ᑲᒪᔨᒻᒪᕆᒃ - Aaqsiiq

ᐱᓇᓱᒐᑦᓴᖅ ᒪᓂᔭᐅᔪᖅ – ᑲᒪᔨᒻᒪᕆᒃ

ᐋᕐᓰᖅ ᓱᓕᔪᓐᖑᐊᓕᕆᕕᖓ ᕿᓂᕐᐳᖅ ᓄᑖᒥᒃ ᐱᓇᓱᒐᔭᕐᑐᒥᒃ ᐱᒐᓱᐊᕐᓂᐊᓗᓂ ᓯᕗᓂᕐᒧᑦ ᑕᐅᑐᓗᐊᕐᓗᓂ ᐊᒻᒪᓗ ᐃᓚᐅᕕᖃᕐᓗᓂ ᐊᑐᕐᓂᐊᓕᕐᒥᔭᖓᓂᒃ ᐱᐅᓯᖓᑕ. ᑖᑦᓱᒧᖓᓕ ᐃᓂᒧᑦ, ᐋᕐᓰᖅ ᕿᓂᕐᐳᖅ ᐱᔪᑦᓴᒥᒃ ᐊᐅᓚᑦᓯᔨᐅᒋᐊᒥᒃ ᐱᒍᓐᓇᑕᖃᕐᓗᓂ ᐊᒻᒪᓗ ᐱᔪᑦᓴᐅᔮᕐᕕᖃᕐᓗᓂ ᑕᑯᓐᓇᐅᔮᕋᑦᓴᓕᕆᓂᕐᒥᒃ. ᑖᓐᓇ ᐃᓕᒐᔭᕐᑐᖅ ᓱᓕᔪᓐᖑᐊᑎᐅᒐᓱᐊᕆᐊᖃᓐᖏᑐᖅ, ᑕᒐ ᐋᕐᓰᖅ ᐅᒃᑯᐃᓯᓂᐊᕐᒪᑦ ᓱᓕᔪᓐᖑᐊᓕᐅᕐᓂᐅᑉ ᑐᑭᐊᒍᑦ ᑲᑎᒪᔨᐊᕈᕐᓂᒃ ᐊᕐᕌᒍᖅ ᓈᓚᐅᕐᑎᓇᒍ ᓱᓕᔪᓐᖑᐊᓕᐅᕐᓂᒥᒃ ᓯᕗᓕᕐᑐᓴᓂᒃ.

