ᑐᖓᓕᖓ ᐊᖓᔪᕐᖄᑉ ᐊᐅᓚᑦᓯᔨᐅᓂᕐᒥᑦ ᓄᓇᕕᒻᒥ ᐳᓖᓰᑦ ᐱᔪᑦᔨᔨᖏᑦ (NPS) - KRG

ᐱᓇᓱᒐᑦᓴᖅ ᐊᑐᐃᓐᓇᕈᕐᑐᖅ

ᐃᓗᐊᒍᑦ / ᓯᓚᑖᒍᑦ ᓄᐃᑕᐅᔪᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG) ᐊᒥᓱᐃᓕᖓᔪᒥᑦ-ᑲᕙᒫᐱᒃᑯᓄᑦ ᑎᒥᐅᔫᔪᖅ ᒪᓕᒐᓕᐅᕐᕕᖃᕐᓱᓂ ᑯᐯᒃ ᓄᓇᖓᓂᒃ 55 ᑕᕐᕋᖓᓃᑦᑐᓂᒃ. KRG-ᑯᑦ ᒫᓐᓇᐅᑎᓪᓗᒍ ᕿᓂᓕᕐᒥᔪᑦ ᐱᓇᓱᒐᔭᕐᑐᒥᒃ ᓲᖑᔪᑦᓯᐊᒥᑦ ᐱᒍᓐᓇᓂᖃᕐᑐᒥᒃ ᓯᕗᓕᕈᓐᓇᓂᖃᑦᓯᐊᑐᒥᑦ ᐱᓇᓱᒐᔭᕐᓗᓂ ᑰᑦᔪᐊᒥ ᐃᒣᓘᕐᑎᐅᓂᕐᒥ:

ᑐᖓᓕᖓ ᐊᖓᔪᕐᖄᑉ ᐊᐅᓚᑦᓯᔨᐅᓂᕐᒥᑦ

ᓄᓇᕕᒻᒥ ᐳᓖᓰᑦ ᐱᔪᑦᔨᔨᖏᑦ (NPS)

(2-ᐊᕐᕌᒎᓐᓂᒃ ᐱᒍᑦᔨᐅᑎᒃᑯᑦ, ᐊᑌᓐᓇᑐᖅ)

ᐱᓇᓱᒐᕐᑖᑐᖅ ᐃᓂᖓᑕ ᑐᖓᓕᐅᑉ ᐋᖓᔪᕐᖄᑉ ᐊᐅᓚᑦᓯᔨᐅᓂᕐᒥᒃ ᐱᒍᓐᓇᓂᖃᕆᐊᓕᒃ ᐊᑕᖐᔪᒥᒃ ᖃᓄᕐᑑᕈᓐᓇᓂᕐᒥ ᑕᑯᓐᓇᒍᓐᓇᕕᖃᕆᐊᓕᒃ ᐊᒻᒪᓗ ᑐᑭᓯᒪᓂᖃᑦᓯᐊᓗᓂ ᐃᓄᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ ᐊᑦᓱᕉᑎᒋᔭᐅᓲᓂᒃ ᓄᓇᕕᓕᒫᒥᑦ. ᐅᑭᐅᕐᑕᑐᒥᒃ ᓇᓗᓀᕐᑕᐅᕕᓕᒻᒥᑦ ᐅᐸᑲᓪᓚᓇᖕᖏᑑᒋᐊᖓᓂᒃ, ᐃᓕᕐᖁᓯᕐᑎᒍᑦ ᖃᓄᐃᓕᖓᐅᓯᖃᓪᓚᕆᑦᑐᓂᒃ, ᐊᒻᒪᓗ ᐊᑦᔨᐅᖏᑦᑐᓂᒃ ᐃᓄᓕᒫᓂᒃ ᐊᑦᑕᓇᕐᑌᓕᒪᓂᕐᒦᑎᑦᓯᒍᓐᓇᓂᕐᒥᒃ, ᐱᓇᓱᒐᕐᑖᑐᖅ ᑲᒪᒋᔭᖃᕋᔭᕐᑐᖅ ᐃᓘᓐᓇᓕᒫᖏᓐᓂᒃ ᐊᐅᓚᑦᓯᓂᕐᒧᑦ ᐱᓇᓱᐊᕐᑕᐅᒍᑎᖏᓐᓂᒃ NPS-ᑯᑦ, ᐃᓚᐅᑎᓪᓗᒋᑦ ᐃᖏᕐᕋᕋᔭᕐᓂᒥᒃ ᐱᓇᓱᐊᕐᑕᐅᒍᑎᖏᓐᓂᒃ ᐊᒻᒪᓗ ᐱᓗᑲᓐᓂᒥᒃ ᖃᐅᔨᓴᕈᓐᓇᓂᕐᓂᒃ, ᐱᕕᑦᓴᖃᕐᑎᓯᐊᕐᓗᒋᓗ ᐊᖏᓂᕐᐹᒥᒃ ᐋᕐᕿᓱᕐᓯᒪᐅᑎᖃᕐᑎᓯᓗᓂ ᐳᓖᓰᑦ ᐱᒍᑦᔨᐅᑎᒋᔭᖏᑎᒍᑦ ᐱᓇᓱᐊᕐᑕᐅᒍᑎᖏᓐᓂᒃ ᓄᓇᓕᐅᔪᓂᒃ.

