ᐱᓇᓱᑦᑎᓕᕆᕕᒻᒥ ᐃᒫᙰᕐᑎᒃ - ᓄᓇᕕᒻᒥ ᐳᓖᓰᑦ ᐱᒍᑦᔨᕕᖓᓂ - KRG

ᐱᓇᓱᒐᖅ ᐅᒃᑯᐃᖔᓕᕐᒥᔪᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑎᒥᐅᔪᖅ ᐊᐅᓚᑦᓯᓱᓂ ᓄᓇᓕᐊᕈᕐᓂᒃ ᓄᓇᖁᑎᖃᕐᓱᓂ 55 ᐃᑰᑕᖓᑕ ᑕᕐᕋᖓᓂ, ᒫᓐᓇ ᕿᓂᕐᖁᑦ ᐱᒍᓇᐅᑦᓯᖓᑦᓯᐊᑐᒥᒃ ᕿᑦᑌᖓᑦᓯᐊᑐᒥᓗ ᐃᓄᒻᒥᒃ ᐃᓚᐅᒍᒪᔪᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐱᓇᓱᐊᕐᓗᓂ ᐅᑯᓂᖓ:

ᐱᓇᓱᑦᑎᓕᕆᕕᒻᒥ ᐃᒫᙰᕐᑎᒃ - ᓄᓇᕕᒻᒥ ᐳᓖᓰᑦ ᐱᒍᑦᔨᕕᖓᓂ

(ᐊᑌᓐᓇᑐᖅ - ᐅᓪᓗᓕᒫᕐᓯᐅᑎᒥᒃ ᐱᓇᓱᒐᖅ)

ᐱᓇᓱᑦᑎᑖᕆᔭᐅᔪᖅ ᓅᑦᑎᕈᓐᓇᕆᐊᓕᒃ ᑰᑦᔪᐊᒧᑦ

ᐊᖓᔪᕐᖄᖃᕐᓗᓂ ᑐᑭᒧᐊᑦᑎᓯᔨᒥᒃ, ᐱᓇᓱᑦᑎᓕᕆᕕᒻᒥ, ᐱᓇᓱᑦᑎᓕᕆᕖᑦ ᐃᒫᙰᕐᑎᖓ ᑲᒪᒋᔭᑦᓴᔭᓕᒃ ᐱᓇᓱᖃᑎᖃᕐᓗᓂ ᐊᐅᓚᑦᓯᔨᓂᒃ ᐱᓇᓱᑦᑎᓂᒃ ᐃᑲᔪᕐᓯᓗᓂ ᐃᒫᙰᑎᐅᓗᓂᓗ ᐱᓇᓱᑦᑎᓕᕆᕕᒻᒧᓕᖓᔪᓕᒫᓂᒃ, ᐅᑦᑑᑎᒋᓗᒋᑦ ᐱᓇᓱᑦᑎᓯᐅᕐᓂᓂᒃ ᐱᓇᓱᑦᑎᑖᕐᓂᓂᓗ ᓄᑖᓂᒃ ᐱᓇᓱᑦᑎᓂᒃ, ᑮᓇᐅᑦᔭᓵᓕᕆᕕᒃ, ᖃᓄᐃᓕᒋᐊᕐᑕᐅᓂᖏᓐᓄᓕᖓᔪᓂᒃ, ᐊᒻᒪᓗ ᐱᓇᓱᒐᓕᕆᓂᕐᓄᑦ ᐱᓀᓗᑕᓂᒃ. ᐱᓇᓱᑦᑎᓕᕆᕕᒻᒥ ᐃᒫᙰᕐᑎᒃ ᑲᒪᒋᔭᑦᓴᔭᖃᕐᒥᔪᖅ ᑭᐅᓗᓂ ᐱᓇᓱᑦᑎᓂᒃ ᖃᐅᔨᒋᐊᕐᑐᓂᒃ ᐱᓇᓱᑦᑎᓕᕆᕕᒻᒥ ᐱᓀᓗᑕᓂᒃ. ᐱᓗᐊᕐᑐᒥᒃ, ᐱᓇᓱᑦᑎᓕᕆᕕᒻᒥ ᐃᒫᙰᕐᑎᒃ ᐃᒣᓗᖃᑦᑕᓂᐊᕐᑐᖅ:

• ᐃᑲᔪᕐᓯᓗᓂ ᐃᒫᙰᑎᐅᓗᓂᓗ ᐱᓇᓱᑦᑎᓕᒫᓄᓕᖓᔪᓂᒃ ᐱᓇᓱᑦᑎᓕᕆᕕᒻᒧᓕᖓᔪᓂᒃ, ᑐᑭᖏᓐᓂᒃ ᐊᒻᒪᓗ ᑲᔪᓯᓕᕐᑎᑕᐅᓂᖏᓐᓂᒃ ᑲᑐᑦᔨᖃᑎᒌᓐᓂᒥ ᐊᖏᖃᑎᒌᒍᑎᖏᓐᓂᒃ, ᐊᒻᒪᓗ ᐊᐅᓚᑦᓯᔩᑦ ᐱᓇᓱᑦᑏᑦ ᖃᓄᐃᓕᖓᓂᖏᓐᓂᒃ, ᐱᖁᔭᓂᒃ, ᖃᓄᐃᓗᕈᓯᕐᓂᓗ;

• ᖃᓄᐃᓗᖁᔨᔨᐅᓗᓂ ᐊᐅᓚᑦᓯᔨᓄᑦ ᐱᓇᓱᑦᑎᓄᓗ ᐱᓇᓱᒐᕐᒧᓕᖓᔪᓂᒃ ᐊᒻᒪᓗ ᐱᓇᓱᕝᕕᒥ ᐱᓀᓗᑕᖃᓕᕐᐸᑦ;

• ᐊᐅᓚᑦᓯᓗᓂ STD-ᑯᓄᑦ ᐊᒻᒪᓗ LTD-ᑯᓄᑦ ᑐᑦᓯᕋᐅᑎᓂᒃ ᐊᒻᒪᓗ ᐱᓇᓱᕝᕕᒥ ᐊᕐᖁᓇᕐᑐᕕᓂᕐᓄᓕᖓᔪᓂᒃ (CNESST);

• ᑲᒪᒋᔭᖃᕐᓗᓂ ᐱᓇᓱᑦᑎᓴᕐᓯᐅᓂᕐᒥᒃ ᐱᓇᓱᑦᑕᐅᔪᓂᒃ, ᐃᓚᐅᑎᓪᓗᒋᑦ: ᐱᓇᓱᑦᑎᑖᕐᓂᓄᑦ ᑕᑕᕐᓴᒐᕐᓂᒃ, ᕿᒥᕐᕈᓂᕐᓂᒃ ᐱᓇᓱᒐᕐᑖᕋᓱᑦᑐᓂᒃ, ᐃᓚᐅᒻᒥᑎᓪᓗᒍ ᐱᓇᓱᑦᑎᑖᕐᓂᓂᒃ ᓄᑖᓂᒃ ᐱᓇᓱᑦᑎᑖᕆᔭᐅᕐᖃᒥᓂᒃ, ᑲᒪᒋᐊᕐᓗᓂᓗ ᖃᐅᔨᓴᕐᑕᐅᓂᕐᒥᓂᖏᓐᓂᒃ ᐱᓇᓱᑦᑎᑖᕆᔭᐅᕐᖃᒦᑦ;

• ᑲᔪᓯᑎᑦᓯᓗᓂ ᓄᑕᐅᓯᓕᕆᕙᓪᓗᓂᓗ ᐱᓇᓱᑦᑏᑦ ᐊᓪᓚᑕᐅᒪᒍᑎᖏᓐᓂᒃ ᐊᒻᒪᓗ ᑐᓴᕐᑎᓯᒍᑎᓕᐅᕐᐸᓗᓂ ᐊᒻᒪᓗ ᑭᓯᑕᐅᒪᒍᑎᖏᓐᓂᒃ, ᕆᐊᖃᓕᕈᓂ;

