ᐱᓇᓱᐊᕋᑦᓴᓂᑦ ᐊᐅᓚᑦᓯᔨ – ᑲᕙᒫᐱᒃᑯᑦ ᐱᖁᑎᒻᒪᕆᖏᓐᓂ - KRG

ᐱᓇᓱᐊᕋᑦᓴᖅ ᐊᑐᐃᓐᓇᖅ

ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ (ᑮᐋᔩ), ᐊᒥᓱᐃᓂᒃ ᑭᒡᒐᑐᕈᑎᖃᕐᓱᓂ ᑎᒥᐅᕗᖅ ᐊᐅᓚᑦᓯᕕᖃᕐᓱᓂᓗ ᑯᐯᑉ ᓄᓇᖓᓂ ᑕᕐᕋᒦᑦᑐᒥ 55 ᓇᑉᐸᖓᑕ ᖁᓛᓂ, ᕿᓂᓕᕐᒥᔪᖅ ᐃᓄᒻᒥᒃ ᐱᕈᒪᓂᖃᑦᓯᐊᑐᒥᒃ ᐊᒻᒪᓗ ᐅᒃᑯᐃᖔᑦᓯᐊᑐᒥᒃ ᑫᐋᔩᒃᑯᓂ ᐱᒍᑦᔨᕈᒪᓂᖃᑦᓯᐊᓱᓂ ᐃᒣᑦᑐᒥᒃ ᐱᓇᓱᐊᓚᖓᔪᒥᒃ:

ᐱᓇᓱᐊᕋᑦᓴᓂᑦ ᐊᐅᓚᑦᓯᔨ – ᑲᕙᒫᐱᒃᑯᑦ ᐱᖁᑎᒻᒪᕆᖏᓐᓂ

ᑐᓴᐅᒪᑎᑦᓯᖃᑦᑕᓗᓂ ᑲᒪᔨᒻᒪᕆᖓᓂᒃ ᓄᓇᓕᓐᓂᒃ ᓇᐅᓕᒫᓄᐊᖓᔪᓂᒃ ᐱᓇᓱᐊᕐᑏᑦ ᐱᒍᑦᔨᕕᖓᓂᒃ ᐊᒻᒪᓗ ᐱᓇᓱᖃᑎᙯᓐᓇᓗᓂ ᐊᓯᖏᓐᓂᒃ ᐱᒍᑦᔨᕕᐅᑉ ᐱᓇᓱᑦᑎᖏᓐᓂᒃ, ᐱᓇᓱᐊᒐᑦᓴᓂᒃ ᐊᐅᓚᑦᓯᔨ - ᑲᕙᒫᐱᒃᑯᑦ ᐱᖁᑎᒻᒪᕆᖏᑦ ᐊᐅᓚᑦᓯᒋᐊᖃᓲᖅ ᐊᒻᒪᓗ ᐃᑉᐱᒋᔭᖃᕆᐊᖃᕐᓱᓂ ᐱᖁᑎᒻᒪᕇᑦ ᓴᓇᔭᐅᓂᖏᑦᑕ ᐱᒍᑦᔨᐅᑎᓕᐊᕕᓂᕐᓂᒃ ᐊᑖᒎᕐᑎᓗᒋᑦ ᐃᓱᕐᕉᑏᑦ ᐱᓇᓱᐊᕐᑕᐅᒍᑎᖏᓐᓄᑦ ᑲᕙᒫᐱᒃᑯᑦ ᐱᖁᑎᒻᒪᕆᖏᑦᑕ ᐱᐅᓯᒋᐊᕐᑕᐅᖃᑦᑕᓂᖏᓐᓄᑦ (ᐊᕐᖁᑏᑦ, ᑰᕝᕖᑦ, ᕿᑦᓱᑎᕆᓃᑦ, ᐃᑳᕐᕖᑦ ᐊᒻᒪᓗ ᓄᓇᐅᑉ ᐊᑖᒍᑦ ᑰᕝᕖᑦ; ᓴᓂᖃᐅᑏᑦ; ᑲᕙᒫᐱᒃᑯᑦ ᐊᓪᓚᕕᖏᑦ, ᐋᕐᕿᓱᐃᓂᖅ ᓄᓇᒃᑰᔫᖃᐅᑎᓂᒃ ᐊᒻᒪᓗ ᓱᓇᕋᓚᖃᐅᑎᓂᒃ; ᐃᒥᕐᑕᓂᕐᓂᒃ ᐊᒻᒪᓗ ᐊᓇᕐᑕᑕᐅᔪᕕᓂᓕᕆᓂᖅ, ᐊᓯᖏᓪᓗ); ᐃᓚᐅᑎᓪᓗᒋᑦ ᐱᖁᑎᒻᒪᕇᑦ ᐱᓇᓱᐊᕐᑕᐅᒍᑎᖏᑦ. ᐱᓇᓱᐊᒐᑦᓴᓂᒃ ᐊᐅᓚᑦᓯᔨ ᑐᓂᓯᓲᖑᒻᒥᔪᖅ ᐱᓪᓗᑯᑦᑐᓕᕆᓂᕐᒥᒃ ᐃᑲᔪᕐᓯᓂᕐᒥᒃ ᓄᓇᓖᑦ ᑲᕙᒫᐱᖏᓐᓄᑦ ᐱᑦᔪᑎᒋᑦᓱᒋᑦ ᐊᐅᓚᑕᐅᓂᖏᑦ ᑲᕙᒫᐲᑦ ᐱᖁᑎᒻᒪᕆᖏᑦ.