ᐅᑯᐊ ᐱᓗᐊᕐᑎᓗᒋᑦ, ᐱᓇᓱᒐᕐᑖᑐᖅ ᑲᒪᒋᔭᖃᕋᔭᕐᑐᖅ ᐅᑯᓂᖓ ᐱᔭᑦᓴᓂᒃ:

• ᐸᕐᓇᖃᑦᑕᓗᓂ, ᑐᑭᒧᐊᑦᑎᓯᖃᑦᑕᓗᓂ, ᐊᒻᒪᓗ ᐊᐅᓚᑦᓯᖃᑦᑕᓗᓂ ᐃᖏᕐᕋᕋᔭᕐᓃᑦ ᐱᓇᓱᐊᕐᑕᐅᒍᑎᖏᓐᓂᒃ, ᐱᓗᑲᓐᓂᒥᒃ ᖃᐅᔨᓴᕐᓂᓂᒃ, ᐊᒻᒪᓗ ᐱᓗᑲᓐᓂᒧᑦ ᐃᓱᒪᑐᔫᓂᕐᔪᓕᖓᔪᒃ ᐱᓇᓱᐊᒐᑦᓴᓂᒃ

• ᑭᐅᒍᑎᖃᖃᑦᑕᓗᓂ ᖃᓄᕐᑑᕆᓂᒃᑯᑦ, ᐊᕐᖁᑎᒋᓗᒋᑦ ᐊᐅᓚᑦᔭᒋᐊᕐᓃᑦ ᐊᒻᒪᓗ ᑐᑭᑖᕆᖃᑦᑕᓃᑦ, ᐱᓗᑲᓐᓂᒨᓕᖓᔪᑦ ᐊᓯᑦᔨᐸᓪᓕᐊᓂᖏᓐᓄᑦ, ᓄᓇᓖᑦ ᑭᖕᖒᒪᒋᔭᖏᓐᓄᑦ, ᐊᒻᒪᓗ ᐊᑕᖐᔪᒥᑦ ᐃᓄᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᓄᑦ

• ᐃᑲᔪᕐᓯᓗᓂ ᐱᕙᓪᓕᐊᔭᐅᓂᖏᓐᓄᑦ NPS-ᑯᑦ ᖃᓄᕐᑑᕈᑎᖏᑦᑕ ᐸᕐᓇᓯᒪᐅᑎᖏᓐᓄᑦ ᐃᑲᔪᖃᑎᒌᖃᑎᖃᕐᓗᓂ ᐊᓯᖏᓐᓂᒃ ᐃᓚᐅᔪᓂᒃ ᐊᖓᔪᕐᖃᐅᑎᐅᖃᑎᒥᑕ ᐊᐅᓚᑦᓯᔨᐅᔪᓄᑦ ᐊᒻᒪᓗ ᐊᑐᓕᕐᑎᓯᑦᓯᐊᖃᑦᑕᓗᓂ ᑲᒪᒋᒋᐊᓕᒻᒥᓂᒃ

