ᐃᓕᓐᓂᐊᓂᕐᒧᑦ ᐊᔪᖀᒋᐊᕐᑎᒃ ᑭᓯᑦᓯᒍᑎᓐᓂᐊᓂᕐᑎᒍᑦ ᓱᑯᐃᔦᓂᕐᑎᒍᓪᓗ (ᓴᐳᒻᒥᓗᒋᑦ ᐳᒃᑭᓂᕐᓭᑦ ᒍᐃᒍᐃᑎᑐᑦ ᐃᓕᓐᓂᐊᑎᑦᓯᓂᒃ) - KI

ᑲᑎᕕᒃ ᐃᓕᓴᕐᓂᓕᕆᓂᖅ ᐃᓕᓴᕐᓂᓕᕆᓂᐅᕗᖅ ᐃᓕᓐᓂᐊᓂᓕᕆᓂᕐᒥᒃ ᐱᑕᖃᕐᑎᓯᑦᓱᓂ ᓄᓇᓕᓐᓂ 14-ᓂᒃ ᓄᓇᕕᒻᒥ

ᐃᑉᐱᒋᔭᐅᓂᖃᕐᓱᓂ ᐃᖃᔪᕐᑎᖓᑕ ᑐᑭᒧᐊᕐᑎᓯᔨᐅᑉ ᐅᖃᐅᓯᐅᑉ ᐁᑉᐱᐅᑎᖓᑕ ᐃᓕᓐᓂᐊᕈᑎᑦᓴᔭᓕᕐᓂᐅᑉ ᐱᕙᓪᓕᐊᔭᐅᓂᖓᑕ, ᑖᓐᓇ ᐃᓂᐅᔪᖅ ᐃᓗᓕᓕᒃ ᑲᒪᒋᔭᑦᓴᔭᖃᓚᖓᓗᓂ ᐱᕕᑦᓴᖃᕐᑎᓯᓂᕐᒥᒃ ᐊᔪᖀᒋᐊᕐᓂᒥᒃ ᓴᐳᒻᒥᓂᕐᒥᓗ ᑖᒃᑯᓄᖓ ᐳᕐᑐᓂᕐᓴᓄᑦ ᒍᐃᒍᐃᑎᑑᕐᑐᓄᑦ ᑲᑎᕕᒃ ᐃᓕᓴᕐᓂᓕᕆᐅᑉ ᐃᓕᓐᓂᐊᕕᖏᓐᓂ ᑲᔪᓯᓕᕐᑎᑕᐅᓂᖏᓐᓂ, ᐱᕙᓪᓕᐊᑎᑕᐅᓂᖏᓐᓂ ᓇᐅᑦᓯᑐᕐᑕᐅᓂᖏᓐᓂᓗ ᖃᐅᔨᓴᕐᓃᑦ ᐱᓇᓱᐊᕐᓃᑦ, ᐃᓕᓐᓂᐊᕕᒻᒥ ᐊᐅᓚᑦᓯᓂᕐᒧᑦ ᐃᓕᓐᓂᐊᑎᑦᓯᒍᑎᐅᓂᐊᕐᑐᓄᑦ ᐃᓕᓐᓂᐊᑎᑦᓯᒍᑎᑦᓴᔦᑦ.

ᐃᓂᖓ ᐱᓇᓱᐊᕆᐊᓕᖏᓪᓗ:

·       ᓴᐳᒻᒥᓗᓂ ᓱᕐᖁᐃᓯᑦᓯᐊᓗᓂᓗ ᑌᒫᑦᓯᐊᒪᕇᕐᑐᒥᒃ ᐃᓗᕐᖁᓯᑎᒍᓪᓗ ᐃᓕᑕᕐᓇᓯᐊᕐᑐᒥᒃ ᐃᓕᓐᓂᐊᓂᕐᒥᒃ ᓄᓇᕕᐅᑉ ᓄᓇᓕᖏᓐᓂ, ᐱᓗᐊᕐᑐᒥᒃ ᐳᕐᑐᓂᕐᓭᑦ ᒍᐃᒍᐃᑎᑑᕐᑐᑦ ᐃᓕᓐᓂᐊᑎᑦᓯᔩᑦ ᑖᒃᑯᓇᓂ ᓇᓗᓀᕐᑕᐅᒪᔫᔪᓂ ᑭᓯᑦᓯᒍᑎᓐᓂᐊᓂᕐᒥ ᓱᑯᐃᔦᓂᕐᒥᓗ;

