ᐃᓕᓐᓂᐊᑏᑦ ᖃᓄᐃᓘᕐᑎᑕᐅᒍᑎᖏᓐᓂᒃ ᐊᐅᓚᑦᓯᔨ - KI

ᑲᑎᕕᒃ ᐃᓕᓴᕐᓂᓕᕆᓂᖅ ᐃᓕᓴᕐᓂᓕᕆᓂᐅᕗᖅ ᐃᓕᓐᓂᐊᓂᓕᕆᓂᕐᒥᒃ ᐱᑕᖃᕐᑎᓯᑦᓱᓂ ᓄᓇᓕᓐᓂ 14-ᓂᒃ ᓄᓇᕕᒻᒥ

ᐃᓂᖓ ᐱᓇᓱᐊᕆᐊᓕᖏᓪᓗ:

ᓯᓂᑦᑕᕕᒻᒥ ᐊᖓᔪᕐᖄᖅ ᑲᒪᒋᔭᖃᓲᖑᕗᖅ ᑲᒪᔨᓂᒃ, ᓯᓂᑦᑕᕕᒻᒥ ᑲᒪᔨ ᑲᒪᒋᔭᑦᓴᖃᕐᐳᒃ ᐋᕐᕿᓱᐃᓗᓂ ᓱᖃᕐᓯᕈᑎᑦᓴᓂᒃ, ᓱᖃᑦᓯᑎᑦᓯᓗᓂ, ᐃᓕᓐᓂᐊᑎᓂᑦ ᑫᓪᓗᐊᓯᐊᕐᓗᓂ, ᐃᓕᓐᓂᐊᑎᓂᓪᓗ ᓯᓂᑦᑕᕕᒻᐅᓂᒃ ᐊᑦᑕᓇᕐᑐᒦᑎᓯᑦᑌᓕᓗᓂ.

ᐃᓘᓐᓈᒍᑦ ᐃᑉᐱᒋᒋᐊᓕᖏᓐᓂ, ᑖᓐᓇ ᐱᓇᓱᒐᖅ ᐃᒣᓕᖓᔪᓂᒃ ᐃᓚᓖᑦ ᑲᒪᒋᔭᕆᐊᓕᖏᑦ:

·       ᐅᓐᓄᑯᑦ ᐃᓕᓐᓂᐊᑎᓂᒃ ᐃᑲᔪᖃᑦᑕᓗᓂ ᐊᖏᕐᕋᒥ ᐱᓇᓱᒋᐊᓕᖏᓐᓂᒃ ᐃᓕᓴᐅᑎᖏᓐᓂᒃ;

·       ᐊᑐᐃᓐᓇᕈᕐᑎᖃᑦᑕᓗᓂ ᐃᓕᓐᓂᐊᑏᑦ ᓱᖃᑦᓯᑎᑕᐅᒍᑎᑦᓴᖏᓐᓂᒃ ᐃᓚᐅᖃᑦᑕᓗᓂᓗ;

·       ᖃᓄᐃᙱᓯᐊᕐᓂᖏᓐᓂᒃ ᐊᑦᑕᓇᕐᑐᒦᑦᑌᓕᒪᓂᖏᓐᓂᓗ ᐃᓕᓐᓂᐊᑏᑦ ᑲᒪᒋᔭᖃᕐᓗᓂ;

·       ᐊᓯᓕᒫᖏᓐᓂᓗ ᐱᓇᓱᐊᕐᓗᓂ ᐊᖓᔪᕐᖄᖓᑕ ᑎᓕᐅᕆᒍᑎᖏᓐᓂᒃ

ᐱᒍᓐᓇᐅᑎᒋᒋᐊᓕᖏᑦ:

ᐃᓕᓐᓂᐊᕕᕐᔪᐊᒥ ᐱᔭᕇᕐᓯᒪᐅᑎᖃᕐᓗᓂ ᑐᑭᒧᐊᕐᑎᓯᓂᕐᒥᒃ ᐃᓱᐊᕐᓭᔨᐅᓂᕐᒥ, ᐊᐅᓚᑦᓯᔨᐅᓂᕐᒥ, ᓱᖃᑦᓯᑎᑦᓯᔨᐅᓂᕐᒥ ᐃᓄᓕᕆᔨᐅᓂᕐᒥᓘᓐᓃᑦ ᐱᓇᓱᐊᕐᓯᒪᓗᓂᓗ ᑌᒣᑦᑐᒐᓛᒥᒃ.

ᐃᓕᓐᓂᐊᕕᕐᔪᐊᒥ ᐳᕐᑐᓂᕐᐸᒥᒃ ᐱᔭᕇᕈᓯᕐᑕᐅᓯᒪᓗᓂ ᑕᒡᒐᓂ ᐃᓂᒥ ᐱᒍᓐᓇᐅᑎᒋᔭᐅᒋᐊᓕᓐᓄᑦ ᐱᑐᑦᓯᒪᓂᖃᕐᑐᒥᒃ.