• ᓄᐊᖃᑦᑕᓗᒋᑦ ᑭᓯᑦᓯᓕᕆᐅᑎᖏᑦ ᐊᑐᐃᓐᓇᕈᕐᑎᖃᑦᑕᓗᒋᓗ ᐊᑦᔨᒌᖕᖏᑐᑦ ᐊᐅᓚᑦᓯᓂᓕᕆᓂᐅᑉ ᑐᓴᒐᑦᓴᖁᑎᖏᑦ

• ᐋᕐᕿᓱᐃᓗᓂ ᐃᑉᐱᒋᑦᓯᐊᖏᓐᓇᓗᒋᓗ ᐱᐅᔪᓂᒃ ᐃᓚᖃᐃᓐᓇᕋᓱᐊᕆᐊᖃᕐᓂᖅ ᐃᓄᓕᒫᓂᒃ, KRG-ᑯᑦ ᐊᖓᔪᕐᖃᐅᑎᖏᓐᓂᒃ, ᓄᓇᓕᐅᑉ ᓂᕈᐊᕐᑕᐅᓯᒪᔪᖁᑎᖏᓐᓂᒃ, ᐊᒻᒪᓗ ᑭᒡᒐᑐᕐᑎᖏᓐᓂᒃ ᐊᑦᔨᒌᖕᖏᑐᓄᑦ ᓄᓇᓕᐅᑉ ᑲᕙᒪᐃᓪᓗ ᑎᒥᖁᑎᒋᔭᖏᓐᓃᑐᓂᒃ

• ᑐᓴᐅᒪᖃᑎᒌᖃᑎᖃᕐᓗᓂ ᑐᑭᑖᕈᑕᐅᓯᒪᔪᓂᒃ ᒪᓕᒐᕐᓂᓗ ᐱᓇᓱᑦᑎᖁᑎᒥᓄᑦ ᐊᖓᔪᕐᖃᐅᕕᒋᔭᕐᒥᓄᑦ ᒪᓕᑦᑕᐅᑎᑦᓯᐊᓗᒋᓗ;

• ᑐᓂᓯᓯᒪᓗᓂ ᐱᒐᓱᐊᒻᒪᕆᑦᑐᓂᒃ ᐊᖓᔪᕐᐊᕐᖃᐅᑎᐅᒍᑎᒥᓂᒃ ᐱᓇᓱᑦᑎᖁᑎᒥᓄᑦ ᐊᒻᒪᓗ ᐱᕕᑦᓴᖃᕐᑎᑕᐅᑎᑦᓯᐊᓗᒋᑦ ᐱᐅᓂᓕᓐᓂᒃ ᐳᓖᓰᑦ ᐱᑦᔪᔭᐅᒍᑎᖏᓐᓂᒃ ᑐᓂᔭᐅᕙᑦᑐᓂᒃ ᓄᓇᓕᓐᓄᑦ ᓯᕗᓪᓕᐸᐅᑎᑕᐅᖏᓐᓇᑎᑦᓯᐊᓗᒋᑦ

• ᖃᐅᔨᓴᖃᑦᑕᓗᒋᑦ ᐱᓇᓱᑦᑏᑦ ᐱᓇᓱᐊᕐᓂᕆᔭᖏᑦ ᑕᓯᐅᕐᓯᓯᐊᖃᑦᑕᓗᒋᑦ, ᐃᑲᔪᖃᑦᑕᓗᒋᑦ ᐅᖃᐅᑦᔨᑐᑦᓯᐊᖃᑦᑕᓗᒋᓗ

• ᓇᓗᓀᔭᖃᑦᑕᓗᒋᑦ ᐱᒋᐅᕐᓴᔭᐅᒋᐊᖃᕐᓂᖏᑦ ᐱᒍᓐᓇᓂᖏᑦᑕᓗ ᐱᕙᓪᓕᐊᔭᐅᒋᐊᖃᕐᓂᒧᑦ ᑭᖕᖒᒪᒋᔭᖏᑦ ᐱᓇᓱᑦᑎᖁᑎᖏᑦᑕ ᐊᖓᔪᕐᖃᐅᕕᐅᕕᒋᔭᖏᑦ ᐊᒻᒪᓗ ᐋᕐᕿᓱᐃᓗᓂ ᐱᓇᓱᑦᑎᓕᕆᕕᐅᑉ ᐱᕙᓪᓕᐊᔭᐅᒍᑎᖏᑦᑕ ᐸᕐᓇᓯᒪᐅᑎᖏᑦ