• ᐊᐅᓚᑦᓯᓗᓂ ᐃᓘᓐᓇᓕᒫᖏᓐᓂᒃ ᐱᓇᓱᑦᑏᑦ ᐊᓪᓚᑕᐅᒪᒍᑎᖏᓐᓂᒃ ᐅᑦᑑᑎᒋᓗᒋᑦ: ᑮᓇᐅᑦᔭᓵᑦ, ᐱᕙᓪᓕᖁᑏᑦ, ᐃᓄᑐᖃᐅᓂᕐᒧᑦ ᕿᑲᕈᑎᑖᕐᑕᕈᑎᑦᓭᑦ ᐸᕐᓀᑕᐅᒍᑎᖏᑦ, ᐱᓇᓱᑦᑏᑦ ᐊᑭᓕᕐᑕᐅᒍᑎᖏᑦ, ᐱᓇᓱᖕᖏᑑᒋᒃᑯᑎᑖᕐᑕᓂᕐᒧᑦ ᐃᒻᒪᖃᐅᑎᓂᒃ, ᐊᓯᖏᓪᓗ;

• ᕿᒥᕐᕈᖃᑦᑕᓗᓂ ᓄᑕᐅᓯᓕᕆᕙᓪᓗᓂᓗ ᐱᓇᓱᒐᐅᑉ ᐊᓪᓚᑕᐅᒪᒍᑎᖏᓐᓂᒃ, ᐱᓇᓱᒐᕐᒧᓕᖓᔪᓂᒃ ᕿᒥᕐᕈᕙᓪᓗᓂ, ᐃᑲᔪᕐᓯᓗᓂ ᐃᒫᙰᕐᐸᓗᓂᓗ ᐱᓀᓗᑕᖃᓕᕐᐸᑦ ᐊᑦᔨᒋᑦᓯᐊᓂᒃ ᐊᑭᓕᕐᑐᑕᐅᒋᐊᖃᕐᓂᒧᓕᖓᔪᓂᒃ ᐃᓚᐅᒻᒥᑎᓪᓗᒍ ᐱᒍᑦᔨᕕᐅᑉ ᐃᓗᐊᓂ ᐊᑦᔨᒌᑦᑎᑕᐅᑦᓯᐊᕆᐊᖃᕐᓂᓂᒃ;

• ᐃᑲᔪᕐᓯᓗᓂ ᐊᖏᖃᑎᒌᒐᓱᓐᓂᓂ ᐊᑦᔨᒌᖕᖏᑐᓂᒃ ᑲᑐᑦᔨᖃᑎᒌᓐᓂᓂ ᐊᖏᖃᑎᒌᒍᑎᓂ ᐊᒻᒪᓗ ᐃᓕᒃᑰᓈᕐᑎᑐᓂᒃ ᐊᖏᖃᑎᒌᒍᑎᓂᒃ;

• ᑲᔪᓯᑎᑕᐅᑦᓯᐊᑎᓗᒋᑦ ᐃᓘᓐᓇᓕᒫᖏᑦ ᐱᖁᔦᑦ ᒪᓕᒉᓪᓗ ᓲᓱᒋᔭᐅᑦᓯᐊᑎᓗᒋᑦ;

• ᐸᕐᓀᓗᓂ ᐁᓗᓂᓗ ᐱᓇᓱᒐᕐᓂᒃ ᑕᑯᑦᓴᐅᑎᑦᓯᓂᕐᓄᑦ;

• ᐃᑲᔪᕐᓯᓗᓂ ᐊᑦᔨᒌᖕᖏᑐᓂᒃ ᐱᓇᓱᑦᑎᓕᕆᕕᒻᒥ ᐱᓇᓱᑦᑕᐅᔪᓂᒃ;

• ᐊᓯᖏᓐᓂᒃ ᐱᓇᓱᓪᓗᓂ ᐱᓇᓱᒐᕐᒥᓄᓕᖓᔪᓂᒃ ᕆᐊᖃᓕᕈᓂ.

