ᐃᓄᓐᓂᒃ ᐱᓇᓱᑦᑎᓕᕆᓂᕐᒥᒃ ᖃᐅᔨᒪᔨ - KRG

ᐱᓇᓱᒐᕐᒥᒃ ᐱᒍᑎᑦᓴᖅ

ᑲᑎᕕᒃ ᓄᓇᓕᒫᑦ ᑲᕙᒪᖓ (KRG) ᖁᓪᓕᐸᐅᑦᓱᓂ-ᑲᕙᒫᐱᓐᓄᑦ ᑎᒥᐅᕗᖅ ᐊᐅᓚᑦᓯᕕᖃᕐᓱᓂ ᓄᓇᒥᒃ ᑯᐯᒻᒥ 55° ᓴᓂᒧᑦ ᑕᕐᕋᖓᑕ ᖁᓛᓂ. KRG-ᑯᑦ ᐅᓪᓗᒥ ᐱᓇᓱᑦᑎᓴᕐᓯᐅᑐᑦ ᐃᒻᒥᓂᕿᓯᑎᒥᒃ ᐊᒻᒪᓗ ᐱᓇᓱᑦᑎᓯᐊᒥᒃ ᐃᓄᒻᒥᒃ ᒪᑐᒥᖓ ᐱᓇᓱᒐᖃᕋᔭᕐᑎᓗᒍ:

ᐃᓄᓐᓂᒃ ᐱᓇᓱᑦᑎᓕᕆᓂᕐᒥᒃ ᖃᐅᔨᒪᔨ

(ᐊᑌᓐᓇᑐᖅ - ᐃᓗᐃᑦᑐᖅ ᐃᓂᖓ)

ᑐᓴᕐᑎᓯᖃᑦᑕᓗᓂ ᑐᑭᒧᐊᑦᑎᓯᔨᒧᑦ ᐃᑲᔪᕐᑎᒥᒃ ᐃᓄᓐᓂᒃ ᐱᓇᓱᑦᑎᓕᕆᕕᒻᒥ ᐃᓕᖓᔪᒥᒃ ᐱᓇᓱᐊᕐᓂᓄᑦ, ᐃᓄᓐᓂᒃ ᐱᓇᓱᑦᑎᓕᕆᓂᕐᒥᒃ (HR) ᖃᐅᔨᒪᔨ ᑲᒪᔨᐅᕗᖅ ᐃᓇᑦᓯᓂᕐᒥᒃ ᐱᓇᓱᕝᕖᑦ ᑐᑭᒧᐊᑦᑎᔨᖏᓐᓂᒃ ᐊᓯᖏᓐᓂᓗ ᐊᐅᓚᑦᓯᔨᐅᑦᓱᑎᒃ ᐱᓇᓱᑦᑎᓂᒃ ᐃᑲᔪᕐᓂᐊᕋᒥ ᖃᐅᔨᒪᑦᑎᓯᓗᓂᓗ ᖃᓄᑐᐃᓐᓇᖅ ᐊᑦᑐᐊᔪᕐᑎᒍᑦ ᐱᓇᓱᑦᑎᓕᕆᓂᕐᒧᑦ, ᐆᑦᑑᑎᒋᓗᒍ ᐱᓇᓱᑦᑎᓯᐅᕐᓂᒧᑦ ᐊᒻᒪᓗ ᐃᓚᒋᓕᐅᑦᔨᓂᕐᒧᑦ ᐱᓇᓱᑦᑎᓂᒃ ᓄᑖᓂᒃ, ᑮᓇᐅᑦᔭᕈᑎᓕᕆᓂᕐᒧᑦ, ᐃᓂᕐᑎᕆᐅᑎᓕᕆᓂᕐᒧᑦ, ᐊᒻᒪᓗ ᐱᓇᓱᑦᑎᓂᒃ ᑲᒪᒋᐅᑎᖃᑎᖃᕐᓂᐅᑉ ᐃᓱᐃᓕᑕᖏᓐᓄᑦ. HR-ᓂᒃ ᖃᐅᔨᒪᔨ ᑲᒪᒋᐊᖃᕐᒥᔪᖅ ᑭᐅᓂᕐᒥᒃ ᐱᓇᓱᑦᑏᑦ ᐊᐱᕆᐅᑎᖏᓐᓂᒃ ᐃᓄᓐᓂᒃ ᐱᓇᓱᑦᑎᓕᕆᓂᒃᑯᑦ ᐃᓱᐃᓪᓗᑌᑦ ᒥᑦᓵᓄᑦ. ᐅᖃᑦᓯᐊᓂᕐᓴᕆᓗᒋᑦ, HR-ᓄᑦ ᖃᐅᔨᒪᔨ ᐃᒣᓘᕐᓂᐊᑐᖅ:

• ᐃᑲᔪᕐᓂᖅ ᐊᒻᒪᓗ ᖃᐅᔨᒪᑎᑦᓯᓂᖅ ᐱᓇᓱᑦᑎᓕᒫᓂᒃ ᑲᒪᒍᑎᓂᒃ ᐊᑦᑐᐊᔪᓂᒃ ᐱᓇᓱᑦᑎᓕᕆᓂᕐᒧᑦ, ᑐᑭᓯᒍᓯᕐᒧᑦ ᐊᒻᒪᓗ ᐊᑐᕐᑎᓯᒍᓯᕐᒧᑦ ᐊᑕᖏᕐᑐᓄᑦ ᐊᖏᖃᑎᖐᒍᑎᓂᒃ, ᐊᒻᒪᓗ ᐊᐅᓚᑦᓯᔩᑦ ᐱᓇᓱᓐᓂᖓᑕ ᐃᓂᓪᓚᖓᐅᑎᖏᓐᓄᑦ, ᒪᓕᒑᐱᓐᓄᑦ ᐊᒻᒪᓗ ᐱᕐᕈᓯᕐᓄᑦ

• ᐊᐅᓚᑦᓯᓂᖅ ᐱᓇᓱᑦᑎᓯᐅᒪᓂᐅᑉ ᓯᕗᒧᐊᕈᓯᖓᓂᒃ, ᐃᓚᖃᕐᑎᓗᒍ: ᐱᓇᓱᑦᑎᑖᕐᓂᒥᒃ ᐱᔪᒪᐅᑎᐅᑉ ᐊᓪᓚᕕᑦᓴᖓ (HRF), ᐱᐅᓂᕐᓯᐅᓂᖅ ᐱᓇᓱᒍᒪᔪᓂᒃ, ᐊᒻᒪᓗ ᐃᓚᒋᓕᐅᑦᔨᓂᖅ ᐱᓇᓱᑦᑎᑖᖑᕋᑖᓂᒃ, ᐊᒻᒪᓗ ᑲᒪᒋᐊᓪᓚᖃᑦᑕᓂᖅ ᐆᑦᑐᕋᕐᑕᐅᓂᕐᒥᒃ ᐊᑐᕐᓂᖓᑕ ᐅᓪᓗᖏᓐᓂ

• ᒪᑭᑕᑦᓯᓂᖅ ᐊᒻᒪᓗ ᓄᑕᐅᓯᓕᑎᕆᖃᑦᑕᓂᖅ ᐱᓇᓱᑦᑏᑦ ᐊᓪᓚᖃᐅᑎᖏᓐᓂᒃ ᐊᒻᒪᓗ ᓄᐃᑦᓯᖃᑦᑕᓂᖅ ᑐᓴᕐᑎᓯᒍᑎᓂᒃ ᐊᒻᒪᓗ ᑭᓯᒍᑎᓂᒃ, ᑌᒣᒋᐊᖃᕐᓂᖅ ᒪᓕᓪᓗᒍ

• ᐊᐅᓚᑦᓯᓂᖅ ᓱᓇᓕᒫᓂᒃ ᐊᑦᑐᐊᔪᓂᒃ ᐱᓇᓱᑦᑎᐅᑉ ᐊᓪᓚᖃᐅᑎᖓᓄᑦ ᐆᑦᑑᑎᒋᓗᒋᑦ ᐅᑯᓂᖓ: ᑮᓇᐅᑦᔭᕈᑎᓕᕆᓂᖅ, ᐱᕙᓪᓕᖁᑏᑦ, ᐃᓄᒻᒪᕆᖕᖑᓂᕐᒧᑦ ᐸᕐᓇᕈᑏᑦ, ᐱᓇᓱᑦᑏᑦ ᐋᓐᓂᓯᒪᔪᑦ ᓴᑑᑎᖏᑦ, ᐊᒻᒪᓗ ᐱᓇᓱᒐᖃᕈᓐᓀᑐᑦ ᓴᑑᑎᖏᑦ