• ᐱᕕᑦᓴᖃᕐᑎᓯᐊᕐᓕᒋᑦ ᐊᑦᓱᕉᑕᐅᒋᐊᖃᕐᓂᖏᑦ ᐊᐅᓚᑕᐅᒍᑎᖏᑦ ᑮᓇᐅᔭᓕᕆᓂᕐᒧᑦ ᐱᑦᓴᑕᖃᕈᑏᑦ ᐊᒻᒪᓗ ᒪᓕᑦᓯᐊᓗᒋᑦ ᐃᓕᔭᐅᓯᒪᔪᑦ ᑐᕌᒐᐃᑦ ᐊᓪᓚᕕᑦᓴᖁᑎᖏᑦ.

ᑎᒃᑯᐊᑕᐅᓯᒪᔪᖅ ᐱᓇᓱᒐᕐᑖᕋᓱᐊᕐᑐᖅ ᐅᑯᓂᖓ ᐱᑕᖃᕆᐊᓕᒃ:

• ᐃᓕᓐᓂᐊᕕᕐᔪᐊᒥ ᐃᓕᓐᓂᐊᕇᕐᓯᒪᓂᕐᒥᒃ ᐃᓕᑕᕆᔭᐅᒍᑎᖃᕐᓗᓂ ᐱᓇᓱᒐᕐᒥᓅᓕᖓᔪᓂᒃ, ᐱᓗᐊᕐᑐᒥᒃ ᐊᐅᓚᓯᔨᐅᓂᕐᒥᒃ, ᐊᐅᓚᑦᓯᓂᓕᕆᓂᕐᒥᒃ, ᐅᕝᕙᓘᓐᓃᑦ ᐊᑦᔨᐸᓱᖓᓂᒃ ᐱᓇᓱᒐᐅᔫᑉ; ᐃᓕᓐᓂᐊᕇᕐᓯᒪᐅᑎᒻᒪᕆᖃᕐᓂᖅ ᐱᐅᒋᔭᐅᒐᔭᕐᑐᖅ. ᐱᓇᓱᑦᓯᒪᓗᓂ ᖁᓕᓪᓗ ᑕᓪᓕᒪᓗᓂᒃ (15) ᐊᕐᕌᒍᕐᓂᒃ ᐊᑑᑎᔭᐅᓯᒪᔭᕆᐊᓕᓐᓂᒃ ᐳᓖᓯᐅᓂᕐᒥᒃ ᐱᓇᓱᑦᓯᒪᓂᕐᒥᒃ, ᐃᓚᐅᑎᓪᓗᒋᑦ ᐃᑭᓐᓂᐸᐅᑎᓪᓗᒋᑦ ᑕᓪᓕᒣᑦ (5) ᐊᕐᕌᒍᕐᓂᒃ ᐊᐅᓚᑦᓯᔨᐅᓯᒪᓂᖅ. ᓇᓪᓕᖁᐊᖏᓐᓂᒃ ᑕᒪᒃᑮᑐᓂᒃ ᐃᓕᓐᓂᐊᓯᒪᓗᓂ ᐱᓇᓱᑦᓯᒪᓗᓂ ᐃᓱᒪᒋᔭᐅᒍᑎᒋᑐᐃᓐᓇᕆᐊᓕᖏᑦ

