ᐆᒪᔪᐃᑦ ᐳᓖᓯᖓ - KRG

ᐱᓇᓱᒐᑦᓴᖅ ᐊᑐᐃᓐᓇᕈᕐᑐᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (ᑫᐋᔩ), ᐊᒥᓱᐃᓂᒃ ᑲᒪᒋᔭᖃᕐᓱᓂ ᓄᓇᓕᓐᓄᑦ ᑎᒥᐅᒍᑎᖃᕐᐳᖅ ᐊᐅᓚᑦᓯᕕᖃᕐᓱᓂ ᑲᑎᕕᐅᑉ ᓄᓇᖁᑎᖓᓂ ᑕᕐᓯᑐᕐᑕᐅᓯᒪᔪᑦ ᑕᕐᕋᖓᓂ 55 ᖁᓛᓂ. ᐅᓪᓗᒥ ᕿᓂᕐᑐᖅ ᐃᓕᒐᓱᐊᕈᒪᔪᒥᒃ ᐱᔪᑦᓴᐅᔮᕐᑐᒥᒃ ᐊᒻᒪᓗ ᕿᑦᑌᖓᔪᒥᒃ ᑫᐋᔩᑉ ᐱᓇᓱᑦᑎᖏᓐᓄᑦ ᐃᓚᒋᓕᐅᑎᒍᒪᔪᒥᒃ ᐃᒣᑦᑐᓂᒃ ᐱᓇᓱᐊᕐᓗᓂ:ᒥᕐᖑᐃᓯᕐᕕᒻᒥ ᐃᑉᐱᒍᓱᑦᑎ, ᐱᖑᐊᓗᐃᑦ ᒥᕐᖑᐃᓯᕐᕕᒻᒥ

ᐆᒪᔪᐃᑦ ᐳᓖᓯᖓ

(ᐊᑌᓐᓇᓚᖓᔪᖅ - ᐅᓪᓗᓕᒫᕐᑕᓗᓂ)

ᐊᖓᔪᕐᖄᖃᕐᓗᓂ ᐆᒪᔪᐃᑦ ᐱᓇᓱᒐᐅᑉ ᑲᔪᓯᑎᑦᓯᔨᖓᓂᒃ, ᐳᓖᓯᐅᑉ ᐃᑉᐱᒍᓱᑦᑎᐅᑉ ᑲᒪᒋᒋᐊᓕᖏᑦ ᐅᑯᓂᖓ ᐃᓚᓖᑦ, ᑖᒃᑯᑑᒐᑎᓗ:

• ᐃᑲᔪᕐᐸᓗᓂ ᓄᐃᑎᕐᑕᐅᓂᖓᓂᒃ ᓄᓇᕕᒻᒥ ᐆᒪᔪᐃᑦ ᐅᖑᒪᔭᐅᓂᖏᓐᓄᑦ ᐸᕐᓀᒍᑎᐅᑉ ᑐᕌᒐᖏᓐᓂᒃ ᐊᒻᒪᓗ ᓄᓇᖃᕐᖄᑐᕕᓃᑦ ᐃᒪᕐᒥᐅᑕᓂᒃ ᓂᕿᑕᕐᕕᖏᓐᓂᒃ ᐊᒻᒪᓗ ᐃᒪᕐᐱᐅᑉ ᐊᐅᓚᑕᐅᓂᖏᓐᓄᑦ ᐊᖏᖃᑎᖃᕈᑎᐅᑉ ᑐᕌᒐᖏᓐᓂᒃ;

• ᓄᓇᕕᐅᑉ ᓄᓇᖁᑎᖓᓂᒃ ᐃᑉᐱᒍᓱᑉᐸᓗᓂ ᒪᓕᒉᑦ ᐊᒻᒪᓗ ᐆᒪᔪᐃᑦ ᐸᕝᕕᑎᑕᐅᒋᐊᖃᖕᖏᓂᖏᓐᓄᑦ ᐃᓕᒪᑎᑕᐅᔪᑦ ᒪᓕᒐᕐᓄᑦ ᒪᓕᑦᑕᐅᓯᐊᕐᒪᖔᑕ (ᓇᔪᕐᑎᖃᕈᓐᓇᐅᑏᑦ, ᐱᔪᓐᓇᐅᑏᑦ, ᐊᓯᖏᓪᓗ);

• ᐃᑲᔪᕐᐸᓗᓂ ᐆᒪᔪᐃᑦ ᐅᖑᒪᔭᐅᓂᖏᓐᓄᑦ ᑲᒪᔨᓂᒃ ᖃᐅᔨᓴᕐᑎᓗᒋᑦ ᐊᓇᕐᕋᕆᔭᐅᔪᓂ, ᐊᓇᕐᕋᕆᔭᐅᑫᓐᓇᑐᓂ ᐊᒻᒪᓗ ᑕᑯᔭᕐᑐᓯᒪᔪᑦ ᓇᔪᕐᑕᖏᓐᓂ ᓄᓇᕕᒻᒥ;

