖏᑕᓗ ᐊᓪᓚᖑᐊᕐᓯᒪᓂᖏᓐᓂᒃ, ᓱᕐᖄᑎᕐᓯᒪᓂᖏᓐᓂᒃ ᐊᓯᖏᓐᓂᓗ ᐊᓪᓚᓯᒪᔪᓂᒃ ᐋᕐᕿᓱᐃᓗᓂ ᐊᑯᓂᕆᓂᐅᑉ, ᐊᑭᑐᓂᐅᑉ, ᐊᑐᕆᐊᓖᑦ, ᐊᒻᒪᓗ ᐱᓇᓱᑦᑎᖃᕆᐊᖃᕐᓂᐅᑉ ᐃᒻᒪᖃᐅᑦᓵᕈᑎᖏᓐᓂᒃ;

• ᐊᑐᖃᑦᑕᓂᖅ ᓇᔪᕐᑕᐅᔪᓂᒃ ᐳᓚᕋᐅᑎᓂᒃ ᐱᓇᓱᖃᑎᖃᕐᓗᓂᓗ ᓴᓇᒻᒪᓕᐅᕐᑎᓂᒃ, ᐃᓪᓗᓴᓕᐅᕐᑎᓂᒃ, ᐊᒻᒪᓗ ᐱᓇᓱᑦᑕᐅᔪᒥᒃ ᑲᒪᔨᒻᒪᕆᓐᓂᒃ ᕿᒥᕐᕈᖃᑎᒋᓗᒋᑦ ᐱᓇᓱᑦᑕᐅᔪᒧᑦ ᓂᐳᕐᑎᑕᐅᒋᐊᓕᓐᓂᒃ.

• ᐱᕙᓪᓕᐊᓂᖅ ᓱᓇᒥᑦᓯᓯᐊᕐᑐᓂᒃ ᐱᓇᓱᐊᑦᓴᒥᒃ ᐃᒻᒪᖃᐅᑦᓵᕈᑎᓂᒃ ᐃᓚᖃᕐᑎᓗᒋᑦ ᖃᓄᐃᓪᓗᐊᓂᐅᒋᐊᓕᓐᓂᒃ, ᐊᑭᓂᒃ, ᑑᒃᑲᕆᓕᐅᑦᑐᑦ ᐱᓇᓱᑦᑎᒉᑦ ᐊᑭᒋᒍᒪᔭᖏᓐᓂᒃ, ᐊᒻᒪᓗ ᐃᒻᒪᖃᐅᑎᖃᕆᐊᖃᕐᓂᒥᒃ ᐃᓱᒪᒍᑎᓂᒃ.

• ᑲᖕᖑᓇᕿᓂᖅ ᐊᒻᒪᓗ ᐃᑉᐱᒋᔭᖃᕐᓂᖅ ᐊᑭᖏᑦᑕ ᐊᓯᑦᔨᕈᑎᖏᓐᓂᒃ ᐱᓇᓱᐊᑦᓴᐅᑉ ᑲᔪᓯᑎᑕᐅᓂᓕᒫᖓᓂ ᐊᒻᒪᓗ ᓄᑕᐅᓯᓕᑎᕆᖃᑦᑕᓂᖅ ᐃᒻᒪᖃᐅᑦᓵᓯᒪᐅᑎᖏᓐᓂᒃ ᑌᒣᒋᐊᖃᕐᓂᖅ ᒪᓕᓪᓗᒍ.

• ᐃᑲᔪᕐᓂᖅ ᐋᕐᕿᓱᐃᖃᑕᐅᓗᓂ ᐊᑭᑭᓐᓂᓯᐅᕈᑏ ᐊᓪᓚᖁᑎᖏᓐᓂᒃ ᐊᒻᒪᓗ ᑲᖕᖑᓇᕿᖃᑕᐅᓗᓂ ᐊᑭᑦᓴᓕᐊᖑᔪᓂᒃ.

• ᐃᑲᔪᕐᓯᒪᓂᖅ ᐱᕙᓪᓕᐊᑎᑦᓯᓂᕐᒥᒃ ᐱᓇᓱᐊᑦᓴᓄᑦ ᑐᕌᒐᑦᓴᓂᒃ, ᑮᓇᐅᔦᑦ ᐃᖏᕐᕋᓂᑦᓴᖏᓐᓂᒃ, ᐊᒻᒪᓗ ᓴᓇᓂᐅᑉ ᐅᓪᓗᓴᖏᓐᓂᒃ.

• ᑐᑭᒧᐊᒍᑎᑎᑦᓯᓂᖅ ᐱᖁᑎᓕᕆᓂᕐᒥᒃ ᐊᒻᒪᓗ ᑮᓇᐅᔭᓕᕆᓂᕐᒥᒃ ᐱᓇᓱᑦᑎᓂᒃ ᓱᕐᖁᐃᕆᐊᕐᓗᓂ ᐊᑭᒋᔭᐅᔪᑦ ᐊᖏᖃᑕᐅᓂᖓᓂᒃ ᐊᒻᒪᓗ ᒪᓕᒐᒃᑰᓂᖏᓐᓂᒃ.