·       ᓴᐳᒻᒥᓗᓂ ᑲᑎᕕᒃ ᐃᓕᓴᕐᓂᓕᕆᔨᐅᑉ ᐃᓕᓐᓂᐊᑎᑦᓯᒍᓯᖓᒍᑦ ᓇᐅᑦᓯᑐᐃᓂᕐᓗ ᑐᖕᖓᕕᖃᕐᓱᓂ ᐃᓕᓐᓂᐊᑏᑦ ᐃᑉᐱᒋᓗᒋᑦ ᓄᐃᑕᑎᑦᓯᓂᖏᑦ ᐃᓕᑦᓯᓂᖃᑦᓯᐊᒪᖔᑕ ᐃᓕᓐᓂᐊᑕᒥᓂᒃ ᑕᕝᕘᓇ ᐃᓕᓐᓂᐊᓂᕐᒥᒃ ᓇᐅᑦᓯᑐᕐᓂᒧᓪᓗ ᑲᔪᖏᕐᓴᓗᒍᓗ ᑖᒃᑯᓄᖓ ᐃᓕᓐᓂᐊᕕᐅᑉ ᐊᐅᓚᑦᓯᔨᖏᓐᓄᑦ, ᐃᓕᓐᓂᐊᑎᑦᓯᔨᓄᑦ ᐊᓯᖏᓐᓄᓗ ᐱᓇᓱᒃᑎᐅᔪᓄᑦ.

·       ᓯᕗᓕᕐᓗᓂ ᐱᓕᓂᕐᑎᒍᑦ ᐃᓕᓐᓂᐊᓂᕐᒥᒃ ᓄᓇᓕᓐᓄᑦ, ᐱᒋᐅᕐᓴᑎᑦᓯᓂᕐᓄᑦ ᑲᑎᒪᓂᐊᕈᓯᐊᐱᕐᑎᒍᓪᓗ ᐃᓕᓐᐊᑎᑦᓯᔩᑦ, ᑕᒡᒍᒧᑦ ᐅᕝᕙᓘᓐᓃᑦ ᖃᕆᑕᐅᔭᑎᒎᕐᑐᑎᒍᑦ (ᐊᑐᕐᓗᑎᒃ ᖃᕆᑕᐅᔭᑎᒍᑦ ᑕᑯᓐᓇᐅᑎᓗᑎᒃ ᑲᑎᒪᒍᓯᑎᒍᑦ, ᐊᓯᖏᓪᓗ)

·       ᐱᕙᓪᓕᐊᑎᑦᓯᓗᓂ ᐃᓕᓐᓂᐊᓂᕐᒥᒃ ᓇᐅᑦᓯᑐᐃᓂᕐᒥᓗ ᖃᓄᐃᓕᖓᓂᐅᔪᓂᒃ (LESs) ᐊᒻᒪᓗᒋᐊᓪᓚᒃ ᐊᓯᖏᑦ ᓴᐳᔾᔨᓂᕐᒧᑦ ᐃᑲᔫᑏᑦ ᐋᕐᕿᒋᐊᕐᑕᐅᒪᔪᑦ ᑕᒪᑦᓱᒧᖓ ᓄᑖᒧᑦ ᐅᖃᐅᓯᐅᑉ ᐁᑉᐱᐅᑎᒋᐊᓪᓚᖓᓄᑦ ᐃᓕᓐᓂᐊᓲᓄᑦ ᐳᕐᑐᓂᕐᓭᑦ ᐃᓕᓐᓂᕋᑦᓴᔭᐅᓲᓄᑦ;

·       ᐃᓚᐅᓗᓂ ᕿᒥᕐᕈᒋᐊᓪᓚᓂᕐᒥᒃ ᐱᓇᓱᐊᕐᓂᐅᔪᓂᒃ ᐋᕐᕿᒋᐊᕐᑕᐅᒪᔪᓂᒃ ᐃᓄᐃᑦ ᐃᓗᕐᖁᓯᖓᓅᓕᖓᔪᓂᒃ, ᐅᖃᐅᓯᕐᒧᑦ ᐊᓐᓂᕆᔭᐅᔪᓄᓪᓗ, ᐊᒻᒪᓗᒋᐊᓪᓚᒃ ᐅᖃᐅᓯᐅᑉ ᐁᑉᐱᐅᑎᖓᓅᓕᖓᔪᓄᑦ ᐃᓕᓐᓂᐊᓂᕐᒨᓕᖓᔪᐃᑦ ᐊᕙᑎᒋᔭᖓᓂ;