• ᓄᓇᖁᑎᒋᔭᐅᔪᒥ ᓇᓗᓀᕐᓯᔨᐅᓗᓂ ᐆᒪᔪᕐᓯᐅᕕᖃᕈᓐᓇᓂᕐᓄᑦ ᐃᖃᓗᑦᓯᐅᕕᖃᕈᓐᓇᓂᕐᓄᓗ ᐱᔪᓐᓇᐅᑎᓂᒃ;

• ᑐᓴᕐᑎᓯᔨᐅᓗᓂ ᐆᒪᔪᐃᑦ ᐅᖑᒪᔭᐅᓂᖏᓐᓂᒃ ᑲᒪᔨᓂᒃ ᑐᓴᕐᑕᐅᑎᑕᐅᔪᓂᒃ ᐅᕝᕙᓘᓐᓃᑦ ᑕᑯᓐᓇᑕᐅᔪᓂᒃ ᐆᒪᔪᕆᐊᖃᕋᑎᒃ ᐆᒪᔪᕐᓯᐅᑐᓂᒃ;

• ᐃᑲᔪᕐᐸᓗᓂ ᐆᒪᔪᐃᑦ ᐅᖑᒪᔭᐅᓂᖏᓐᓄᑦ ᑲᒪᔨᓂᒃ ᓱᒃᑯᐃᓚᕿᓂᐅᔭᕐᑐᖃᓕᕐᐸᑦ ᐃᖃᓗᐃᑦ ᐊᒻᒪᓗ/ᐆᒪᔪᐃᑦ ᓇᔪᓲᖏᓐᓂᒃ;

• ᑐᓴᕐᑎᓯᔨᐅᓗᓂ ᐃᓄᓐᓂᒃ ᐊᑐᓯᔪᓂᒃ ᐆᒪᔪᓄᐊᖓᑦᓱᑎᒃ ᒪᓕᒐᕐᓂᒃ;

• ᐃᓚᐅᕙᓪᓗᓂ ᐆᒪᔪᐃᑦ ᐅᖑᒪᔭᐅᓂᖏᓐᓂᒃ ᑲᒪᔨᓄᑦ ᐃᓕᓐᓂᐊᑎᑦᓯᓂᖃᓕᕐᐸᑕ ᑐᕌᖓᔪᓂᒃ ᐃᓕᓵᓄᑦ;

• ᓱᕐᖁᐃᓯᓯᒪᔨᐅᓗᓂ ᑐᓴᐅᒪᐅᑎᑦᓯᐊᓂᖏᓐᓂᒃ ᐊᓇᕐᕋᓖᑦ, ᐊᓇᕐᕋᖃᑫᓐᓇᑐᑦ ᐊᒻᒪᓗ ᓄᓇᕕᒻᒥ ᐃᓐᓂᐊᓯᒪᔪᑦ;

• ᐱᓇᓱᐊᖃᑎᖃᕐᐸᓗᓂ ᐱᓪᓗᑯᒋᐊᓕᑦᑎᓂᒃ ᓱᕐᖁᐃᓯᓯᒪᒋᐊᖃᕐᓂᒥᓄᑦ ᐱᓇᓱᐊᕆᐊᓕᖏᑦᑕ ᐱᔭᕇᕐᓂᖏᓐᓂᒃ ᐃᑲᔪᕐᓂᖃᕐᑎᓗᒋᑦ ᐃᒪᕐᐱᓕᕆᔨᒃᑯᑦ ᐱᓇᓱᑦᑎᖏᓐᓂᒃ ᐊᒻᒪᓗ ᐊᕙᑎᒧᐊᖓᔪᓂᒃ ᑳᓇᑕᒥ ᑲᒪᔨᓂᒃ;

• ᐱᓇᓱᐊᕈᓯᑕᒫᑦ ᑕᑯᔭᐅᓯᒪᔪᓂᒃ ᐊᒻᒪᓗ ᐱᔭᐅᓯᒪᔪᓂᒃ ᑐᑭᓯᐅᑎᑦᓴᓂᒃ (ᐆᑦᑑᑏᑦ ᑕᑯᔭᐅᔪᑦ, ᓄᓈᕐᑕᐅᔪᑦ, ᐊᓐᓀᔭᐅᔪᑦ ᐊᒻᒪᓗ ᖁᒃᑭᓗᑦᑕᐅᔪᑦ) ᐃᒪᕐᒥᐅᑕᓂᒃ ᐊᒫᒪᑦᑎᓯᔨᓂᒃ: ᕿᓚᓗᒉᑦ ᐁᕖᑦ, ᓇᑦᓰᑦ, ᐊᓪᓚᖑᐊᑦ, ᐋᕐᓗᐃᑦ ᐊᒻᒪᓗ ᐊᕐᕖᑦ;