ᐱᓇᓱᐊᒐᑦᓴᖏᑦ ᑲᒪᒋᒋᖓᓕᖏᓪᓗ ᐱᓇᓱᐊᕋᑦᓴᓂᑦ ᐊᐅᓚᑦᓯᔨ - ᑲᕙᒫᐱᒃᑯᑦ ᐱᖁᑎᒻᒪᕆᖏᓐᓂᒃ ᒪᑯᐊ:

• ᐸᕐᓇᓗᒋᑦ ᑲᒪᒋᓗᒋᓗ ᐊᑐᓕᕐᑎᑕᐅᓯᒪᔪᑦ ᑲᕙᒫᐱᒃᑯᑦ ᐱᖁᑎᒻᒪᕆᖏᑦᑕ ᐱᓇᓱᐊᑕᐅᓂᖏᑦ;

• ᖃᐅᔨᓴᖃᑦᑕᓗᒋᑦ ᑲᕙᒫᐱᒃᑯᑦ ᑭᖕᖒᒪᒋᔭᖏᑦ ᐃᑲᔪᕐᓯᓗᒋᓗ ᓯᕗᓪᓕᐸᐅᑦᔭᑎᑦᓯᓂᕐᓂᒃ ᐱᓇᓱᐊᒐᑦᓴᓂᒃ;

• ᐊᑐᓕᕐᑎᓯᓂᒃᑯᑦ ᐱᒋᐊᖕᖓᐅᑎᓂᒃ ᐱᓇᓱᐊᒐᑦᓴᓂᒃ ᓇᓃᓐᓂᖏᓐᓂᒃ ᑲᕙᒫᐱᒃᑯᓗ ᐱᓇᓱᐊᕐᑕᐅᓚᐅᖕᖏᓂᖏᓐᓂᒃ: ᐱᓇᓱᐊᕐᑎᓯᒍᑏᑦ, ᑐᕌᒐᑦᓴᓂᒃ ᒥᑦᓴᐅᓵᕆᓂᖅ, ᑮᓇᐅᔭᓕᕆᓂᕐᒧᑦ ᖃᑦᓯᕌᓂᓴᖏᓐᓂᒃ, ᐊᓯᖏᓐᓂᓗ;