ᐋᕐᓰᖅ ᐱᑦᓱᒍ

ᐋᕐᓰᖅ ᓱᓕᔪᓐᖑᐊᓕᐅᕐᕕᒃ ᖄᖏᕐᓂᑯᒐᓱᐊᕐᑎᐅᓇᓂ ᑎᒥᒻᒪᕆᒃ ᑐᓂᒪᒍᑎᓕᒃ ᐱᕙᓪᓕᐊᑎᑕᐅᓂᑦᓴᖓᓄᑦ ᓱᓕᔪᓐᖑᐊᓕᕆᓂᕐᒥᒃ ᓄᓇᕕᒻᒥ. ᑭᒡᒐᑑᑎᖓ ᐋᕐᓰᑉ ᓱᓕᔪᓐᖑᐊᓕᐅᕐᕕᖓᑕ ᑕᒐ ᓴᓇᓗᓂ ᐊᒻᒪᓗ ᓱᓕᔪᓐᖑᐊᓕᐅᕐᓂᒥᒃ ᐋᒃᕿᓱᐃᓂᕐᒥᒃ ᑕᒪᓐᓇᓗ ᓂᑦᑕᑎᑦᓯᓗᓂ ᐊᒻᒪᓗ ᐱᒃᑲᓂᕐᑎᓯᓗᓂ ᐃᓄᐃᑦ ᐅᖃᐅᓯᖓᓂᒃ ᐊᒻᒪᓗ ᐱᐅᓯᑐᖃᖓᓂᒃ. ᐱᓇᓱᐊᕐᑕᒥᒍᑦ ᐊᒻᒪᓗ ᓱᖃᑦᓯᑎᑦᓯᓂᕐᒥᒍᑦ, ᐋᕐᓰᖅ ᓱᓕᔪᓐᖑᐊᓕᐅᕐᓂᖅ ᑲᔪᖏᕐᓭᕗᖅ ᓄᐃᑎᕆᓂᕐᒥᒃ ᐊᒻᒪᓗ ᐋᒃᕿᓱᐃᓂᕐᒥᒃ ᐊᓱᐃᓛᒃ ᐱᑦᓯᐊᓯᒪᔪᓂᒃ ᓱᓕᔪᓐᖑᐊᓕᐅᕐᓂᒥᒃ, ᑕᒐᓗ ᐱᕙᓪᓕᐊᑎᑦᓯᓂᕐᒥᒃ ᑲᑎᕐᓱᕕᐅᓗᓂ ᐱᔭᕆᐅᕐᓂᖑᕐᕕᐅᒍᑎᓂᒃ ᐃᓄᒃᑎᑑᕐᓗᑎᒃ ᐊᓪᓚᖑᐊᕐᓂᑯᑦ ᐃᓄᐃᑦ ᐱᐅᓯᕆᓯᒪᔭᖏᓐᓂᒃ, ᐅᓂᒃᑳᖑᐊᓂᒃ ᐊᒻᒪᓗ ᐅᓂᒃᑲᐅᓯᕐᓂᒃ ᓱᓕᓗ ᐅᓪᓗᒥ ᐃᓅᓯᐅᓕᕐᑐᒧᑦ ᐃᓄᓐᓄᑦ. ᐱᓇᓱᒃᕕᒃ ᑎᒥᒻᒪᕆᒃ ᑐᕌᕐᓂᓕᒃ ᐱᓇᓱᐊᕐᑕᒥᓂᒃ ᖃᐅᔨᒪᐅᓯᕐᒥᓂᓪᓗ ᐱᔭᐅᖁᑦᓱᒋᑦ ᓄᓇᕕᒻᒥ ᓄᓇᓕᓕᒫᓄᑦ ᐊᒻᒪᓗ ᐱᓇᓱᑦᑎᑖᖃᑦᑕᓂᕐᒥᒃ ᐃᓕᓐᓂᐊᑎᓪᓗᒋᓪᓗ ᓱᓕᔪᓐᖑᐊᓕᐅᕐᓂᒥᒃ ᑕᒣᑎᒍᑦ ᓇᐅᒃᑰᒐᓗᐊᖅ ᐃᓕᖓᔪᓂᒃ ᓱᓕᔪᓐᖑᐊᓕᐅᕐᓂᓄᑦ, ᑕᐅᑐᑦᑕᖃᓗᐊᕐᓗᓂ ᐅᕕᒐᕐᑐᖁᑎᑦᑕ ᖃᓄᐃᓐᖏᓯᐊᕈᑎᑦᓴᖓᓄᑦ ᐱᐅᓯᑐᖃᕐᒥᓗ ᐅᐱᒋᔭᖃᕐᓂᒥᒃ.