• ᕿᒥᕐᕈᓂᖅ ᐊᒻᒪᓗ ᓄᑕᐅᓯᓕᑎᕆᖃᑦᑕᓂᖅ ᐱᓇᓱᒉᑦ ᐅᓕᕐᓀᕈᑎᖏᓐᓂᒃ

• ᐃᑲᔪᕐᓂᖅ ᐊᒻᒪᓗ ᖃᐅᔨᒪᑎᑦᓯᓂᖅ ᐊᑦᑐᐊᔪᑎᒍᑦ ᐃᓱᐃᓗᑕᕐᓄᑦ ᐱᑦᔪᑎᓕᓐᓄᑦ ᑮᓇᐅᑦᔭᓴᕐᓂᑯᑦ ᐊᑭᒪᑦᓯᓂᕐᒥᒃ ᐊᒻᒪᓗ ᑎᒥᐅᑉ ᐃᓗᐊᓂ ᐊᑭᒪᑦᓯᓂᕐᒥᒃ

• ᐃᑲᔪᕐᓯᖃᑕᐅᓂᖅ ᐊᖏᖃᑎᒌᒍᑎᓕᐅᕐᓂᒥᒃ ᐊᑦᔨᒌᖕᖏᑐᓂᒃ ᐊᑕᖏᕐᑐᑦ ᐊᖏᖃᑎᒌᒍᑎᖏᓐᓂᒃ ᐊᒻᒪᓗ ᐊᑕᐅᓯᐅᓈᕐᑎᑐᑦ ᐊᖏᖃᑎᒌᒍᑎᖏᓐᓂᒃ

• ᓱᕐᖁᐃᓂᖅ ᐊᑐᕐᑐᓴᓕᒫᑦ ᐱᖁᔦᑦ ᐊᒻᒪᓗ ᒪᓕᒉᑦ ᒪᓕᒍᑕᐅᓂᖓᓂᒃ

• ᑲᔪᓯᑎᑦᓯᖃᑦᑕᓂᖅ ᐊᓯᖏᓐᓂᒃ ᐊᑦᑐᐊᒥᔪᓂᒃ ᐱᔭᑦᓴᓂᒃ ᑌᒣᖁᔭᐅᓕᕈᓂ

ᐱᑕᖃᕆᐊᓖᑦ:

• ᓯᓚᑦᑐᓴᕐᕕᒥ ᐃᓕᑦᓯᒪᐅᑎ ᐊᑦᑐᐊᔪᒥᒃ ᐱᓇᓱᒐᕐᒥᒃ (ᒥᑦᓯᓕᒻᒥᒃ ᐱᓇᓱᖃᑦᑕᓯᒪᓂᖅ ᐃᓱᒪᒍᑕᐅᓚᖓᒻᒥᔪᖅ)

• ᐃᑭᓐᓂᐹᖓᓄᑦ ᑕᓪᓕᒪᓂ (5) ᐊᕐᕌᒍᓂ ᒥᑦᓯᓕᒻᒥᒃ ᐱᓇᓱᑦᓯᒪᓂᖅ

• ᐃᓕᑕᕆᔭᐅᓂᖅ ᐃᓅᖃᑎᓂ ᐊᒻᒪᓗ ᐅᖃᖃᑎᒌᓐᓂᐅᑉ ᑐᑭᐊᒍᑦ ᐱᔪᓐᓇᓂᒃᑯᑦ, ᑕᒪᕐᒥᒃ ᐅᖄᓗᓂ ᐊᒻᒪᓗ ᐊᓪᓚᓯᒪᔪᑎᒍᑦ, ᐊᒻᒪᓗ ᐱᓯᑎᒻᒪᕆᐅᓂᖅ ᐸᕐᓇᓂᐅᑉ, ᐃᓂᓪᓚᑎᕐᓂᐅᑉ, ᐊᒻᒪᓗ ᐹᕐᓯᖓᐅᑎᔪᓂᒃ ᐋᕐᕿᓱᐃᓂᐅᑉ ᑐᑭᖏᑎᒍᑦ