• ᑐᑭᒧᐊᕐᑎᓯᓗᓂ ᐊᑐᐃᓐᓇᕈᕐᑎᑕᐅᓯᒪᔪᓂᒃ ᐸᕐᓇᐅᑎᓂᒃ ᐊᒻᒪᓗ ᓱᕐᕌᑎᕆᐅᑎᒋᓯᒪᔭᖏᓐᓂᒃ ᓯᓚᑖᒎᕐᑐᑯᑦ ᐱᔪᓐᓇᐅᑎᓖᑦ;

• ᑐᑭᒧᐊᕐᑎᓯᓗᓂ ᐱᒋᐊᖕᖓᐅᑎᖏᓂᒃ ᐊᑭᑭᓐᓂᐹᕐᓂᐊᕈᑏᑦ ᐊᓪᓚᓯᒪᔪᖏᑦ;

• ᐋᕐᕿᓱᐃᖃᑦᑕᓗᓂ ᐱᓇᓱᖃᑎᒌᑦᑐᓂᒃ ᐱᔪᓐᓇᐅᑎᓕᓐᓂᒃ, ᐱᒍᑦᔨᐅᑎᑎᒍᑦ ᐱᒍᑦᔨᔪᓂᒃ ᐊᒻᒪᓗ ᑲᕙᒫᐱᒃᑯᓂᒃ ᐃᓘᓐᓇᖏᓐᓂᒃ ᐱᓇᓱᐊᕐᑕᐅᔪᐃᑦ ᓇᓃᓕᕐᓂᓕᒫᖏᓐᓂᒃ;

• ᐃᓘᓐᓈᒍᑦ ᐃᑉᐱᒋᓗᒋᑦ ᐱᓇᓱᐊᑕᐅᔪᑦ ᐱᓇᓱᐊᕐᑕᐅᔪᐃᑦ ᓇᒻᒥᓂᓕᖁᑎᖏᓐᓄᑦ: ᒪᓕᑦᓯᐊᒪᖔᑕ ᐅᓪᓗᖏᑦᑕ ᐃᓱᓕᕝᕕᓴᖏᓐᓂᒃ, ᑐᕌᒐᓕᕆᓂᒃᑯᑦ, ᐱᖁᔭᑎᒍᑦ ᒪᓕᑦᑕᐅᒋᐊᓕᓕᑎᒍᓪᓗ, ᐱᓇᓱᐊᒐᑦᓴᐅᔪᑦ ᐋᕐᕿᒋᐊᕐᑕᐅᓂᖏᓐᓄᑦ, ᐱᓇᓱᐊᕐᑕᐅᔪᑦ ᓇᐅᑦᓯᑐᕐᑕᐅᓂᖏᓐᓄᑦ ᐱᔪᓐᓇᐅᑎᓕᓐᓄᑦ, ᐊᑭᓕᕆᐊᓕᓕᕆᓂᒃᑯᑦ, ᑮᓇᐅᔭᓕᕆᓂᒃᑯᑦ, ᐋᕐᕿᒋᐊᕐᑕᐅᒋᐊᖃᕈᓐᓇᑐᓕᕆᓂᒃᑯᑦ, ᐊᓯᖏᓐᓂᓗ;

• ᐱᓇᓱᐊᕐᓗᓂ ᐊᓯᖏᓐᓂᒃ ᐊᑦᔨᐸᓱᖏᓐᓂᒃ ᑐᑦᓯᕌᕆᔭᐅᔪᓂᒃ ᐊᖓᔪᕐᖄᒥᓄᑦ.