• ᐱᑕᖃᕐᑎᓯᓂᖅ ᖃᐅᔨᒪᒍᑎᑯᕕᒻᒥᒃ ᐃᓕᖓᔪᒥᒃ ᓯᕗᓪᓕᓂᑕᕐᓄᑦ ᐊᑭᒋᔭᐅᓯᒪᔪᓄᑦ ᐊᒻᒪᓗ ᐃᑲᔪᕐᑐᓂᖅ ᐱᓯᑎᖕᖑᐸᓪᓕᐊᖏᓐᓇᓕᒫᕐᓂᒥᒃ ᐃᒻᒪᖃᐅᑦᓵᕈᑎᓕᐅᕐᓂᐅᑉ ᐱᐅᓯᖏᓐᓄᑦ.

• ᐱᓇᓱᖃᑦᑕᓂᖅ ᓇᐅᑐᐃᓐᓇᓂᒃ ᐊᓯᖏᓐᓂᒃ ᐱᔭᑦᓴᓂᒃ ᐊᖓᔪᕐᖄᖓᑕ ᐱᒋᐊᖃᕐᑎᑕᖏᓐᓂᒃ.

ᐱᔪᓐᓇᓯᒍᑏᑦ:

• ᐃᓕᓐᓂᐊᓯᒪᒍᑎ ᐃᓕᓐᓂᐊᕕᒻᒪᕆᒻᒥ ᐃᓕᓐᓂᐊᕈᑎᓂᒃ (DEC) ᐅᕝᕙᓘᓐᓃᑦ ᐃᓕᑦᓯᒪᐅᑎ ᓴᓇᔨᓂᒃ ᐊᐅᓚᑦᓯᓂᕐᒥᒃ, ᓄᓇᓕᑦᓯᐅᑎᓂᒃ ᓴᓇᒻᒪᓕᐅᕐᓂᒥᒃ, ᐅᕝᕙᓘᓐᓃᑦ ᐊᑦᑐᐊᔪᒥᒃ ᐱᓇᓱᒐᕐᒥᒃ.

• ᐃᑭᓐᓂᐹᖓᓄᑦ ᑕᓪᓕᒪᓂᒃ (5) ᐊᕐᕌᒍᓂᒃ ᐱᓇᓱᓕᓂᐅᓂᖅ ᐊᑭᓂᒃ ᐃᒻᒪᖃᐅᑦᓵᑎᐅᓂᕐᒥᒃ, ᐱᐅᓂᕐᓴᐅᑎᓪᓗᒍ ᐃᓪᓗᔪᐊᓂᒃ ᓇᑉᐸᑎᕐᓯᒪᔪᓂᓪᓘᓃᑦ ᓴᓇᓂᕐᒧᑦ ᐃᓕᖓᑉᐸᑦ.

• ᖃᐅᔨᒪᑦᓯᐊᓂᖅ ᐃᒻᒪᖃᐅᑦᓵᕈᑎᓂᒃ ᖃᕆᑕᐅᔭᒃᑯᑦ ᐱᓇᓱᐊᕈᑎᓂᒃ ᓴᓇᕐᕈᑎᓂᓪᓗ (ᐃᒫᒃ, MS Excel, AutoCAD, Bluebeam, ᐊᑦᔨᐸᓱᖓᓂᓪᓘᓃᑦ).

• ᐊᑐᐊᕐᓯᒍᓐᓇᓂᖅ ᑐᑭᓯᓗᓂᓗ ᐱᓪᓗᑯᓕᕆᔪᓂᒃ ᐊᓪᓚᖑᐊᕐᓯᒪᐅᑎᓂᒃ ᐊᒻᒪᓗ ᐊᖏᓂᓕᑦᑖᕈᑎᓂᒃ.

• ᓂᑲᓇᖕᖏᓂᖅ ᑭᓯᒍᑎᓂᒃ ᐊᒻᒪᓗ ᑐᑭᓯᓂᐊᕐᓂᒥᒃ ᐱᔪᓐᓇᓂᒃᑯᑦ.

• ᐅᖃᖃᑕᐅᒍᓐᓇᓯᐊᕐᓂᖅ ᐃᑭᓐᓂᐹᖓᓄᑦ ᒪᕐᕈᐃᓄᑦ ᒪᑯᐊ ᐅᖃᐅᓰᑦ ᓇᓪᓕᖏᓐᓄᑦ: ᐃᓄᒃᑎᑐᑦ, ᖃᓪᓗᓈᑎᑐᑦ ᐊᒻᒪᓗ ᐅᐃᒍᐃᑎᑐᑦ.

• ᑕᑯᑦᓴᕈᐃᓯᒪᓂᖅ ᓱᓇᓪᓗᑯᐊᐱᓐᓂᒃ ᐃᑉᐱᒍᓱᑦᓯᐊᓂᕐᒥᒃ ᐊᒻᒪᓗ ᓇᓚᐅᑦᓯᑲᑦᑕᓯᑎᐅᓂᕐᒥᒃ.