• ᐊᑐᕈᓐᓇᓯᐊᕐᓗᓂ ᖃᐅᔨᒪᓂᖅ ᖃᕆᑕᐅᔭᕈᑎᓂᒃ ᐅᑯᓂᖓ Microsoft Office Suite

• ᐱᔪᓐᓇᓯᐊᕐᓂᖅ ᖃᓄᐃᓘᖃᑕᐅᓂᕐᒥᒃ ᐅᖄᓗᓂ ᐊᒻᒪᓗ ᐊᓪᓚᓯᒪᔪᑎᒍᑦ

• ᐱᔪᓐᓇᓯᐊᕐᓂᖅ ᖃᓄᐃᓘᖃᑕᐅᓂᕐᒥᒃ ᒪᕐᕈᐃᓄᑦ (2) ᐅᑯᐊ ᐅᖃᐅᓰᑦ ᓇᓪᓕᖏᓐᓄᑦ: ᐃᓄᒃᑎᑐᑦ, ᖃᓪᓗᓈᑎᑐᑦ, ᐅᐃᒍᑎᑐᑦ ᐃᓱᐊᖁᑎᒋᐊᓪᓚᑎᑐᑦ ᐃᓱᒪᒋᔭᐅᓚᖓᔪᖅ

ᐱᓇᓱᕝᕕᐅᑉ ᓄᓇᖓ: ᑰᑦᔪᐊᖅ, ᓄᓇᕕᒃ (ᑯᐯᒃ)

ᑮᓇᐅᑦᔭᓵᑦ: ᐃᑭᓐᓂᐹᖓᓄᑦ $89,855 – ᐅᓄᕐᓂᐹᖓᓄᑦ $123,554

ᐱᕙᓪᓕᖁᑏᑦ: ᐃᓅᓯᐅᑉ ᐊᑭᑐᓂᖓᑕ ᑲᓱᖕᖏᒍᑎᖓ: ᐃᑭᓐᓂᐹᖓᓄᑦ $8,500 / ᐊᕐᕌᒍᒥ

ᓂᕿᓄᑦ ᐃᑲᔪᕐᓯᐅᑎ: ᐃᑭᓐᓂᐹᖓᓄᑦ $4,217 / ᐊᕐᕌᒍᒥ

ᐊᕐᕌᒍᑕᒫᑦ ᕿᑲᓯᔪᑦ ᐊᐅᓪᓚᕈᑎᖏᑦ: ᐅᓄᕐᓂᐹᖓᓄᑦ 3 ᐊᐅᓪᓚᕈᑏᑦ ᐊᑐᓂ ᐃᓄᒻᒧᑦ ᐊᕐᕌᒍᑕᒫᑦ

RRSP/SPP

ᐊᑕᖏᕐᑐᑦ ᓴᑑᑎᑦᓴᖏᑦ

ᐃᓱᒣᓐᓇᕿᒍᑏᑦ: 30 ᐅᓪᓗᐃᑦ

ᐱᖁᔭᑎᒍᑦ ᕿᑲᕐᓀᑦ: 20 ᐅᓪᓗᐃᑦ, ᖃᓗᓯᔪᑦ 10-ᓂᒃ ᕿᑎᖕᖑᒥ ᕿᑲᕐᓇᑎᓪᓗᒍ

ᐱᓇᓱᒍᒪᐅᑎᑎᑦ ᑎᑭᑎᓗᒋᑦ ᐅᕗᖓ:

Human Resources

Kativik Regional Government

P.O. Box 9

Kuujjuaq, Quebec, JOM 1CO

Email: humanresources@krg.ca

Fax: (819) 964-2975

KRG ᐊᑦᔨᒌᒥᒃ ᐱᕕᖃᕐᑎᓯᑦᓱᓂ ᐱᓇᓱᑦᑎᓯᔨᐅᕗᖅ. ᑕᒪᓐᓇ ᒪᓕᑦᓱᒍ ᐊᒻᒪᓗ ᒪᓕᒻᒥᓱᓂ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥᒃ, ᐃᓂᓪᓚᕈᑏᑦ ᐊᑦᔨᒌᖕᖏᑐᐃᓐᓇᕆᐊᓖᑦ ᑫᓪᓗᐊᕈᑕᐅᓗᑎᒃ ᐱᓇᓱᑦᑎᑖᕐᓂᒥᒃ ᐃᓄᓐᓂᒃ ᐱᓇᓱᒍᒪᔪᓂᒃ.

ᐱᓇᓱᒍᒪᔪᑦ ᓂᕈᐊᕐᑕᐅᔪᑦ ᐊᐱᕐᓱᒍᒪᑦᓱᒋᑦ ᖃᓄᐃᓕᔭᑑᓚᖓᔪᑦ.