ᐱᒍᓐᓇᕆᐊᓕᖏᑦ:

• ᐃᓕᓐᓂᐊᕕᕐᔪᐊᒥ ᐱᔭᕆᕈᑎᖃᕐᓗᓂ ᐱᓇᓱᒐᕐᒧᓕᖓᔪᓂᒃ (ᐊᑦᔨᐸᓱᖓᓂᒃ ᐱᓇᓱᒐᖃᕐᓂᕈᓂ ᐱᐅᔫᒐᔭᕐᑐᖅ);

• ᐃᑭᓐᓂᐹᖃᕐᓗᓂ ᑕᓪᓕᒪᓂᒃ (5) ᐊᕐᕌᒍᕐᓂᒃ ᐊᑦᔨᐸᓱᖓᓂᒃ ᐱᓇᓱᑦᓯᒪᓗᓂ ᐊᒻᒪᓗ ᐃᓚᐅᔫᑦᓯᐊᓗᓂ ᐃᓕᑕᕆᔭᐅᔪᒧᑦ ᐱᓇᓱᑦᑎᓕᕆᕕᒻᒥ ᐱᓇᓱᑦᑎᒪᕆᓕᕆᓂᕐᒥ ᑎᒥᐅᔪᒧᑦ (CHRP, HRPA, CRIA, CRHA) (ᐊᑦᔨᐸᓱᖓᓂᒃ ᐱᓇᓱᑦᑎᐅᓯᒪᒍᓂ ᐱᐅᔫᖓᔭᕐᑐᖅ);

• ᐱᓇᓱᓕᓂᐅᓗᓂ ᑲᑐᑦᔨᖃᑎᒌᓐᓂᓕᓐᓂᒃ ᐅᕝᕙᓗᓐᓃᑦ ᓄᓇᓕᐊᕈᕐᓄᓕᖓᔪᓂ ᐱᐅᔫᒐᔭᕐᑐᖅ;

• ᐱᓇᓱᒍᓐᓇᓗᓂ ᐊᒥᓱᓂᒃ ᐱᓇᓱᑦᑕᐅᒋᐊᓕᓐᓂᒃ ᐱᔭᕆᕈᓐᓇᓗᓂᓗ ᐱᕕᑦᓴᑭᑐᒥᒃ ᐱᓇᓱᑦᑕᐅᒋᐊᓕᓐᓂᒃ;

• ᖃᐅᔨᒪᔭᐅᓗᓂ ᐃᓅᖃᑎᒌᓐᓂᖃᑦᓯᐊᕈᓐᓇᓂᖓ ᑐᑭᓯᒪᖃᑎᒌᓐᓂᖃᑦᓯᐊᕈᓐᓇᓂᖓᓗ, ᑕᒪᒋᓐᓂᒃ ᐅᖄᓂᒃᑯᑦ ᐊᓪᓚᓂᒃᑯᓗ;

• ᐸᕐᓀᕈᓐᓇᓯᐊᕐᓗᓂ, ᐃᓂᓪᓚᑎᕆᒍᓐᓇᓯᐊᕐᓗᓂ, ᐹᕐᓯᖓᐅᑎᔪᖃᓕᕐᐸ ᖃᓄᕐᑑᕈᓐᓇᓂᖃᕐᓯᐊᓗᓂ;

• ᐱᓇᓱᒍᑎᖃᕈᓐᓇᓯᐊᕐᓗᓂ Microsoft Office Suite;

• ᐅᖄᖃᑎᖃᕈᓐᓇᓯᐊᕐᓗᓂ ᐊᓪᓚᒍᓐᓇᓯᐊᕐᓗᓂᓗ ᒪᕐᕈᔪᐊᓐᓂᒃ (2) ᐅᑯᓂᖓ ᐅᖃᐅᓯᕐᓂᑦ: ᖃᓪᓗᓈᑎᑐᑦ, ᒍᐃᒍᐃᑎᑐᑦ, ᐃᓄᒃᑎᑐᓗ;

• ᐊᐅᓪᓚᑲᑦᑕᕈᓐᓇᓗᓂ ᖃᓪᓗᓈᑦ ᓄᓇᖓᓄᑦ ᐱᓇᓱᒐᕐᓂᒃ ᑕᑯᑦᓴᐅᑎᑦᓯᓂᕐᓄᑦ ᑲᑎᖕᖓᓂᕐᓄᓗ, ᐅᑦᑑᑎᒋᓗᒍ ᑕᑯᓐᓇᖃᑎᒌᑦᓱᑎᑦ ᐊᐱᕐᓱᑲᑦᑕᓂᕐᓂ.