ᐱᓇᓱᒐᑦᓴᐅᑉ ᓱᓇᑕᖏᑦ

ᐋᕐᓰᖅ ᑲᑐᑦᔨᕈᑎᒋᑦᓱᒍ ᐃᖏᕐᕋᕗᖅ ᓇᑉᐸᑕᐅᓕᕐᓂᕋᒥᓂᑦ 2019ᒥ. ᑲᒪᔨᒻᒪᕆᒃ ᐊᐅᓚᑦᓯᔨᒻᒪᕆᐅᕗᖅ ᐃᓂᖓ ᑲᒪᒋᔭᑦᓴᖃᕐᑎᑕᐅᑦᓱᓂ ᑕᒣᓐᓂᒃ ᑲᒪᓗᓂ ᐸᕐᓇᓂᕐᓂᒃ, ᐊᑕᐅᑦᓯᑰᕐᑎᓯᓂᕐᓂᒃ ᐊᒻᒪᓗ ᑲᔪᓯᖏᓐᓇᑎᒍᓐᓇᓗᒍ ᐋᕐᓰᖅ ᓱᓕᔪᓐᖑᐊᓕᐅᕐᕕᖓ. ᐊᖓᔪᒃᖄᖃᕐᓱᓂ ᐊᒃᑐᐊᓱᒋᑦ ᑲᑎᒪᔨᓂᒃ, ᑲᒪᔨᒻᒪᕆᒃ ᑲᒪᒋᔭᑦᓴᖃᕐᑎᑕᐅᕗᖅ ᐊᑕᖏᕐᑐᒥᒃ ᐊᐅᓚᑕᐅᓂᖓᓂᒃ ᐊᒻᒪᓗ ᐋᒃᕿᓯᒪᐅᑎᑦᓴᖓᑕ ᑐᑭᒧᐊᑦᑎᑕᐅᓂᖓᓂᒃ ᑎᒥᒻᒪᕆᐅᑉ, ᑭᒡᒐᑐᕈᑎᖃᕐᓗᓂ ᑐᑭᐊᒍᑦ ᐱᔪᓂᒃ ᑲᑐᑦᔨᔪᓂᒃ ᐊᒻᒪᓗ ᐊᓱᐃᓚᐅᑎᑦᓯᓗᓂ ᓯᕗᓂᕆᔪᒪᔭᐅᔪᓂᒃ ᐃᖏᕐᕋᓂᖏᑦᑕ. ᑲᒪᒋᔭᑦᓴᓕᒃ ᖃᐅᑕᒫᕐᓯᐅᑎᓂᒃ ᐃᖏᕐᕋᑎᒋᐊᓕᓐᓂᒃ, ᑮᓇᐅᔭᑎᒍᑦ ᐊᐅᓚᓂᖏᓐᓂᒃ, ᑮᓇᐅᔭᕐᓯᐅᕈᑦᔨᓂᕐᓂᒃ, ᐱᓇᓱᑦᑏᑦ ᐊᐅᓚᑕᐅᓂᖏᓐᓂᒃ, ᐊᒻᒪᓗ ᓄᓇᓕᑎᒍᑦ ᐃᓚᐅᕕᖃᕐᓂᓂᒃ, ᑲᒪᔨᒻᒪᕆᒃ ᖁᓚᕐᓇᖏᑦᑐᑯᑦ ᑎᒥᒻᒪᕆᒻᒥᒃ ᐊᓱᐃᓚᐅᑎᑦᓯᓗᓂ ᑭᒡᒐᑑᑎᖓᓄᑦ, ᐊᑕᖏᓐᓇᕕᖃᕐᑎᓗᒍᓗ ᓱᕐᕃᑑᒋᐊᖃᕐᓂᖓᓂᒃ ᐊᒻᒪᓗ ᑎᑭᐅᑎᒍᓐᓇᖃᑦᑕᓗᒋᑦ ᐊᑯᓂᕆᔪᒧᑦ ᑐᕌᕈᒫᕐᓂᐊᕈᒪᔭᖏᓐᓂᒃ ᑕᒪᓐᓇᓗ ᑐᑭᓕᐅᕐᑕᐅᓯᒪᔪᓂᒃ ᐊᑐᕐᓱᒍ ᑲᑐᑦᔮᕆᓗᒍ ᑲᒪᒋᔭᐅᒍᑎᖏᓐᓂᒃ.

ᑲᒪᒋᔭᑦᓴᖃᕐᑎᑕᐅᒍᑎᒋᓗᐊᕐᑕᖏᑦ:

• ᐃᒫᙰᕐᑎᐅᓗᓂ ᐃᓘᓐᓀᓂᒃ ᑎᒥᒻᒪᕆᐅᑉ ᐃᖏᕐᕋᑎᑕᐅᒍᑎᖏᓐᓂᒃ ᐊᒻᒪᓗ ᑕᓯᐅᕐᓯᓗᓂ ᐱᓇᓱᐊᔨᐊᓂᒃ ᐱᓇᓱᐊᕐᑕᖏᓐᓂᒃ / ᐃᑲᔪᕐᓯᒪᓗᓂ ᐱᓇᓱᐊᖃᑎᒌᓂᒃ ᐃᓱᒫᓗᓐᓇᑐᑦ ᐱᓕᕐᐸᑕ;