ᐃᓕᓐᓂᐊᓂᓕᕆᓂᖅ ᖁᓛᓂ ᐅᖃᕐᑕᐅᔪᓂᒃ ᐱᒍᓐᓇᐅᑎᒋᔭᐅᒋᐊᓕᓐᓂᒃ ᐊᑐᙱᑑᒍᓐᓇᑐᖅ ᓈᒻᒪᑐᕆᑦᓯᒍᓂ ᐊᖏᖃᑎᒌᓐᓂᒧᑦ ᐃᓚᐅᒍᑎᖃᕐᑐᒥᒃ ᐱᓇᓱᒐᕐᑖᕋᓱᐊᕐᑐᒥᒃ. ᐃᓕᓐᓂᐊᓂᓕᕆᓂᐅᓪᓗ ᐱᒋᐅᕐᓴᑎᑦᓯᒍᑎᖏᓐᓂᒃ ᐃᓚᐅᕕᖃᕋᔭᕐᓂᒥᒃ ᐊᖏᕐᓯᒪᓗᓂ

ᐊᑐᕈᓐᓇᕆᐊᓕᖏᑦ:

·       ᐅᖃᕈᓐᓇᓗᓂ ᒪᕐᕉᓂᒃ (2) ᐅᖃᐅᓰᓐᓂᒃ ᐱᖓᓲᑎᓪᓗᒋᑦ (3) ᐱᓇᓱᑦᑐᓄᑦ ᐊᑐᕐᑕᐅᓲᑦ ᐅᖃᐅᓰᑦ ᐃᓕᓐᓂᐊᓂᓕᕆᓂᕐᒧᑦ (ᐃᓄᒃᑎᑐᑦ, ᐅᐃᒍᐃᑎᑐᑦ, ᖃᓪᓗᓈᑎᑐᑦ).

·       ᖃᐅᔨᒪᓗᓂ ᐃᓄᐃᑦ ᐃᓗᕐᕈᓯᖓᓂᒃ, ᐱᐅᓯᖏᓐᓂᒃ ᐊᒻᒪᓗ ᐊᑑᑎᓯᒪᔭᖏᓐᓂᒃ ᑭᖑᓂᕐᒥ ᐃᕐᖃᓇᕐᑐᖁᑎᖏᓐᓂᒃ (ᐱᓇᓱᓐᓂᖓᓂᒃ ᐃᑲᔪᕐᓯᒐᔭᕐᑐᖅ);

·       ᐱᓇᓱᐊᖃᑎᒌᑦᑐᓄᑦ ᐃᓚᒋᔭᐅᒍᓐᓇᓯᐊᕐᓗᓂ ᐃᒻᒥᓂᕐᓱᒍᓐᓇᓯᐊᕐᓗᓂᓗ;

·       ᐃᓄᓐᓂᒃ ᐱᓇᓱᖃᑎᖃᕈᓐᓇᓂᕐᒥᒍᑦ ᐱᓯᑎᐅᓗᓂ ᐃᓂᓪᓚᖓᒃᑫᓯᐊᕈᓐᓇᓗᓂ;

·       ᐊᓯᓱᐃᓂᒃ ᐊᑕᐅᑦᓯᑰᕐᓗᒋᑦ ᐱᓇᓱᐊᕈᓐᓇᓗᓂ, ᓯᕗᓪᓕᐅᔭᐅᒋᐊᓕᓐᓂᒃ ᓇᓗᓀᔦᒍᓐᓇᓯᐊᕐᓗᓂ ᐱᓀᓗᑕᓂᓪᓗ ᐋᕐᖀᒍᑎᑦᓴᓯᐅᕈᓐᓇᓗᓂ;

·       ᐊᒥᓱᓂᒃ ᑲᑎᒪᑎᑕᐅᔪᓂᒃ ᐊᐅᓚᑦᓯᓕᓂᐅᓗᓂ;

ᑫᕙᓪᓚᒍᓯᕆᒐᔭᕐᑕᖏᑦ:

35 ᐃᑲᐅᕐᓃᑦ ᐱᓇᓱᐊᕈᓯᑕᒫᑦ.

ᑮᓇᐅᑦᔭᓵᖏᑦ / ᐱᓇᓱᒐᖓᑕ ᑌᔭᐅᓂᖓ / ᐃᓱᕐᕉᑎᑦᓴᖏᓪᓗ:

ᒪᓕᑦᓱᒋᑦ ᐱᓇᓱᒍᑦᔨᓂᕐᒧᑦ ᐊᖏᕐᓯᒪᐅᑎᖏᑦ ᐱᒍᓐᓇᐅᑎᓖᑦ ᐱᓇᓱᑦᑏᓗ ᑲᑐᑦᔨᖃᑎᒌᓐᓂᖏᑦ ᑯᐯᑉ ᑕᕐᕋᖓᓂ. ᑖᓐᓇ ᐱᓇᓱᒐᖅ 2107-ᒥᒃ ᐱᓇᓱᕝᕕᖃᕋᔭᕐᑐᖅ: $47,886-ᒥᑦ $79,426-ᒧᑦ ᑎᑭᐅᑎᒍᓐᓇᑐᑦ ᐊᕐᕌᒍᑕᒫᑦ ᐱᒍᓐᓇᐅᑎᖏᑦ ᐱᓇᓱᐊᕐᓯᒪᓂᖏᓪᓗ ᒪᓕᑦᓱᒋᑦ.

ᑌᒃᑯᐊ ᐱᓇᓱᒐᕐᑖᕋᓱᑦᑐᑦ ᐃᓂᒧᑦ ᑖᑦᓱᒧᖓ ᐅᓇᒻᒥᒋᔦᑦ ᑭᓯᐊᓂ ᐅᖃᓕᒪᕕᐅᓛᕐᑐᑦ.