ᓇᓃᓐᓂᖓ ᐱᓇᓱᒐᖅ: ᑰᑦᔪᐊᖅ, ᑯᐯᒃ

ᑮᓇᐅᑦᔭᓵᑦ: ᐃᑭᓐᓂᐹᑦ $89,855 – ᐅᓄᕐᓂᐹᑦ $123,554

ᐱᕙᓪᓕᖁᑏᑦ: ᐃᓅᒐᓱᐊᕐᓂᒧᑦ ᐊᑦᔨᐅᖏᑦᑐᒥᓐᓂᒧᑦ: ᐃᑭᓐᓂᐹᑦ $8 500 / ᐊᕐᕌᒍᓕᒫᒥ

ᓂᕿᓂᒃ ᐃᑲᔪᕐᓯᒍᑏᑦ: ᐃᑭᓐᓂᐹᑦ of $4,217 / ᐊᕐᕌᒍᓕᒫᒥ

ᐊᕐᕌᒍᑕᒫᑦ ᐊᐅᓪᓚᕈᑏᑦ: ᐅᓄᕐᓂᐹᑦ of 3 ᐊᑕᐅᓯᖅ ᐃᓄᒃ ᐊᕐᕌᒍᑕᒫᑦ;

ᐃᓄᑐᖃᐅᓂᕐᒧᑦ ᕿᑲᕈᓐᓇᐅᑎᑖᕈᑏᑦ/SPP

ᐊᒥᓱᐃᓄᑦ ᐃᒻᒪᖃᐅᑏᑦ

ᕿᑲᕐᓀᑦ: 30 ᐅᓪᓗᐃᑦ

ᐅᓪᓗᐃᑦ ᕿᑲᕐᓀᑦ ᐋᕐᕿᑕᐅᒪᒋᕐᑐᑦ: 20 ᐅᓪᓗᐃᑦ, ᐃᓚᐅᑎᓪᓗᒋ5 10 ᕿᑎᖕᖑᒥ ᕿᑲᕐᓇᒥ

ᐱᓇᓱᒐᕐᑖᕈᒪᐅᑎᑎᓐᓂᒃ ᐊᐅᓪᓚᑎᑦᓯᒍ ᐅᕗᖓ:

ᐱᓇᓱᑦᑎᓕᕆᕕᒃ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ

P.O. Box 9

ᑰᑦᔪᐊᖅ ᑯᐯᒃ J0M 1C0

ᓱᑲᑦᑐᑰᕈᑎᒃ: 819-964-2975

ᖃᕆᑕᐅᔭᑎᒍᑦ ᓯᓚᑎᖓ: humanresources@krg.ca

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᑦᔨᒌᑦᑎᓯᕗᖅ ᐱᓇᓱᒐᕐᑖᕋᓱᑦᑐᓂᒃ. ᒪᓕᑦᓱᑎᑦ ᑖᑦᓱᒥᖓ ᐊᒻᒪᓗ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᓂᒃ, ᖃᓄᐃᓕᖓᓂᖏᑦ ᐊᑦᔨᐅᖏᑦᑑᑐᐃᓐᓇᕆᐊᖃᕐᖁᑦ ᐱᓇᓱᒐᕐᑖᑎᑦᓯᒐᓱᓐᓂᒧᑦ ᐃᓄᓐᓂᒃ ᐱᓇᓱᒐᕐᑖᕋᓱᑦᑐᓂᒃ.

ᐱᓇᓱᒐᕐᑖᕋᓱᑦᑐᐃᑦ ᐊᐱᕐᓱᑲᑦᑕᑕᐅᓱᖕᖑᔪᐃᑦ ᑭᓯᐊᓂ ᐊᔾᓚᕕᐅᓛᕐᖁᑦ.