• ᒪᓂᔨᓯᒪᔨᐅᓗᓂ ᐃᑉᐱᒍᓱᒋᐊᕐᑐᓯᒪᓂᕐᓂᒃ ᐊᒻᒪᓗ ᐱᓇᓱᐊᕈᓯᑕᒫᑦ ᑐᓴᕐᑎᓯᐅᑎᓂᒃ;

• ᐊᓯᖏᓐᓂᓗ ᐱᓇᓱᐊᖃᑦᑕᓗᓂ, ᐱᖁᔭᐅᔪᓂᒃ, ᐊᖓᔪᕐᖃᒥᓄᑦ.

ᐱᔪᓐᓇᐅᑎᖃᕆᐊᓕᒃ ᐃᒣᑦᑐᓂᒃ:

• ᐃᑭᓐᓂᐸᐅᑎᓗᒋᑦ ᐱᖓᓱᓂ (3) ᐊᕐᕌᒍᓂ ᐱᓇᐊᓱᕐᓯᒪᓗᓂ ᐆᒪᔪᐃᑦ ᐅᖑᒪᔭᐅᓂᖏᓐᓂ, ᐃᖃᓗᐃᑦ ᓄᖑᖏᓐᓇᑎᑕᐅᑦᑌᓕᓂᖏᓐᓂ ᐅᕝᕙᓘᓐᓃᑦ ᐊᑦᔨᓗᐊᖏᓐᓂᒃ; ᓄᓇᒥ ᐃᓅᒐᓱᐊᕈᓐᓇᕕᖃᕈᓂ ᐃᓱᒪᒋᔭᐅᓚᖓᔪᖅ ᓱᖏᐅᓐᓂᖃᕈᑎᖏᑦᑕ ᐊᑦᔨᓗᐊᕆᔭᐅᒋᐊᖏᑦ;

• ᑕᑯᑦᓴᐅᑎᑦᓯᓗᓂ ᐱᓇᓱᐊᓕᓂᐅᓂᕐᒥᓂᒃ ᓄᑕᐅᓪᓕᕈᓐᓇᑐᓕᕆᓂᕐᒥ ᐊᓐᓂᑐᕈᑎᓂᒃ, ᐆᒪᔪᕐᓯᐅᓂᕐᓂᒃ, ᐃᖃᓗᑦᓯᐅᓂᕐᓂᒃ, ᒥᑭᒋᐊᕐᓂᐊᓂᕐᓂᒃ ᐊᒻᒪᓗ ᐱᐅᓯᑐᖃᕐᑎᒍᑦ ᓄᓇᒥᒃ ᐆᒪᕕᖃᕈᓐᓇᓂᕐᒥᒃ;

• ᐃᓱᒪᑕᑦᓯᐊᒍᓗᓂ ᐱᐅᓯᕐᓲᑎᑦᓯᐊᓂᒃ ᐱᐅᓯᖃᕐᓗᓂ;

• ᖃᐅᔨᔭᐅᓚᐅᕐᓯᒪᒍᓐᓀᓗᓂ ᐸᓯᔭᑦᓴᐅᒋᐊᖓ ᐃᒣᓐᓂᒥᓄᑦ, ᐅᕝᕙᓘᓐᓃᑦ ᐸᓯᔭᑦᓴᐅᓂᕐᒥᓂᒃ ᐅᖃᕈᑎᖃᓚᐅᕐᓯᒪᒍᓐᓀᓗᓂ ᐃᕐᖃᑐᐃᕕᒻᒥ, ᐱᖁᔭᕐᓂᒃ ᓯᖁᒥᑦᓯᓂᕐᒥᓂᒃ ᐱᓂᕐᓗᑐᓄᑦ ᐱᖁᔦᑦ ᐊᑖᓂ;

• ᓄᓇᕕᒻᒥ ᐊᕐᕕᑕᕆᐊᒥᒃ ᐊᑐᐃᓐᓇᐅᓯᐊᕈᓐᓇᓗᓂ;

• ᐊᓪᓚᒍᓐᓇᓗᓂ ᐊᒻᒪᓗ ᐅᖄᒍᓐᓇᓗᓂ ᐱᓇᓱᐊᕈᑎᒋᒍᓐᓇᓗᒋᒃ ᒪᕐᕈᐃᒋᒃ (2) ᐅᑯᐊ ᐅᖃᐅᓰᑦ: ᐃᓄᑦᑎᑐᑦ, ᖃᓪᓗᓈᕐᑎᑐᑦ ᐊᒻᒪᓗ ᐅᐃᒍᐃᑎᑐᑦ;

• ᐃᓕᓐᓂᐊᕋᔭᕆᐊᒥᒃ ᐊᑐᐃᓐᓇᐅᓗᓂ.