ᐱᔪᓐᓇᐅᑎᒋᒋᐊᓕᖏᑦ:

• ᐃᓕᓐᓂᐊᕕᕐᔪᐊᒥᒃ ᐱᔭᕇᕈᑎᖃᕐᓗᓂ ᐃᓪᓗᓕᐅᕐᓂᒨᓕᖓᔪᓂᒃ (ᐃᓪᓗᔪᐊᓕᐅᕐᓂᓂᒃ, ᓱᕐᕌᑎᕆᔨᒻᒪᕆᒻᒥᒃ ᐊᒻᒪᓗ ᐃᓪᓗᓕᐅᕐᓂᒥᒃ). ᐱᓪᓗᑯᑦᑐᓕᕆᓂᕐᒥᒃ ᐱᓇᓱᑦᓯᒪᒍᓂ ᑲᑎᓪᓗᒋᑦ ᐱᓇᓱᓯᑦᒪᓂᖓ ᐊᒻᒪᓗ ᐊᑐᕆᐊᓕᓐᓂᒃ ᐱᓯᒪᓂᒃᑯᑦ ᐃᓱᒪᒋᔭᐅᒍᓐᓇᒥᔪᖅ ᓇᓪᓕᖁᐊᒋᒋᐊᖓ;

• ᐃᓕᒐᓱᐊᕐᑐᑦ ᐱᔪᓐᓇᐅᑎᓖᑦ ᓓᓴᓐᓯᖃᕐᓱᑎᑦ ᐅᕝᕙᓘᓐᓃᑦ ᓇᓗᓀᒃᑯᑕᖃᕈᑎᑦ ᐅᑯᐊ ᐆᑦᑑᑎᒋᓗᒋᑦ EIT, CET ᐅᕝᕙᓘᓐᓃᑦ ᑰᓪᑎᒥᒃ ᓇᓗᓀᒃᑯᑕᓕᒻᒥᒃ; ᐱᔪᓐᓇᐅᑎᓕᓐᓄᑦ ᐱᓇᓱᐊᒐᑦᓴᓂᒃ ᐊᐅᓚᑦᓯᓂᕐᒥᒃ ᓇᓗᓀᒃᑯᑕᖃᕈᓂ ᐱᐅᒋᔭᐅᒐᔭᕐᒥᔪᑦ.

• ᐱᓇᓱᐊᕐᓯᒪᓂᖃᕐᓗᓂ ᐱᖓᓱᓂᒃ (3) ᐊᕐᕌᒍᕐᓂᒃ ᐊᑑᑎᓕᓐᓂᒃ, ᑲᔪᓯᔪᓂᒃ ᐱᓇᓱᐊᕐᓯᒪᓂᕐᓂᒃ ᐱᓇᓱᐊᒐᑦᓴᓂᒃ ᐊᐅᓚᑦᓯᔨᐅᓂᕐᒥᒃ ᐅᕝᕙᓘᓐᓃᑦ ᑐᑭᒧᐊᕐᑎᓯᔨᐅᓂᕐᒥᒃ ᐊᒻᒪᓗ ᐱᓪᓗᑯᑦᑐᓕᕆᓂᕐᒥᒃ ᐃᑲᔪᕐᓯᓂᕐᒥᒃ;

• ᑲᕙᒫᐱᒃᑯᓄᑦ ᐱᓇᓱᐊᕐᒐᑦᓴᓂᒃ ᐊᐅᓚᑦᓯᓂᕐᒥᒃ ᐱᓇᓱᑦᓯᒪᓗᓂ, ᐱᓗᐊᕐᑎᒥᒃ ᑲᕙᒫᐱᒃᑯᑦ ᐱᖁᑎᒻᒪᕆᖏᓐᓂᒃ ᐱᓇᓱᐊᒐᑦᓴᖏᓐᓂᒃ, ᑕᒪᓐᓇ ᐱᓇᓱᐊᕐᑕᐅᓯᒪᓪᓚᕆᒋᐊᓕᒃ;

• ᐱᒍᓐᓇᓂᖃᕐᓗᓂ ᐱᓇᓱᒍᓐᓇᓂᕐᒥᒃ ᑲᔪᓯᐅᑦᔨᒍᓐᓇᓂᕐᒥᓗ ᐊᒥᓱᓂᒃ ᐱᓇᓱᒐᑦᓴᓂᒃ ᐊᑕᐅᑦᓯᑯᑦ ᐋᕐᕿᓱᕐᓯᒪᑦᓯᐊᑐᒃᑯᑦ ᐃᓂᓪᓚᖓᑦᓯᐊᑐᒃᑯᓗ;