• ᐱᐅᓯᖃᕐᓗᓂ ᓯᕗᓕᕈᑎᒋᓗᒍ ᐅᖃᕐᑎᖁᑕᐅᒋᐊᒥᒃ ᑭᒡᒐᑐᕐᓗᒍ ᑎᒥᒻᒪᕆᒃ;

• ᓯᕗᓕᕐᓗᓂ ᐋᒃᕿᓯᒪᐅᑎᑦᓴᒧᑦ ᐱᔪᓂᒃ ᑎᒥᒻᒪᕆᒻᒧᑦ (ᐊᐅᓚᑦᔭᕆᐊᕈᑎᑦᓴᓂᒃ ᐸᕐᓇᐅᑎᓂᒃ, ᐋᒃᕿᓯᒪᐅᑎᑦᓴᒧᑦ ᐸᕐᓇᐅᑎᓂᒃ, ᑲᑎᒪᔩᑦ ᐱᒋᐊᕈᒪᓕᕐᒥᔭᖏᓐᓂᒃ);

• ᑲᒪᓗᓂ ᐱᓇᓱᑦᑎᓕᕆᕕᒻᒥᒃ ᐊᒻᒪᓗ ᐱᓇᓱᑦᑎᓴᕐᓯᐅᓂᕐᒧᑦ ᖃᓄᐃᓕᐅᕈᑕᐅᔪᓂᒃ ᐃᓄᐃᑦ ᑕᐅᑐᒍᓯᖏᒍᑦ ᐱᔪᓂᒃ, ᓱᒐᓗᑦᑐᖅ ᐊᑕᕕᖃᑦᓯᐊᖏᓐᓇᖁᓪᓗᒋᑦ ᐃᖏᐅᕐᑎᒌᓪᓗᑎᒃ ᐱᓇᓱᑦᑏᑦ (ᐱᓇᓱᑦᑎᑖᕐᓂᒥᒃ, ᐱᓇᓱᑦᑎᐅᑉ ᕿᓄᐊᕆᔭᖏᓐᓂᒃ ᐊᒻᒪ/ᐅᒃᕙᓗᓘᓐᓃᑦ ᐃᓱᐃᓪᓕᖓᐅᑎᖏᓐᓂᒃ);

• ᐃᓂᓪᓚᑎᕆᓗᓂ ᐊᒻᒪᓗ ᐊᑕᕕᖃᑦᓯᐊᖏᓐᓇᓗᓂ ᐱᓇᓱᐊᖃᑎᖃᕆᐊᒥᒃ ᑎᒥᒻᒪᕆᐅᒻᒥᔪᓄᑦ ᐃᓚᒋᕙᑦᑕᒥᓄᑦ (ᒪᑭᒃᕕᑯᓐᓄᑦ, ᐊᕙᑕᒃᑯᓄᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓐᓄᑦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᓐᓄᑦ, ᑲᑎᕕᒃ ᐃᓕᓴᕐᓂᓕᕆᔨᒃᑯᓄᑦ, ᑲᑎᒪᔨᒃᑯᓄᑦ ᓄᓇᓕᓐᓂ, ᑯᐯᑉ ᐊᒻᒪᓗ ᑲᓇᑕᐅᑉ ᐃᓄᓕᒫᓄᐊᖓᔪᓕᕆᕕᖏᑦᑕ ᑎᒥᒻᒪᕆᖁᑎᖏᓐᓄᑦ, ᓇᒻᒥᓂᓕᓐᓄᓗ ᑮᓇᐅᔭᖃᕐᑎᓯᕙᑦᑐᓄᑦ);

• ᓱᖏᐅᓯᒪᓗᓂ ᐊᒻᒪᓗ ᕿᒥᕐᕈᐸᓪᓗᓂ ᐊᕐᕌᒍᑕᒫᕐᓯᐅᑎᓂᒃ ᑐᕌᒐᕐᓂᒃ, ᑮᓇᐅᔦᓚᕿᐅᑎᑦᓴᓂᒃ ᐊᒻᒪᓗ ᑐᓴᕐᑎᓯᐅᑎᓂᒃ;