• ᐱᓇᓱᒋᐅᕐᓂᐅᓂᖅ ᐃᒻᒥᓂᕿᓗᓂ ᐊᒻᒪᓗ ᐊᔭᐅᕐᑕᐅᓗᓂ ᐱᔭᕇᖁᓗᒍ ᐱᕕᑦᓴᑭᑦᑑᑎᓪᓗᒍ.

• ᐊᖏᕐᓯᒪᓂᖅ ᐊᐅᓚᖃᑦᑕᓚᖓᓗᓂ ᓄᓇᕕᒻᒧᑦ ᐊᒻᒪᓗ ᑐᔪᕐᒥᐅᖃᑦᑕᓚᖓᓗᓂ ᐃᓄᑑᕕᐅᖕᖏᑐᓂ.

• ᓯᕗᓂᐊᒍᑦ ᐱᓇᓱᑦᓯᒪᒍᓂ 55° ᑕᕐᕋᖓᓂ ᐃᓱᐊᖁᑕᐅᕗᖅ.

ᐱᓇᓱᕝᕕᐅᑉ ᐃᓂᖓ: ᑰᔾᔪᐊᒥ, ᑯᐯᒃ

ᑮᓇᐅᑦᔭᓵᖏᑦ ᐃᑭᓐᓂᐹᖓᓄᑦ $52,481 - ᐅᓄᕐᓂᐹᖓᓄᑦ $89,256 ᐊᕐᕌᒍᒥ (ᐳᕐᑐᓂᖅ 8)

ᐱᕙᓪᓕᖁᑎᖏᑦ: ᐃᓅᒐᓱᐊᕈᑎᓄᑦ ᐃᑲᔫᑏᑦ : $8,500 ᐊᕐᕌᒍᑕᒫᑦ (ᐃᑭᓐᓂᐹᕆᔭᐅᑎᓗᒋᑦ);

ᓂᕿᓄᑦ ᐃᑲᔫᑎᖏᓐᓂᒃ: $4 216 ᐊᕐᕌᒍᑕᒫᑦ (ᐃᑭᓐᓂᐹᕆᔭᐅᑎᓗᒋᑦ);

ᖃᖓᑦᑕᐅᑏᑦ: ᐊᑕᐅᓯᖅ ᐃᓄᒃ ᖃᖓᑦᑕᐅᑎᑖᕈᓐᓇᑐᖅ ᐱᖓᓱᓂᑦ ᐊᕐᕌᒍᑕᒫᑦ

ᐊᕐᕌᒍᑕᒫᑦ ᐱᓪᓗᖁᑎᑖᕐᑕᐅᑏᑦ ᐃᓚᐅᑎᓪᓗᒋᑦ ᐱᔭᕆᐊᑭᓪᓕᑎᕐᓯᒪᔪᑦ ᐃᑦᑑᓂᐅᑎᑦᓭᑦ

ᕿᑲᑫᓐᓇᕈᓐᓇᓗᓂ: 20-ᓂᒃ ᐅᓪᓗᓂᒃ;

ᐱᓇᓱᓐᓇᐅᖏᑦᑐᐃᑦ ᐅᓪᓗᖏᑦ: 20 ᐅᓪᓗᐃᑦ, ᐃᓚᖃᕐᑎᓗᒋᑦ 10-ᓂᒃ ᖁᕕᐊᓱᕝᕕᓯᐅᕐᓂᒧᑦ.

ᐱᓇᓱᒍᒪᐅᑎᑎᑦ ᖃᓪᓗᓈᑎᑑᕐᑎᓗᒋᑦ ᑎᑭᑎᓗᒋᑦ ᐅᕗᖓ ᑐᕌᕈᑎᒧᑦ:

Human resources:

Kativik Regional Government

P.O Box 9

Kuujjuaq QC J0M 1C0

Fax: 819-964-2675

Email: humanresources@krg.ca

KRG-ᑯᑦ ᐊᑦᔨᒌᒥᒃ ᐱᕕᖃᕐᑎᓯᑦᓱᑎᒃ ᐱᓇᓱᕝᕕᐅᕗᑦ. ᑕᒪᓐᓇ ᒪᓕᑦᓱᒍ ᐊᒻᒪᓗ ᒪᓕᒻᒥᓱᓂ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥᒃ, ᐃᓂᓪᓚᕈᑕᐅᔪᑦ ᐊᑦᔨᒌᖕᖏᑐᐃᓐᓇᕆᐊᓖᑦ ᑫᓪᓗᐊᕈᑕᐅᓗᑎᒃ ᐃᓄᐃᑦ ᐱᓇᓱᒍᒪᔪᑦ ᐱᓇᓱᒐᕐᑖᓂᖓᓂᒃ.

ᐱᓇᓱᒍᒪᔪᑦ ᐃᒻᒧᐊᓂᒃ ᐊᐱᕐᓱᕈᒪᓗᒋᑦ ᓂᕈᐊᕐᑕᐅᔪᑦ ᑭᓯᐊᓂ ᐊᓪᓚᓯᒪᔪᑎᒍᑦ ᑭᐅᔭᐅᓚᖓᔪᑦ.