• ᐱᒍᓐᓇᓂᖃᑦᓯᐊᓗᓂ ᓄᐃᑦᓯᒍᓐᓇᓂᕐᒥᒃ ᐃᓱᒪᒋᔭᕐᒥᓂᒃ ᑐᑭᓯᓇᑦᓯᐊᑐᓂᒃ ᐅᖃᐅᓯᖃᕐᓗᓂ ᐊᒻᒪᓗ ᓈᓚᒍᓐᓇᓯᐊᕐᓗᓂ ᑭᖕᖒᒪᒋᔭᐅᔪᓂᒃ;

• ᓱᖏᐅᓐᓂᐅᒍᐊᕐᑑᓗᓂ:

• ᐱᒋᐊᕐᑎᓯᕕᖃᕈᓐᓇᓗᓂ, ᐃᒻᒥᓂᕐᓱᕈᓐᓇᓯᐊᕐᓗᓂ ᐊᒻᒪᓗ ᐱᕕᑦᓴᙯᓐᓇᖃᑦᑕᓗᓂ ᐱᓇᓱᖃᑎᒥᓄᑦ;

• ᐊᓪᓚᕈᓐᓇᓗᓂ ᐊᒻᒪᓗ ᐅᖃᕈᓐᓇᓗᓂ ᐱᓇᓱᐊᕐᓂᒥᓂᒃ ᖃᐅᔨᒪᓂᖃᕐᓗᓂ ᒪᕐᕉᓴᓚᐅᕐᐸᓃᒃ (2) ᐅᖃᕈᓐᓇᑕᖏᑦ ᐅᑯᓂᖓ ᐅᖃᐅᓯᕐᓂᒃ: ᐃᓄᒃᑎᑐᑦ, ᖃᓪᓗᓈᑎᑐᑦ ᐅᐃᒍᐃᑎᑐᓪᓗ

• ᐱᓇᓱᐊᕈᓐᓇᓂᖓ ᖃᐅᔨᒪᓂᖃᑦᓯᐊᓗᓂ Microsoft Office-ᒥᒃ, ᐊᓯᖏᓐᓂᓗ ᐋᕐᕿᓱᕐᓯᒪᐅᑎᖃᕐᑐᓂᒃ ᖃᕆᑕᐅᔭᓕᕆᐅᑎᓂᒃ (AutoCAD, ᐊᓯᖏᓐᓂᓗ.);

• ᐱᓇᓱᐊᕐᓂᖓ ᖃᐅᔨᒪᓂᖃᕐᓗᓂ MS ᐱᓇᓱᐊᒐᑦᓴᖏᓐᓂᒃ ᐅᕝᕙᓘᓐᓃᑎ ᐳᐊᒥᐊᕙ P6-ᒥᒃ ᓲᖑᔪᒥᒃ ᐱᖃᕈᑎᐅᒻᒥᔪᖅ;

• ᐊᑐᐃᓐᓇᖏᓐᓇᖃᑦᑕᓗᓂ ᐊᕐᕕᑕᕈᓐᓇᓂᕐᒥᒃ ᖃᖓᑐᐃᓐᓇᑯᑦ ᓄᓇᕕᒻᒥᒃ;

ᐱᓇᓱᒐᐅᑉ ᓇᓃᓐᓂᖓ: ᑰᑦᔪᐊᖅ

ᑮᓇᐅᑦᔭᓵᖏᑦ: ᐳᒃᑭᓂᕐᐹᖓ $63,716 ᐊᒻᒪᓗ ᐅᓄᕐᓂᐹᖅ $109,329 ᐊᕐᕌᒍᑕᒫᑦ (ᐳᕐᑐᓂᖓ 10)