• ᐱᓇᓱᒐᕐᑖᓂᕐᒧᑦ ᐱᔭᐅᓯᒪᒋᐊᓕᓐᓂᒃ ᐱᓯᒪᓗᓂ ᐋᕐᕿᓱᕐᑕᐅᓯᒪᔪᓂᒃ ᐳᓖᓰᑦ ᒪᓕᒐᖁᑎᖏᓐᓃᑐᑦ

• ᓄᐃᑕᑎᑦᓯᒍᓐᓇᕕᖃᕐᓗᓂ ᐊᐅᓚᑦᔦᒋᐊᕈᓐᓇᓂᕐᒥᓂᒃ ᐊᒻᒪᓗ ᓯᕗᓕᕈᓐᓇᓂᕐᒥᓂᒃ ᐱᓇᓱᐊᖃᑎᒥᓂᒃ, ᑲᔪᓯᑦᓯᐊᑐᒥᑦ ᐊᐅᓚᑦᓯᒍᓐᓇᓗᓂ ᐱᓇᓱᑦᑎᓂᒃ, ᐱᖁᑎᓂᒃ, ᐊᒻᒪᓗ ᑮᓇᐅᔭᓕᕆᓂᐅᑉ ᐱᑦᓴᑕᖃᕈᑎᖏᓐᓂᒃ, ᐱᕕᑦᓴᖃᕈᑎᒋᑦᓯᐊᓗᒋᑦ ᐊᑦᓱᕈᕐᑐᒥᒃ ᑐᕌᒐᕐᓂᑦ ᐊᐅᓚᑦᓯᓂᖅ, ᐱᕙᓪᓕᐊᕈᓐᓇᓗᓂ ᐃᓂᓪᓚᑎᕆᒍᓐᓇᓂᕐᒥᒃ, ᐊᒻᒪᓗ ᓂᕆᐅᒋᔭᖃᖃᑦᑕᓗᓂ ᓄᐃᑐᐃᓐᓇᕆᐊᓕᓐᓂᒃ ᐊᓯᑦᔨᑐᐃᓐᓇᕆᐊᓕᓐᓂᓗ

• ᓄᐃᑕᑎᑦᓯᒍᓐᓇᓗᓂ ᓯᕗᓕᕐᓂᒥᑦ, ᑕᑯᓐᓇᓯᐊᕐᓂᖃᕐᓂᒥᒃ, ᑐᑭᑖᕆᑦᓯᐊᒍᓐᓇᓂᕐᒥᒃ, ᐃᓄᓕᕆᒍᓐᓇᕕᖃᑦᓯᐊᓗᓂ, ᐊᒻᒪᓗ ᐳᕐᑐᔪᒥᑦ ᐱᔪᓐᓇᐅᑎᖃᕐᓂᑯᑦ ᐱᐅᓯᖃᑦᓯᐊᕈᓐᓇᓗᓂ, ᐊᒻᒪᓗ ᓲᖑᔪᒥᒃ ᑲᒪᒋᒋᐊᓕᒻᒥᓂᒃ ᐃᑉᐱᒍᓱᑦᓯᐊᕈᓐᓇᓗᓂ, ᓵᑕᑦᓴᐅᒍᓐᓇᓗᓂ, ᐊᒻᒪᓗ ᑎᒥᐅᔪᒧᑦ ᑐᓂᓯᒪᑦᓯᐊᓗᓂ

• ᓄᐃᑕᑎᑦᓯᒍᓐᓇᓗᓂ ᓲᖑᔪᒥᑦ ᑐᓴᐅᒪᖃᑎᒌᒍᓐᓇᓂᕐᒥᒃ, ᐊᖏᖃᑎᒌᒐᓱᐊᕈᓐᓇᓂᕐᒥᑦ, ᐊᒻᒪᓗ ᐊᓯᑦᔩᒍᓐᓇᕕᖃᕐᓗᓂ ᐊᐅᓚᑦᓯᔨᐅᓂᕐᒥᑕ ᐱᒍᓐᓇᖃᕈᑎᒋᒋᐊᓕᖏᓐᓂᒃ, ᐃᓚᒋᔭᐅᑎᓪᓗᒍ ᐱᒍᓐᓇᓂᖃᕐᓂᖅ ᑫᓪᓗᑐᐃᒍᓐᓇᕕᖃᕐᓗᓂ ᐊᐅᓚᑦᔦᒋᐊᕈᓐᓇᕕᖃᕐᓗᓂᓗ ᐃᓚᐅᔫᔪᓂᒃ ᓇᓗᓇᕐᓯᒍᓐᓇᑐᓂᒃ ᑎᒥᐅᔫᑉ ᐱᓇᓱᐊᕐᕕᖃᕐᓂᖓᑕ ᐊᑦᔨᒌᖕᖏᑐᓂᒃ

• ᓄᐃᑕᑎᑦᓯᒍᓐᓇᓗᓂ ᓲᖑᔪᑦᓯᐊᒥᒃ ᐱᒍᓐᓇᓂᕐᒥᓂᒃ ᐱᓇᓱᖃᑎᖃᕐᓂᑯᑦ ᐃᓗᐊᒎᕐᑐᓂᒃ ᓯᓚᑖᒎᕐᑐᓂᓪᓗ ᐃᓚᐅᔫᔪᓂᒃ, ᐃᑲᔪᕐᓂᖓ ᐊᑑᑎᖃᕈᓐᓇᓯᐊᕐᓗᓂ, ᐊᒻᒪᓗ ᐱᓇᓱᖃᑎᒌᖏᓐᓇᓯᐊᕐᑎᓯᒍᓐᓇᓗᓂ