·       ᐃᓚᐅᖃᑎᐅᓗᓂ ᐱᓇᓱᐊᖃᑎᒌᑦᑐᓄᑦ ᐱᓇᓱᐊᕐᕕᐅᖃᑎᒌᑦᑐᑦᓱᑎᒃ ᐃᓗᕐᖁᓯᑎᒍᓪᓗ ᑕᒪᑦᓱᒪ ᐱᕙᓪᓕᐊᔭᐅᓂᖓᑕ ᐃᓕᓐᓂᐊᕈᑎᑦᓴᔦᑦ;

·       ᐅᑎᕐᕕᖃᕆᐊᓪᓚᓗᓂ ᑭᓯᑕᐅᒪᔪᑦ ᐊᒥᓱᖕᖑᑎᑕᐅᒪᔪᑦ ᐊᓯᖏᑦᑕᓗ ᐃᓕᓐᓂᐊᕕᐅᑉ ᐃᓕᓐᓂᐊᕈᑎᑦᓴᔭᖏᑦ ᑭᓯᑦᓯᒍᑎᓐᓂᐊᓂᕐᒧᑦ ᓱᑯᐃᔦᓂᕐᒧᓗ ᐳᕐᑐᓂᕐᓭᑦ ᐃᓕᓐᓂᐊᑐᓄᑦ;

·       ᓴᐳᒻᒥᓗᓂ ᓇᓗᓀᕐᑕᐅᒪᑦᓯᐊᑐᓂᒃ ᐱᓇᓱᐊᕋᑦᓴᐅᔪᓂᒃ ᑖᒃᑯᓇᓂ ᐃᓕᓐᓂᐊᑎᑦᓯᓂᐅᔪᓂᒃ, ᐊᑐᕐᓗᓂ ᓄᐃᑦᓯᒍᓯᐅᔪᒥᒃ ᐃᓱᒪᒍᓯᒥᒃ ᐱᓀᓗᑕᐅᔪᓂᓪᓗ ᐋᕐᖀᒍᓐᓇᓂᕐᒧᑦ ᐱᔪᓐᓇᓂᖃᕐᓂᓅᓕᖓᔪᓂᒃ;

·       ᑲᔪᖏᕐᓭᓗᓂ ᓴᐳᒻᒥᓗᓂᓗ ᐳᒃᑭᓂᕐᓭᑦ ᐃᓕᓐᓂᐊᑎᑦᓯᔩᑦ ᑕᕝᕙᓂ ᓱᑯᐃᔦᓂᐅᑉ ᑕᑯᑦᓴᐅᑎᑦᓯᕕᖓᓂ ᐊᓯᖏᓐᓂᓗ ᓄᓇᓕᓕᒫᑎᒎᕐᑐᓂᒃ ᐱᓇᓱᐊᕐᓂᐅᔪᓂᒃ;

·       ᐱᓇᓱᐊᕐᓗᓂ ᐊᔾᔨᐸᓱᖏᓐᓂᒃ ᐱᓇᓱᐊᕐᑕᐅᒋᐊᓕᓐᓂᒃ ᐊᖏᕐᑕᐅᒪᓂᖃᕐᓗᓂ ᑲᒪᔨᒋᒌᓪᓚᕆᑦᑕᒥᓄᑦ.

ᐱᒍᓐᓇᐅᑎᒋᒋᐊᓕᖏᑦ:

ᐃᓕᓐᓂᐊᕕᕐᔪᐊᒥ ᐳᕐᑐᓂᕐᓴᐅᑉ ᐊᓪᓕᖓᓂᒃ ᐱᔭᕇᕐᓯᒪᐅᑎᖓᓗᓂ ᑌᒣᑦᑐᓅᓕᖓᔪᒥᒃ, ᐱᓗᐊᕐᑐᒥᒃ ᐃᓕᓐᓂᐊᓂᕐᒧᑦ.

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᐊᑐᖕᖏᑑᒍᓐᓇᑐᖅ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᓗᓂ.