• ᓯᕗᓕᕈᓐᓇᓗᓂ ᑲᑎᒪᔩᑦ ᑲᑎᒪᓂᖏᓐᓂᒃ ᐊᒻᒪᓗ ᑐᑦᑕᕕᐅᓗᓂ ᑲᑎᒪᔨᓄᑦ ᐊᒻᒪᓗ ᑎᒥᒻᒪᕆᐅᑉ ᐱᓇᓱᑦᑎᖏᓐᓄᑦ;

• ᐊᐅᓪᓚᑲᑦᑕᕈᓐᓇᖃᑦᑕᓗᓂ, ᐱᔭᕆᐊᖃᑐᐊᕈᓂ;

• ᐱᓇᓱᐊᕐᒥᓗᓂ ᐊᓯᒋᒻᒥᔭᖏᓐᓂᒃ ᐱᔭᑦᓴᓂᒃ ᐊᑕᔪᓄᑦ ᐃᓂᒧᑦ ᐊᒻᒪᓗᓘᓐᓃᑦ ᑎᓕᔭᐅᒍᓂ ᑲᑎᒪᔨᓄᑦ.

ᐱᒍᓐᓇᕆᐊᓕᖏᑦ:

• ᐃᓅᓗᓂ ᓯᕗᓕᕈᓐᓇᑐᖅ ᐃᒃᐱᓇᓪᓗᕆᑦᑐᒥᒃ ᐱᓕᓂᐅᒍᑎᒋᓗᒍ ᑎᒥᒻᒪᕆᒻᒥᒃ ᐊᐅᓚᑕᖃᕆᐊᒥᒃ ᐱᒍᓐᓇᕆᐊᓕᒃ;

• ᖃᐅᔨᒪᔭᖃᕐᓗᓂ ᐱᓕᓂᐅᒍᑎᒋᓗᒍ ᐱᓇᓱᐊᕆᐊᒥᒃ ᓄᓇᕕᒻᒥ ᐱᒍᓐᓇᕆᐊᓕᒃ;

• ᑭᓪᓕᖃᑦᓯᐊᑭᓂᐅᓗᓂ ᐃᓄᒃᑎᑐᑦ ᖃᓪᓗᓈᕐᑎᑐᓪᓗ. ᐅᒥᓕᑦᑎᑑᕈᓐᓇᑯᓂ ᐱᕙᓪᓕᖁᑕᐅᒐᔭᕐᒥᔪᖅ;

• ᐋᒃᕿᓯᒪᐅᑎᑦᓴᒥᒃ ᐃᓱᒻᒪᓯᖃᕐᓗᓂ ᐊᒻᒪᓗ ᐱᒍᓐᓇᑕᖃᑦᓯᐊᒪᕆᓪᓗᓂ ᐊᑕᐅᑦᓯᑰᕐᑎᓯᒋᐊᒥᒃ ᕿᓄᐊᕆᔭᐅᔪᓂᒃ, ᐱᑦᓴᑖᕐᕕᓂᒃ, ᐊᒻᒪᓗ ᓯᕗᒧᑦ ᑕᐅᑐᒋᐊᒥᒃ;

• ᐃᓂᓪᓚᖓᑎᑦᓯᑭᓂᐅᓗᓂ ᐊᒻᒪᓗ ᐱᓇᓱᓐᓇᓂᒃ ᑲᒪᒍᓐᓇᓯᐊᕐᑑᓗᓂ;

• ᑐᑭᓯᒪᑦᓯᐊᑕᖃᕆᐊᓕᒃ ᑮᓇᐅᔭᖃᕐᑎᑕᐅᒍᑎᓄᑦ ᐱᔪᓂᒃ ᐃᓄᐃᑦ ᑎᒥᒻᒪᕆᖏᓐᓂ;

• ᖃᕆᑕᐅᔭᓕᕆᒃᑭᓂᐅᓗᓂ : ᒪᑯᓂᖓ ᑕᒐ Microsoft Suite (Excel, Word, PowerPoint, Outlook ᐊᓯᖃᕐᒥᐸᑕᓗ);

• ᑕᑎᒋᓇᕐᓗᓂ ᑎᓕᐅᒐᐅᑐᐃᓐᓇᒨᕈᓐᓀᓗᓂ ᐃᒻᒥᓂᕿᒍᓐᓇᑐᖅ ᐊᒻᒪᓗ ᐊᐅᓚᑦᔭᕆᐊᑲᐱᖃᑦᑕᓗᓂ;