ᐱᕚᓪᓕᕈᑎᑦᓭᑦ: ᐃᓅᒐᓱᐊᕐᓂᐅᑉ ᐊᑭᖓ: ᐳᒃᑭᓂᕐᐹᖓ $8,500 ᐊᕐᕌᒍᑕᒫᑦ;

ᓂᕿᓄᑦ ᐃᑲᔪᕐᓯᐅᑏᑦ: ᐳᒃᑭᓂᕐᐹᖓ $4,216 ᐊᕐᕌᒍᑕᒫᑦ;

ᐊᓂᕐᕋᑫᓐᓇᒍᑏᑦ: ᐳᕐᑐᓂᕐᐹᖓ 3 ᐃᓄᒻᒧᑦ ᐊᑕᐅᓯᕐᒧᑦ ᐊᕐᕌᒍᑕᒫᑦ;

ᐊᕐᕌᒍᑕᒫᑦ; ᐱᕚᓪᓕᖁᑏᑦ ᐃᓚᐅᑎᓪᓗᒋᑦ ᐃᑦᑑᒍᑎᑖᕐᑕᕈᑎᑦᓭᑦ; ᓄᕐᖃᖓᑫᓐᓇᕈᓐᓇᓃᑦ: 20 ᐅᓪᓗᐃᑦ ᐊᕐᕌᒍᑕᒫᑦ;

ᕿᑲᕐᓀᑦ ᐅᓪᓗᖏᑦ: 20 ᐅᓪᓗᐃᑦ, ᐃᓚᐅᑎᓪᓗᒋᑦ 10 ᐅᓪᓗᐃᑦ ᖁᐊᕕᓱᕝᕕᓯᐅᓇᕐᐅᓂᖓᓂᒃ.

ᑎᑭᑎᑦᓯᓗᑎᑦ ᐱᒍᒪᐅᑎᓐᓂᐅᕕᑦ ᖃᓪᓗᓈᑎᑐᑦ ᐅᐃᒍᐃᑎᑐᓪᓗ ᐊᓪᓚᓗᒋᑦ ᓯᕗᓪᓕᐅᑎᓪᓗᒋᑦ ᐅᕗᖓ:

ᐱᓇᓱᑦᑎᓕᕆᕕᒃ

ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ

P.O. Box 9

ᑰᑦᔪᐊᖅ ᑯᐯᒃ J0M 1C0 ᓱᑲᑦᑐᑰᑦ: 819-964-2975

ᖃᕆᑕᐅᔭᒃᑯᑦ: humanresources@krg.ca

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓇᓪᓕᖁᐊᒌᑦᑐᒥᒃ-ᐱᕕᑦᓴᖃᕐᑎᓯᓂᕐᒥᒃ ᐱᓇᓱᑦᑎᓯᔨᐅᕗᑦ. ᑖᓐᓇ ᒪᓕᑦᓱᒍ ᐊᒻᒪᓗ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓ, ᖃᓄᐃᓕᖓᐅᓯᖏᑦ ᐊᑦᔨᒌᖕᖏᑑᑐᐃᓐᓇᕆᐊᓖᑦ ᖁᕝᕙᒋᐊᕆᒐᓱᐊᕐᓂᒧᑦ ᐱᓇᓱᑦᑎᑖᕐᓂᒥᒃ ᐃᓄᓐᓂᒃ ᐱᓇᓱᒐᕐᑖᕋᓱᐊᕐᑐᓂᒃ.

ᐱᓇᓱᒐᕐᑖᕋᓱᐊᕐᑐᐃᑦ ᑎᒃᑯᐊᑕᐅᔪᐃᑦ ᑭᓯᐊᓂ ᐊᐱᕐᓲᔭᕐᑕᐅᓛᕐᓂᒥᓄᑦ ᖃᐅᔨᑎᑕᐅᓛᕐᑐᑦ.