*ᓇᓪᓕᑳᕐᑕᐅᔪᑦ ᐃᓕᒐᓱᐊᕐᑐᓂ ᐃᓕᓐᓂᐊᑎᑕᐅᓛᕐᑐᑦ Ministère de la Forêt, de la Faune et des Parcs-ᒧᑦ ᐱᔪᓐᓇᐅᑎᑖᓚᖓᓗᑎᒃ ᐆᒪᔪᐃᑦ ᐅᖑᒪᔭᐅᓂᖏᓐᓄᑦ ᐃᑲᔪᕐᑎᐅᒍᓐᓇᓯᓗᑎᒃ.

ᐱᓇᓱᕝᕕᖓ: ᑲᖏᕐᓱᒃ

ᑮᓇᐅᑦᔭᓵᖏᑦ: ᐃᑭᓐᓂᐹᑦ: $40 906/ᐊᕐᕌᒍᒥ; ᐅᓄᕐᓂᐹᑦ $66 291/ᐊᕐᕌᒍᒥ (ᐳᕐᑐᓂᖓ 5)

ᐱᕙᓪᓕᖁᑎᑦᓭᑦ: ᐃᓅᓂᐅᑉ ᐊᑭᑐᓂᖓᑕ ᐃᑲᔪᕐᑕᐅᒍᑏᑦ: ᐃᑭᓐᓂᐹᑦ $4972 ᐊᕐᕌᒍᒥ

ᓂᕿᓄᑦ ᐃᑲᔪᕐᓯᔭᐅᒍᑏᑦ: ᐃᑭᓐᓂᐹᑦ $4,274 ᐊᕐᕌᒍᑕᒫᑦ;

ᖃᖓᑦᑕᐅᑏᑦ: ᐊᑕᐅᓯᖅ ᐃᓄᒃ ᖃᖓᑦᑕᐅᑎᑖᕈᓐᓇᑐᖅ ᐱᖓᓱᓂᑦ ᐊᕐᕌᒍᑕᒫᑦ

ᐊᕐᕌᒍᑕᒫᑦ ᐱᓪᓗᖁᑎᑖᕐᑕᐅᑏᑦ ᐃᓚᐅᑎᓪᓗᒋᑦ ᐱᔭᕆᐊᑭᓪᓕᑎᕐᓯᒪᔪᑦ ᐃᑦᑑᓂᐅᑎᑦᓭᑦ

ᕿᑲᑫᓐᓇᕈᓐᓇᕕᖏᑦ: 20 ᐅᓪᓗᐃᑦ ᐊᕐᕌᒍᑕᒫᑦ:

ᐱᖁᔭᕐᑎᒍᑦ ᕿᑲᕐᓀᑦ: 20 ᐅᓪᓗᐃᑦ (ᐃᓚᐅᑎᓪᓗᒋᑦ 10 ᐅᓪᓗᐃᑦ ᖁᕕᐊᓱᕝᕕᐅᑉ ᐅᓪᓗᖏᑦ)

ᑐᓂᓗᒋᑦ ᐱᓇᓱᒍᒪᐅᑎᑎᑦ ᓯᕿᕐᖑᔭᖓ ᐅᓪᓗᖓᓗ ᑎᑭᓚᐅᕐᑎᓇᒍ ᐅᕗᖓ:

Human Resources

Kativik Regional Government

P.O. Box 9

Kuujjuaq QC J0M 1C0

Fax: (819) 964-2975

Email: humanresources@krg.ca

ᑲᑎᕕᒃᑯᑦ ᐊᑦᔨᒋᑦᑐᒥᒃ ᐱᕕᑦᓴᖃᕐᑎᓯᓲᖑᕗᖅ ᐱᓇᓱᑦᑎᓯᔨᐅᑦᓱᓂ. ᑕᒪᓐᓇ ᒪᓕᑦᓱᒍ ᐊᒻᒪᓗ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖅ, ᐱᖁᔭᖏᑦ

ᐊᑦᔨᒋᔭᐅᓪᓚᕆᖕᖏᑐᑐᐃᓐᓇᕆᐊᓕᑦ ᐃᓄᑐᐃᓐᓇᒥᒃ ᐱᔪᑦᓴᐅᔮᕐᑐᖃᓕᕐᐸᑦ.

ᓇᓪᓕᑳᕐᑕᐅᔪᐃᑦ ᑭᓯᐊᓂ ᐊᐱᕆᔭᐅᒍᒪᓗᑎᒃ ᐅᖄᓚᕕᐅᓂᐊᕐᑐᑦ.