• ᐃᓚᓕᐅᑎᓗᒋᑦ ᖁᕝᕙᒋᐊᕐᑎᖃᑦᑕᓗᒋᓗ ᐱᓇᓱᒐᕐᒧᑦ ᐃᓗᓯᓕᕆᔭᐅᒍᑏᑦ ᐊᒻᒪᓗ ᐊᑦᑕᓀᑦᑑᓂᕐᒧᑦ ᐋᕐᕿᓱᕐᑕᐅᓯᒪᒍᑎᐅᔪᑦ

• ᓄᐃᑕᑎᑦᓯᒍᓐᓇᓗᓂ ᓲᖑᔪᑦᓯᐊᒥᑦ ᐅᖃᕈᓐᓇᓯᐊᕐᓂᒥᒃ ᐊᓪᓚᕈᓐᓇᓯᐊᕐᓂᒥᓪᓗ ᖃᓪᓗᓈᑎᑐᑦ ᐊᐅᓚᑦᓯᐊᒍᓐᓇᓂᐊᕐᓗᓂ ᐊᑑᑎᓂᖃᑦᓯᑐᒥᒃ ᐱᓇᓱᕝᕕᐅᑉ ᐃᓗᐊᓂ ᖃᓪᓗᓈᑎᑑᕐᓂᖅ ᐊᑐᕐᑕᐅᓂᐸᐅᓲᖑᓂᖓᓄᑦ

ᖃᐅᔨᒪᔭᐅᒋᐊᓕᒃ ᑖᓐᓇ ᐱᓇᓱᒐᖅ ᑐᖕᖓᕕᖃᕐᑎᓗᒍ ᑰᑦᔪᐊᒥ ᓅᑦᑎᒋᐊᖃᕋᔭᕐᓱᓂᓗ ᓄᓇᓕᖓᓄᑦ. ᐃᓚᒋᔭᖃᕐᒥᔪᖅ ᐊᐅᓪᓚᑲᑦᑕᒋᐊᖃᕐᓂᒥᒃ ᓄᓇᕕᒻᒥ ᐊᒻᒪᓗ ᓯᕿᓂᑦᑎᓄᑦ ᑯᐯᒃᒥ, ᐱᓗᐊᕐᑐᒥ ᑯᐯᒃ ᓯᑎᒧᑦ ᒪᓐᑐᔨᐊᒧᓪᓗ.

ᓇᓃᓐᓂᖓ ᐱᓇᓱᒐᐅᑉ: ᑰᑦᔪᐊᖅ.

ᑮᓇᐅᑦᔭᓵᖏᑦ: $210,757 ᐊᕐᕌᒍᑕᒫᑦ, ᐃᓚᖃᕐᓗᓂ ᐊᑑᑎᔭᐅᔭᕆᐊᓕᓐᓂᒃ ᐊᑭᓕᐅᑎᒋᐊᓪᓚᐅᔪᓂᒃ

ᐱᕚᓪᓕᖁᑎᑦᓭᑦ:

ᐃᓅᒐᓱᐊᕐᓂᐅᑉ ᐊᑭᖏᑦᑕ ᐊᑦᔨᒌᖕᖏᓂᖏᑦ: ᐃᑭᓐᓂᐸᐅᑎᓪᓗᒋᑦ ᐃᒣᓪᓗᐊᑐᑦ $8,500 ᐊᕐᕌᒍᑕᒫᑦ

ᓂᕿᓄᑦ ᐃᑲᔫᑏᑦ: ᐃᑭᓐᓂᐸᐅᑎᓪᓗᒋᑦ ᐃᒣᓪᓗᐊᑐᑦ $4,398 ᐊᕐᕌᒍᑕᒫᑦ

ᐊᕐᕌᒍᑕᒫᑦ ᐊᐅᓪᓚᑫᓐᓇᕈᓐᓇᓃᑦ ᕿᑲᕐᓂᒧᑦ: ᐃᑭᓐᓂᐸᐅᑎᓪᓗᒋᑦ ᐃᒣᓪᓗᐊᑐᑦ 3 ᐊᐅᓪᓚᑫᓐᓇᓂᕐᒧᑦ ᐊᕐᕌᒍᑕᒫᑦ

RRSP-ᒧᑦ ᐱᓇᓱᑦᑎᓯᔩᑦ ᐃᑲᔪᕐᓯᐅᑎᖏᑦ: 7.5%

ᐊᒥᓱᐃᓄᑦ ᐃᒻᒪᖃᐅᑦᔩᓯᒪᒍᑎᒃ

ᕿᑲᑫᓐᓇᕈᓐᓇᓃᑦ: 30 ᐅᓪᓗᐃᑦ ᐊᕐᕌᒍᑕᒫᑦ

ᕿᑲᕐᓇᐃᑦ ᐅᓪᓗᖏᑦ: 20 ᐅᓪᓗᐃᑦ ᐊᕐᕌᒍᑕᒫᑦ

ᐊᓪᓚᓯᒪᒋᐊᕐᖓᐅᑎᑎᑦ ᑐᓂᓗᒋᑦ ᐱᓇᓱᒐᕐᑖᒐᓱᐊᕈᑎᑎᓪᓗ ᐃᒣᓪᓗᐊᓚᐅᕐᑎᓇᒍ 11:59 ᐅᓐᓄᐊᑯᑦ ᐅᓪᓗᖓ ᐁᕆᓕ 19, 2026, ᐅᕗᖓ:

ᐱᓇᓱᑦᑎᓕᕆᕕᒃ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓈᑕᓕ ᓕ ᑳᓪ, ᐱᓇᓱᑦᑎᓕᕆᕕᒻᒥ ᐱᓪᓗᑯᑦᑐᓕᕆᔨ

ᖃᕆᑕᐅᔭᒃᑯᑦ ᐊᓪᓚᕕᐅᕕᖓ: nlegall@krg.ca

ᐊᒥᓱᒐᓓᑦ ᐱᓇᓱᒐᐃᑦ ᐃᓐᓄᑕᐅᒋᐊᖃᕐᓂᖏᓐᓄᑦ NPS-ᑯᓐᓂᑦ, KRG-ᑯᑦ ᐱᔪᓐᓇᐅᑎᖃᕐᖁᑦ ᑐᓂᓯᒍᓐᓇᓂᕐᒥᒃ ᐱᓇᓱᒐᕐᑖᒐᓱᐊᕐᑐᒥᑦ ᐊᓯᖔᖓᓂᒃ ᐱᓇᓱᒐᕐᒥᒃ ᐱᒍᓐᓇᐅᑎᖃᕈᑎᖏᑦ ᐃᓱᒪᒋᓗᒋᑦ ᒪᓕᑦᑕᐅᑎᓪᓗᒋᑦ ᑎᒃᑯᐊᓯᓂᐅᑉ ᖃᓄᐃᓘᕐᑕᐅᒍᓯᖏᑦ.

KRG-ᑯᑦ ᓇᓪᓕᖁᐊᒌᑦᑐᒥᒃ ᐱᕕᑦᓴᖃᕐᑎᓯᓲᖅ ᐱᓇᓱᑦᑎᓯᔨᐅᓂᕐᒥᓄᑦ. ᑖᓐᓇ ᒪᓕᓪᓗᒍ ᐊᒻᒪᓗ ᔦᒥᓯ ᐯ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒍᑎᖓ, ᖃᓄᐃᓕᖓᐅᓯᖏᑦ ᐊᑦᔨᒋᔭᐅᖕᖏᑐᐃᓐᓇᕆᐊᓖᑦ ᖁᕝᕙᒋᐊᕐᑎᑕᐅᒐᓱᐊᕐᓂᖏᓐᓄᑦ ᐃᓄᐃᑦ ᐱᓇᓱᒐᕐᑖᒐᓱᐊᕐᑐᑦ.

ᐱᓇᓱᒐᕐᑖᒐᓱᐊᕐᑐᐃᑦ ᑎᒃᑯᐊᑕᐅᓯᒪᔪᐃᑦ ᑭᓯᐊᓂ ᐊᐱᕐᓲᔭᕐᑕᐅᓂᕐᒧᑦ ᖃᐅᔨᑎᑕᐅᓛᕐᑐᑦ.