• ᐱᓇᓱᐊᕈᓐᓇᕆᐊᓕᒃ ᐊᖑᒪᒋᐊᓕᓐᓄᑦ ᐊᕐᓕᐊᓇᕐᑐᓂᒃ ᐊᖑᒪᒍᓐᓇᓗᒋᑦ;

• ᒥᑦᓯᓕᒻᒥᒃ ᓯᕗᓕᕈᓐᓇᓯᐊᕐᓗᓂ;

• ᐱᓇᓱᐊᖃᑎᒌᑦᑐᓂᒃ ᑲᒪᒍᓐᓇᓯᐊᕐᓗᓂ;

• ᖃᐅᔨᒪᒐᓱᐊᕈᓐᓇᓗᓂ ᐊᐅᓚᑕᐅᔪᓂᒃ ᐱᓯᒪᒍᓐᓇᓗᒋᑦ ᐊᒻᒪᓗ ᑐᕌᒐᓕᐅᕈᓐᓇᓗᓂ;

• ᑐᑭᐊᒎᕐᑐᓂᒃ ᓯᓚᒃᖁᒋᐊᖃᓐᖏᑐᓂᒃ ᑐᑭᖃᓚᑦᓯᓗᓂ;

• ᐱᔪᑦᓴᐅᔮᕐᓗᓂ ᐊᒻᒪᓗ ᐱᓇᓱᐊᖃᑎᖃᕈᓐᓇᓗᓂ ᐱᐅᓯᖃᖃᑎᒌᓐᖏᑐᑦ ᐃᒻᒧᐊᓂ.

ᖃᓄᐃᓕᖓᓂᖏᑦ ᐱᓇᓱᐊᒐᐅᑉ

• ᐊᑌᓐᓇᑐᖅ ᐅᓪᓗᓕᒫᕐᓱᓂ (35ᑦ ᐃᑲᐅᕐᓃᑦ/ᐱᓇᓱᐊᕈᓯᕐᒥ)

• ᐱᓇᓱᐊᕐᕕᖓ: ᓄᓇᕕᒻᒥ ᐊᒻᒪ/ᐅᒃᕙᓗᓘᓐᓃᑦ ᒪᓐᑐᔨᐊᓚᒥ (ᑕᒪᒃᑮᒍᓐᓇᑐᖅ ᑕᒃᕙᓂᑦᓭᓈᕐᓇᓂ, ᖃᕆᑕᐅᔭᑎᒍᑦ ᐱᔪᒥᒃ ᓇᔫᑎᓇᓂ ᒍᓐᓇᕋᔭᕐᒥᓱᓂ);ᑮᓇᐅᑦᔭᐅᑎᖏᑦ: ᐱᒋᐊᕐᑐᑦ $85,800ᒥᑦ $90,000 ᓄᑦ ᐊᕐᕌᒍᕐᒥ. ᑮᓇᐅᑦᔭᓵᑦ ᐃᓂᓪᓚᑕᐅᓂᖓ ᑲᒪᕗᖅ ᐱᓕᓂᐅᓂᖓᓂᒃ;

• ᐱᕙᓪᓕᖁᑎᑖᕈᑏᑦ:

o ᑕᕐᕋᒦᑦᓯᐅᑎᓄᑦ ᐱᑎᑕᐅᒍᑎᖏᑦ ($3,640/ᐊᕐᕌᒍᕐᒥ)

o ᐃᒻᒪᖃᐅᑏᑦ ᐊᒻᒪᓗ RRSPᑦ

o ᑕᓪᓕᒪᐅᔪᕐᑐᓗ ᒪᕐᕈᓗᑦ ᐅᓪᓗᐃᑦ ᓇᒻᒥᓂᕐᒧᑦ/ᖃᓂᒪᒍᓂᓗ ᐅᓪᓗᐃᑦ ᐊᕐᕌᒍᕐᒥ ᐃᓚᑦᓱᒋᑦ + ᓯᑕᒪᐅᔪᕐᑐᓂᒃ ᐅᓪᓗᓂᒃ ᐃᓅᓂᕐᒥᓄᑦ ᐱᐅᓯᕐᒥᒍᑦ ᕿᑲᕐᓀᑦ ᐱᑎᑕᐅᒍᑎᖏᑦ ᐊᕐᕌᒍᕐᒥ