ᐊᑐᕈᓐᓇᕆᐊᓕᖏᑦ:

·       ᐱᖁᔭᑎᒍᑦ ᐱᔪᓐᓇᓂᖃᑦᓯᐊᓗᓂ ᐃᓕᓐᓂᐊᑎᑦᓯᒍᓐᓇᓂᕐᒥᒃ ᑯᐯᒃ ᓄᓇᖁᑎᖃᕐᕕᒋᔭᖓᓂ;

·       ᐊᑑᑎᓂᖃᕐᓯᒪᓗᓂ ᐃᓕᓐᓂᐊᑎᑦᓯᔨᐅᓂᕐᒥᒃ (ᐃᓕᓐᐊᑎᑦᓯᓯᒪᓗᓂ ᓄᓇᕕᒻᒥ ᐃᑲᔪᕐᓯᒪᓂᕃᒍᑎᐅᒐᔭᕐᑐᖅ);

·       ᒍᐃᒍᐃᑎᑑᒍᓐᓇᓯᐊᕆᐊᓕᒃ, ᐊᒻᒪᓗᒋᐊᓪᓚᒃ ᐱᓇᓱᐊᕈᓐᓇᓯᐊᕐᓗᓂ ᖃᐅᔨᒪᓂᕐᒥᒃ ᖃᓪᓗᓈᑎᑐᑦ;

·       ᖃᐅᔨᒪᓂᖃᕐᒪᕆᓪᓗᓂ ᐳᕐᑐᓂᕐᓭᑦ ᑭᓯᑦᓯᒍᑎᓐᓂᐊᓂᖓᓂᒃ ᓱᑯᐃᔦᓂᕐᑎᒍᓪᓗ ᐃᓱᒪᒍᓯᐅᓲᓂᒃ;

·       ᖃᕆᑕᐅᔭᓕᕆᓂᕐᒥᒃ ᐃᓕᑕᕐᓯᒪᓂᖃᑦᓯᐊᓗᓂ (ᐱᓗᐊᕐᑐᒥᒃ Microsoft 365, ᐃᓚᐅᑎᓪᓗᒍ ᖃᕆᑕᐅᔭᑎᒎᕐᓱᑎᒃ ᑲᑎᒪᓂᐅᓲᓂᒃ ᑕᑯᓐᓇᐅᑎᑦᓱᑎᒃ ᐊᓯᖏᓐᓂᓗ ᐃᓕᓐᓂᐊᓂᕐᒨᓕᖓᔪᓂᒃ ᖃᕆᑕᐅᔭᓅᓕᖓᑎᑦᓯᒍᑎᐅᔪᓂᒃ);

·       ᖃᐅᔨᒪᓂᖃᕐᓗᓂ ᐃᓄᒃᑎᑐᑦ ᐃᑲᔪᕐᓯᒪᒐᔭᕐᑐᖅ.

ᑮᓇᐅᑦᔭᓵᖏᑦ / ᐱᓇᓱᒐᖓᑕ ᑌᔭᐅᓂᖓ / ᐃᓱᕐᕉᑎᑦᓴᖏᓪᓗ:

ᒪᓕᑦᓱᒋᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᖏᑦ ᐱᒍᓐᓇᐅᑎᓖᑦ ᐱᓇᓱᑦᑏᓗ ᑲᑐᑦᔨᖃᑎᒌᓐᓂᖏᑦ ᑯᐯᑉ ᑕᕐᕋᖓᓂ. ᑖᓐᓇ ᐱᓇᓱᒐᖅ 2104-ᒥᒃ ᐱᓇᓱᕝᕕᖃᕋᔭᕐᑐᖅ: $56,670-ᒥᑦ $105,432-ᒧᑦ ᑎᑭᐅᑎᒍᓐᓇᑐᑦ ᐊᕐᕌᒍᑕᒫᑦ ᐱᒍᓐᓇᐅᑎᖏᑦ ᐱᓇᓱᐊᕐᓯᒪᓂᖏᓪᓗ ᒪᓕᑦᓱᒋᑦ.

ᑌᒃᑯᐊ ᐱᓇᓱᒐᕐᑖᕋᓱᑦᑐᑦ ᐃᓂᒧᑦ ᑖᑦᓱᒧᖓ ᐅᓇᒻᒥᒋᔦᑦ ᑭᓯᐊᓂ ᐅᖃᓕᒪᕕᐅᓛᕐᑐᑦ.