o ᖃᕆᑕᐅᔭᕐᓄᑦ ᐊᒻᒪᒍᑎᓂᒃ ᐊᑭᓕᐅᑎᑕᓕᒃ

o ᕿᑲᕐᓀᑦ: ᐱᓇᓱᐊᕈᓰᑦ ᐱᖓᓱᑦ ᓇᒻᒥᓂᖅ ᕿᑲᕈᑎᑦᓴᖏᑦ ᐃᓚᑦᓱᒋᑦ + ᒪᕐᕉᓂᒃ ᐱᓇᓱᐊᕈᓰᓐᓂᒃ ᐊᑭᓕᕐᑕᐅᓗᓂ ᐅᑭᐅᑉ ᓈᓂᖓᓂ ᕿᑲᕐᓇᓂ.

• ᐱᒋᐊᕐᕕᓴᖓ ᐅᓪᓗᖅ: ᒫᑦᓯ 2026

ᓇᓪᓕᑳᕐᑕᐅᓂᖓᑕ ᑲᒪᒋᔭᐅᓂᖓ

• ᓯᕗᓪᓕᐹᒥ ᐊᐱᕐᓱᑕᐅᔪᖅ (ᔭᓄᐊᔨ 2026) - ᑌᑰᓇ ᓯᕗᓪᓕᐹᕐᓯᐅᑎᒥᒃ ᐊᐱᕐᓱᑕᐅᓂᕐᒥ, ᖃᐅᔨᒐᓱᐊᓗᐊᕐᑕᖃᕐᓂᐊᑐᒍᑦ ᐱᓇᓱᐊᓕᓂᕐᓂᒃ, ᑕᐅᑐᒍᓯᕐᓂᓗ ᐋᕐᓰᒥᒃ, ᓱᓇᐅᕙ ᐃᓕᒐᓱᐊᕈᑏᑦ ᐱᔪᑦᓴᐅᔮᕈᑎᒋᔦᓪᓗ.

• ᖃᐅᔨᒐᓱᐊᕐᑕᐅᓂᖅ (ᕕᐳᐊᔨ 2026) - ᓇᓪᓕᑳᕐᑕᐅᓂᕈᕕᑦ ᖃᐅᔨᒐᓱᐊᕐᑕᐅᓂᕐᒧᑦ, ᐃᓇᑕᐅᓗᑎᑦ ᐆᑦᑐᕋᕐᑕᐅᓂᕐᒧᑦ ᕿᒥᕐᕈᔭᐅᓗᑎᑦ ᐊᓪᓚᒍᓯᕐᓂᒃ, ᐅᓕᕐᓀᓯᓂᕐᓂᒃ, ᑐᕌᒐᕐᓄᑦ ᐊᒻᒪᓗ ᐸᕐᓇᕈᓯᕐᓂᒃ ᐱᒍᓐᓇᕆᐊᖃᕐᑕᓂᒃ ᐃᓂᒧᑦ. ᐱᕕᑦᓴᖃᕐᓂᐊᑐᑎᑦ ᐱᓇᓱᐊᕈᓰᒃ ᒪᕐᕉᒃ ᓴᓂᐊᓂ ᐱᔭᕇᕐᓯᒪᒋᐊᖃᕐᓱᒍ ᑕᒪᓐᓇ ᐆᑦᑐᕋᕐᑕᐅᒍᑎ ᑌᒣᓕᐅᕐᓂᒧᑦ ᐱᑎᑕᐅᓂᐊᕐᓱᑎᒃ ᐊᑭᓕᕐᑕᐅᒍᑎᒥᒃ $500. ᒥᒃ.

ᓯᕗᓂᐊᒍᑦ ᐆᑦᑐᕋᕐᑕᐅᒍᑎᐅᑉ, ᑐᓂᔨᓯᒪᒋᐊᖃᕐᓂᐊᓱᑎᑦ ᐊᑎᕐᓂᒃ ᒪᕐᕉᒍᓐᓇᑑᒃ ᐱᖓᓱᓪᓘᓃᑦ ᖃᐅᔨᒋᐊᕐᕕᓴᐅᒐᔭᕐᑐᓂᒃ ᑐᑭᓯᒐᓱᐊᕐᕕᐅᓗᑎᒃ.

• ᐱᓱᖓᐅᑎᒥᒃ ᐊᐱᕐᓱᑕᐅᓂᖅ (ᒫᑦᓯ 2026) - ᓇᓪᓕᑳᕐᑕᐅᓴᕐᓂᕈᕕᑦ ᑕᒃᕗᖓ ᐱᓱᖓᐅᑎᒧᑦ ᐊᐱᕐᑕᑲᑦᑕᑕᐅᓂᕐᒧᑦ, ᐊᐱᕐᓱᑕᐅᒐᔭᕐᑐᑎᑦ ᑲᑎᒪᔨᓄᑦ ᑕᐅᑐᓐᖑᐊᑌᑦ ᓯᕗᓂᕐᒥ ᐋᕐᓰᖅ ᐱᓪᓗᒍ ᑕᒐᓗ ᐊᐱᕐᓱᑕᐅᒻᒥᓗᑎᑦ ᐸᕐᓇᕈᑎᓐᓂᒃ ᓯᕗᓪᓕᐹᒥ ᐃᓕᒪᓕᕐᓗᑎᑦ ᐊᕐᕌᒍᐊᓂ ᐃᓂᒥ.

ᖃᓄᐃᓕᓗᓂ ᐃᓕᒐᓱᐊᕈᓐᓇᐸ

ᑐᓂᔨᕕᑦᓴᖅ ᐱᓇᓱᒐᕐᑖᕋᓱᐊᕐᓂᒧᑦ, ᑐᔪᐃᓗᑎᑦ ᐱᓇᓱᑦᓯᒪᔭᕐᐱᑦ ᐊᓪᓚᖁᑎᖏᓐᓂᒃ ᐊᒻᒪᓗ ᐊᓪᓚᓯᒪᔪᓂᒃ ᐱᔪᑦᓴᐅᔮᕈᑎᓐᓄᑦ ᓯᑯᑦᓴᔦᑦ ᐱᖓᓱᑦ ᐅᖓᑖᓅᓐᖏᑐᖅ ᓯᕗᓂᐊᒍᑦ

ᑏᓯᒻᐸ 12, 2025

ᐅᕗᖓ ᑕᒐ: employment@aaqsiiq.org

ᑎᑭᑕᐅᒐᔭᕐᓱᑎᒃ ᖃᕆᑕᐅᔭᓂ ᐊᓪᓚᑲᑦᑕᐅᑎᕕᑎᒍᑦ ᐱᔭᐅᑦᓯᐊᓂᕐᒪᑕ ᐊᓪᓚᖁᑎᑎᑦ. ᐱᔭᐅᓯᒪᔪᑦ ᐃᕐᐸᑎᑕᐅᔪᑦᓴᐅᓇᑎᒃ ᐱᓂᐊᕈᑕᐅᓚᖓᕗᑦ. ᐊᐅᓚᔫᓕᐊᒍᓯᓚᔪᒥᒃ ᐊᒻᒪᓗᓘᓐᓃᑦ/ᓂᐱᓕᐅᕐᓯᒪᔪᒥᒃ ᐃᓕᒐᓱᐊᕐᓂᓄᑦ ᑐᓐᖓᓱᒃᑎᑕᐅᒋᕗᑦ.

ᐋᕐᓰᑯᑦ ᑲᑎᒪᔨᖏᑦ ᓇᑯᕐᒦᑐᐃᑦ ᐃᓕᒐᓱᐊᕐᑐᓕᒫᓂᒃ. ᑌᒃᑯᐊ ᓇᓪᓕᑳᕐᑕᐅᔪᑦ ᐊᐱᕐᓱᕋᑦᓴᐅᓗᑎᒃ ᑭᓪᓕᖃᕐᕕᐅᓂᐊᕐᑐᑦ ᑭᓯᒥ.